ရီးယဲလ်မက်ဒရစ်တောင်ပံကစားသမား ဗင်နီစီယပ်စ်က မိမိတို့အသင်းအနေဖြင့် လာမည့်ရာသီသစ်တွင် ယှဉ်ပြိုင်မည့်ပြိုင်ပွဲတိုင်း၌အနိုင်ရရှိရန် ကြိုးပမ်းသွားမည်ဖြစ်ကြောင်း ဖရန့်ဖတ်အသင်းနှင့် ယှဉ်ပြိုင်ကစားမည့် ဥရောပစူပါဖလားပွဲစဉ်မတိုင်မီ ကြုံးဝါးပြောဆိုခဲ့ကြောင်း သိရသည်။
ရီးယဲလ်မက်ဒရစ်အသင်းသည် ၂၀၂၂-၂၃ ဘောလုံးရာသီ၏ ပထမဆုံးပွဲစဉ်အဖြစ် လာမည့် သြဂုတ် (၁၁) နေ့တွင် ပြီးခဲ့သည့်ရာသီ ယူရိုပါလိဂ်ချန်ပီယံ ဂျာမန်ကလပ် ဖရန့်ဖတ်အသင်းနှင့် ဥရောပစူပါဖလားပွဲစဉ်ကို ဖင်လန်နိုင်ငံ၊ ဖရန့်ဖတ်မြို့တွင် ယှဉ်ပြိုင်ကစားရမည်ဖြစ်သည်။
ယင်းပွဲနှင့် ပတ်သက်ပြီး ဗင်နီစီယပ်စ်က မိမိတို့ အနေဖြင့် လာမည့်ရာသီတွင်ပြိုင်ပွဲတိုင်း၊ ဆုဖလားတိုင်းကို အနိုင်ရရှိရန် ကြိုးပမ်းသွားမည်ဖြစ်ကြောင်းနှင့် ဥရောပစူပါဖလားပွဲစဉ်မှာလည်း အရေးပါသည့် ပွဲစဉ်တစ်ခုဖြစ်ကြောင်း ပြောကြားခဲ့ခြင်းဖြစ်သည်။
ဗင်နီစီယပ်စ်က ”ပြိုင်ပွဲတိုင်းကို အနိုင်ရဖို့ ကြိုးစားရတာဟာ အလွန်ခက်ခဲတဲ့အရာပါ။ အထူးသဖြင့် ဥရောပစူပါဖလားလို အရေးပါတဲ့ပွဲစဉ်မှာ အနိုင်ရချင်ရင်ပေါ့။ ကျွန်တော်တို့အနေနဲ့တော့ ပြိုင်ပွဲတိုင်းကို အနိုင်ရဖို့ ကြိုးပမ်းသွားမှာပါ” ဟု ပြောကြားခဲ့သည်။
ရီးယဲလ်အသင်းသည် ပြီးခဲ့သည့်ရာသီက ချန်ပီယံလိဂ်နှင့် လာလီဂါချန်ပီယံဆုဖလားတို့ကို ရယူနိုင်ခဲ့ပြီး လက်ရှိ ၂၀၂၂-၂၃ ရာသီတွင် လာလီဂါ၊ ချန်ပီယံလိဂ်၊ စပိန်ဘုရင့်ဖလား၊ စပိန်စူပါဖလား၊ ဥရောပစူပါဖလားနှင့် ကလပ်ကမ္ဘာ့ဖလား အစရှိသည့် ပြိုင်ပွဲ (၆)ခုကို ယှဉ်ပြိုင်ရမည် ဖြစ်သည်။
ဗင်နီစီယပ်စ်သည် ပြီးခဲ့သည့်ရာသီက ရီးယဲလ်အသင်းအတွက် ခြေစွမ်းပြခဲ့သူဖြစ်ပြီး ပြိုင်ပွဲစုံ (၅၂)ပွဲကစားရာတွင် သွင်းဂိုး (၂၂) ဂိုးနှင့် ဂိုးဖန်တီးမှု (၂၁)ကြိမ်ပြုလုပ်ပေးခဲ့သည်။
