မန်ချက်စတာယူနိုက်တက်အသင်း တိုက်စစ်မှူးဟောင်း ဘာဘာတော့ဗ်က နယ်သာလန်လက်ရွေးစင်ကွင်းလယ်လူ ဗန်ဒယ်ဘိခ်ကို ရောင်းထုတ်ရန် အသင်းကို တိုက်တွန်းခဲ့သည်။
အသက် (၂၄)နှစ်အရွယ်ရှိ ဗန်ဒယ်ဘိခ်သည် ၂၀၂၀ နွေရာသီအပြောင်းအရွှေ့ကာလတွင် အေဂျက်စ်အသင်းမှ ပေါင် (၃၅)သန်းဖြင့် မန်ချက်စတာယူနိုက်တက်အသင်းထံ ပြောင်းရွှေ့လာခဲ့သူဖြစ်သည်။
၎င်းသည် မန်ချက်စတာယူနိုက်တက်အသင်းတွင် ပုံမှန်နေရာရရန် ရုန်းကန်နေရသလို၊ ပါဝင်ကစားခွင့်ရသည့်ပွဲများတွင် ခြေစွမ်းပြနိုင်ခြင်းမရှိသဖြင့် ဘာဘာတော့ဗ်က ယခုကဲ့သို့ ပြောကြားခဲ့ခြင်းဖြစ်သည်။
ဘာဘာတော့ဗ်က “ဗန်ဒယ်ဘိ်ခ်ရဲ့ မန်ချက်စတာယူနိုက်တက်ကစားသမားဘဝက အဆုံးသတ်သွားပြီလို့ ကျွန်တော် ထင်ပါတယ်။ ယန်းဘွိုင်းနဲ့ပွဲမှာ ပွဲထွက်ခွင့်ရခဲ့ပေမဲ့ ပထမပိုင်းမှာပဲ လူစားလဲခံခဲ့ရတယ်။ ဒါက မန်ချက်စတာယူနိုက်တက်အသင်းမှာ သူ့အနေအထားကို ပြလိုက်တာပါပဲ။ သူ ပွဲထွက်ကစားခွင့်ရရင် လူစားလဲခံရတယ်။ လူစားဝင်ကစားရင်လည်း (၁၀)မိနစ်လောက်ပဲ ကစားခွင့်ရတယ်။ ဒါပေမဲ့ ဗန်ဒယ်ဘိခ်ဟာ အခွင့်အရေးရတဲ့အခါမှာလည်း အသုံးချနိုင်ခြင်းမရှိပါဘူး။ ဗန်ဒယ်ဘိခ်အတွက် မန်ချက်စတာယူနိုက်တက်အသင်း အသုံးပြုခဲ့ရတဲ့ ငွေကြေးတွေက နှမြောစရာပါ။ မန်ချက်စတာယူနိုက်တက်အသင်းအနေနဲ့ ဗန်ဒယ်ဘိခ်ကို အရှုံးခံပြီး ဖြစ်နိုင်ရင် ရောင်းထုတ်သင့်ပါတယ်”ဟု ပြောကြားခဲ့သည်။
ဗန်ဒယ်ဘိခ်သည် မန်ချက်စတာယူနိုက်တက်အသင်းတွင် တစ်ရာသီကျော်ကာလအတွင်း ပြိုင်ပွဲစုံ (၃၈)ပွဲတွင် (၁)ဂိုးသာ သွင်းယူထားသည်။
