ချဲလ်ဆီး အသင်းရဲ့ တိုက်စစ် ကစားသမားသစ် ဖြစ်သူ ဟာကင်မ် ဇီယက်ချ် က အသင်းသစ်မှာ အံဝင် နိုင်ဖို့ အတွက် လုံလောက်တဲ့ အချိန် တွေကို ပိုင်ဆိုင် နိုင်မယ့်နောက် အေဂျက်ဇ် အသင်းဖော်ဟောင်း ဖြစ်သူ ဒွန်နီ ဘန်ဒီ ဘိခ်ဟာ မန်ချက်စတာ ယူနိုက်တက် အသင်း အတွက် ပုံစံကောင်း တွေကို ဆက်တိုက် ပြနိုင် လိမ့်မယ်လို့ ယူနိုက်တက် ပရိသတ် တွေဆီ သတင်းကောင်း ပါးသွားလိုက် ပါတယ် ။
မန်ချက်စတာ ယူနိုက်တက် အသင်းဟာ ကွင်းလယ်ကို အင်အား ဖြည့်တင်း နိုင်ရေး အတွက် ပြီးခဲ့တဲ့ စက်တင်ဘာလ တုန်းက အေဂျက်ဇ် အသင်းမှ ကွင်းလယ်လူ ဒွန်နီ ဗန်ဒီ ဘိခ်ကို ပေါင် သန်း 40 ဝန်းကျင်နဲ့ ခေါ်ယူခဲ့ ပါတယ် ။ ဒါပေမယ့် နယ်သာလန် လက်ရွေးစင်ဟာ အင်္ဂလန် မြေမှာ ပုံမှန် ပွဲထွက်ခွင့် တွေကို ပိုင်ဆိုင် နိုင်ဖို့ အခက်တွေ့ နေခဲ့ရ ပါတယ် ။
အထူးသဖြင့် ယူနိုက်တက် အသင်းရဲ့ ကွင်းလယ်မှာ တိုက်စစ်ကို လိုက်ပါ ကစားနိုင်ရေး အတွက် ဘရူနို ဖာနန်ဒက်စ် နဲ့ ပေါလ် ပေါ့ဂ်ဘာ တို့လို စပါယ်ရှယ် ကစားသမားတွေ ရှိနှင့်ပြီးသား ဖြစ်နေခဲ့ ပါတယ် ။ ဒါ့ကြောင့် ဗန်ဒီ ဘိခ်ဟာ ပရီးမီးယားလိဂ် ပြိုင်ပွဲမှာ မန်ချက်စတာ ယူနိုက်တက် အသင်း အတွက် ပွဲထွက်ခွင့် ပိုင်ဆိုင် နိုင်ဖို့ ခက်ခဲ နေတာပဲ ဖြစ်ပါတယ် ။
ဒါပေမယ့် ဗန်ဒီ ဘိခ်ဟာ ယူနိုက်တက်တို့ လူတန်တောင်း၊ ဘရိုက်တန် အသင်းတွေနဲ့ ရင်ဆိုင် ခဲ့တဲ့ EFL ဖလား ပွဲစဉ်တွေမှာ ပွဲထွက် ကစားခွင့်တွေ ပိုင်ဆိုင် ထားနိုင် ခဲ့ကြ ပါတယ် ။ ပရီးမီးယားလိဂ် မှာတော့ သူဟာ စုစုပေါင်း မိနစ် 60 ခန့်သာ လူစားဝင် ကစားခွင့် ပိုင်ဆိုင် ထားနိုင်ခဲ့သူ ဖြစ်ခဲ့ရ ပါတယ် ။ ဒါ့အပြင် PSG နဲ့ ကစား ခဲ့တဲ့ ချန်ပီယံလိဂ် ပြိုင်ပွဲ မှာလည်း ခေတ္တသာ လူစားဝင် ကစားခွင့် ရရှိထားခဲ့ ပါတယ် ။
အခြား တစ်ဖက် မှာတော့ အေဂျက်ဇ် အသင်း အတွက် စုစုပေါင်း 133 ပွဲ ကစား ပေးထားခဲ့ပြီး ကိုယ်တိုင် 40 ဂိုး သွင်းယူ 29 ကြိမ် ဂိုးဖန်တီး ပေးထားနိုင်ခဲ့တဲ့ ဒွန်နီ ဗန်ဒီ ဘိခ်ဟာ ယူနိုက်တက် အသင်း အတွက်တော့ ပါဝင်ခွင့် ရရှိခဲ့တဲ့ ပွဲချိန် မိနစ် တွေမှာ တစ်ဂိုးသွင်း ၊ တစ်ဂိုး ဖန်တီးမှုသာ ပြုလုပ် ပေးထားနိုင်ခဲ့ ပါတယ် ။
