မန်ယူတိုက်စစ်မှူး မာစီယဲလ်သည် ဖူလ်ဟမ်နှင့်ပွဲတွင် ရရှိခဲ့သည့် တံကောက်ကြောဒဏ်ရာကြောင့် ဇွန်လ (၃) ရက်(စနေနေ့)ကစားမည့် မန်စီးတီးနှင့် FA ဖလားဗိုလ်လုပွဲကို လွဲချော်မည်ဖြစ်ကြောင်း သိရှိရသည်။
မေလ (၂၈) ရက်က ကစားခဲ့သည့် ပရီးမီးယားလိဂ်ရာသီပိတ်ပွဲစဉ် မန်ယူ (၂-၁) ဖူလ်ဟမ်ပွဲ၌ မန်ယူ တိုက်စစ်မှူး မာစီယဲလ်သည် ပွဲချိန် (၆၇)မိနစ်တွင်မှ ဂါနာချိုအစား လူစားဝင်ကစားခဲ့သည်။
သို့သော် ၎င်းသည် အဆိုပါပွဲစဉ်တွင် တံကောက်ကြောဒဏ်ရာရရှိခဲ့ခြင်းကြောင့် စနေနေ့တွင် မန်ချက်စတာမြို့ခံပြိုင်ဘက် မန်စီးတီးအသင်းနှင့်ကစားမည့် FA ဖလား ဗိုလ်လုပွဲကို လွဲချော်မည်ဖြစ်ကြောင်း မန်ယူအသင်းက ထုတ်ပြန်ခဲ့သည်။
မန်ယူအသင်း၏ ထုတ်ပြန်ချက်တွင် “အန်သိုနီမာစီယဲလ်သည် စနေနေ့ ကစားမည့် မန်စီးတီးနှင့် FA ဖ လားဗိုလ်လုပွဲကို ဒဏ်ရာကြောင့် လွဲချော်မည်ဖြစ်ကြောင်း၊ ပြင်သစ်လက်ရွေးစင်ကစားသမားသည် ပြီးခဲ့သည့်တနင်္ဂနွေနေ့က အိုးလ်ထရက်ဖို့ဒ်တွင် ဖူလ်ဟမ်အသင်းကို (၂-၁)ဂိုးဖြင့် အနိုင်ရသည့် ပွဲ၌ တံကောက်ကြောဒဏ်ရာ ရရှိခဲ့ကြောင်း” ဖော်ပြပါရှိသည်။
မာစီယဲလ်(၂၇ နှစ်)သည် ယခုရာသီတွင် မန်ယူအတွက် ပြိုင်ပွဲစုံ(၂၉) ပွဲတွင် (၉)ဂိုးသွင်းကာ ဂိုးဖန်တီးမှု(၃) ကြိမ် ပြုလုပ်ထားသည်။ FA ဖလား ဗိုလ်လုပွဲကို ဝင်ဘလေကွင်းတွင် က စားမည်ဖြစ်ကြောင်း သိရသည်။
