ယူရိုပြိုင်ပွဲ၏ လက်ရှိချန်ပီယံ ပေါ်တူဂီအသင်းသည် ဘယ်လ်ဂျီယံအသင်းကို ရှုံးနိမ့်ပြီး ပြိုင်ပွဲမှ ထွက်ခွာခဲ့ရသောကြောင့် ယူရိုပြိုင်ပွဲနှစ်ကြိမ်ဆက် လက်ရှိချန်ပီယံအသင်းများ ရှုံးထွက်(၁၆)သင်းအဆင့်မှ ထွက်ရသည့်အခြေအနေ ဖြစ်ခဲ့သည်။
ပြီးခဲ့သည့် ယူရို-၂၀၁၆ ပြိုင်ပွဲတွင်လည်း လက်ရှိချန်ပီယံ စပိန်အသင်းမှာ ရှုံးထွက်(၁၆)သင်းအဆင့်တွင် အီတလီအသင်းကို ရှုံးနိမ့်ကာ ပြိုင်ပွဲမှ ထွက်ခဲ့ရခြင်းဖြစ်သည်။
ယခုတစ်ကြိမ် လက်ရှိချန်ပီယံ ပေါ်တူဂီအသင်း၏ ကျရှုံးမှုတွင်မူ ဆိုးရွားသည့် မှတ်တမ်းတစ်ခုလည်း ရှိခဲ့သည်။
ပေါ်တူဂီအသင်းသည် ယခုပြိုင်ပွဲ၌ နိုင်ပွဲတစ်ပွဲသာ ရရှိခဲ့သည့်အတွက် ၎င်းတို့ ယှဉ်ပြိုင်ခဲ့သည့် ယူရိုပြိုင်ပွဲသမိုင်းတစ်လျှောက် ယူရို-၁၉၈၄ နောက်ပိုင်း နိုင်ပွဲအနည်းဆုံးပြိုင်ပွဲအဖြစ် မှတ်တမ်းဝင်သွားခဲ့ခြင်းဖြစ်သည်။
ပေါ်တူဂီအသင်းသည် ယူရို-၁၉၈၄ ပြိုင်ပွဲတွင် ပထမဆုံးအကြိမ် ယှဉ်ပြိုင်ခွင့်ရရှိခြင်းဖြစ်ပြီး နိုင်ပွဲ(၁)ပွဲသာ ရရှိခဲ့သော်လည်း ယင်းအချိန်က ပြိုင်ပွဲပုံစံအရ ဆီမီးဖိုင်နယ်အဆင့်သို့ ရောက်ရှိခဲ့သည်။
ယင်းနောက်ပိုင်းတွင် ယူရို-၁၉၈၈ နှင့် ယူရို-၁၉၉၂ ပြိုင်ပွဲများ၌ ခြေစစ်ပွဲမအောင်မြင်ခဲ့ဘဲ ယူရို-၁၉၉၆ မှ လက်ရှိအချိန်အထိ တောက်လျှောက်ယှဉ်ပြိုင်ခွင့်ရရှိခဲ့သည်။