အခုတော့ ကြံ့ခိုင်မှု မပြည့်ဝတဲ့ အတွက် ချဲလ်ဆီး အသင်းမှာ ပွဲ ကစားခွင့် နည်းပါး နေခဲ့တဲ့ အေဂျက်ဇ် ကစားသမားဟောင်း ဟာကင်မ် ဇီယက်ချ် က ဒွန်နီ ဗန်ဒီ ဘိခ်ကို စိတ်တည်ငြိမ်အောင် ထားရင်း ပွဲကစားခွင့် မိနစ် တွေကို စောင့်ဆိုင်းဖို့ တိုက်တွန်း သွားလိုက်ပြီး ယူနိုက်တက် ပရိသတ် တွေကိုလည်း အရည်အသွေး ကောင်းတွေ သေချာပေါက် မြင်တွေ့ရ လိမ့်မယ် ဆိုတဲ့ အကြောင်း မက်ဆေ့ ပေးပို့ သွားခဲ့လိုက် ပါတယ် ။
” သူ မန်ချက်စတာ ကို ပြောင်းမယ် ဆိုတုန်းက ကျွန်တော် နဲ့ သူဟာ စကားတွေ ပြောဆို ဖြစ်ခဲ့ကြ ပါတယ် ။ ပြီးတော့ ပြီးခဲ့တဲ့ ရက်သတ္တပါတ် ကလည်း စကားပြောဖြစ်ခဲ့ပါ သေးတယ် ။ ကျွန်တော်တို့ စကားတွေ အများကြီးတော့ မပြောဖြစ်ခဲ့ကြ ပါဘူး ။ ကျွန်တော် ကိုယ်တိုင်လည်း သူ့ရဲ့ အနေအထားတွေ ဘယ်လို ရှိနေလဲ ဆိုတာ မမေးလိုက်ရ ပါဘူး ”
” သူဟာ အချိန် လိုလိမ့်မယ်လို့ ကျွန်တော် ထင်ပါတယ် ။ ခင်ဗျားက ခြားနားတဲ့ နိုင်ငံ ၊ ခြားနားတဲ့ ကစားဟန် တစ်ခုကနေ ရောက်လာခဲ့တာပါ ။ ဒါ့ကြောင့် သူလည်း အံဝင် နိုင်ရေး အတွက် အချိန် ပေးရ လိမ့်မယ် ဆိုတာ ကျွန်တော် သေချာပေါက် သိရှိ နေပါတယ် ။ သူဟာ ယူနိုက်တက် အတွက် အရည်အသွေး ကောင်းတွေ သယ်ယူ လာနိုင်လိမ့်မယ်လို့လည်း ကျွန်တော် သေချာပေါက် ပြောနိုင် ပါတယ် ”
” သူ့အတွက် လက်ရှိ အလိုအပ်ဆုံး အရာက စိတ်တည်ငြိမ် နေဖို့ပဲ ၊ အခွင့်အရေး တွေကို စိတ်ရှည်ရှည်ထားပြီး စောင့်ဆိုင်း နေဖို့ပဲလို့ ကျွန်တော် ထင်ပါတယ် ” လို့ ဇီယက်ချ် က ပြောကြား သွားခဲ့လိုက် ပါတယ် ။ လက်ရှိ အချိန်မှာ ဇီယက်ချ် ကိုယ်တိုင်လည်း ချန်ပီယံလိဂ် ပြိုင်ပွဲမှာ အသင်းဖော် ဝါနာ ၊ အိုဒွိုင်း ၊ ပူလီဆစ် ၊ ကိုင်ဟာဗတ် တို့နောက် အရံ ကစားသမား အဖြစ်ပဲ ပါဝင်ခွင့် ရှရှိ ထားခဲ့ပါတယ် ။
