ပေါ့ဘာအား ပြောင်းရွှေ့ကြေးအလွတ်ဖြင့် ခေါ်ယူလိုသည့်အသင်းများထဲတွင် ချယ်လ်ဆီး ပါဝင်လာ

ချယ်လ်ဆီးအသင်းသည် မန်ယူအသင်း၏ ပြင်သစ်လက်ရွေးစင်ကွင်းလယ်လူ ပေါ့ဘာအား ခေါ်ယူလိုသည့် အသင်းများထဲတွင် ပါဝင်လာခဲ့ပြီး အလွတ်ပြောင်းရွှေ့ကြေးဖြင့် ခေါ်ယူခွင့်ရရှိမည်ဖြစ်ကြောင်း သိရှိရသည်။

ပေါ့ဘာသည် ယခုရာသီကုန်တွင် မန်ယူအသင်းနှင့် စာချုပ်သက်တမ်းကုန်ဆုံးတော့မည့် ကစားသမားဖြစ်ပြီး ၎င်းအား ရီးယဲလ်မက်ဒရစ်၊ PSG၊ ဂျူဗင်တပ်စ် စသည့်အသင်းများကလည်း ခေါ်ယူရန်စိတ်ဝင်စားလျက်ရှိသည်။

ချယ်လ်ဆီးအသင်းသည် မန်ယူအသင်းကို မော်ရင်ဟိုနည်းပြခဲ့သည့် ၂၀၁၄ ခုနှစ်က ပေါ့ဘာအား ခေါ်ယူရန် စဉ်းစားခဲ့ဖူးပြီး ထိုအချိန်ကမူ တရားဝင်ကမ်းလှမ်းခဲ့ခြင်းမရှိခဲ့ချေ။

ယခုအချိန်တွင် ချယ်လ်ဆီးအသင်း၏ ဘဏ္ဍာရေးအခြေအနေအရလည်းကောင်း၊ အလွတ်ပြောင်းရွှေ့ကြေးဖြင့် ခေါ်ယူခွင့် ရမည့် အခြေအနေကြောင့်လည်းကောင်း ခေါ်ယူရန်စိတ်ဝင်စားနေခြင်းလည်းဖြစ်သည်။

ချယ်လ်ဆီးအသင်း၏ ကွင်းလယ်လူဖြစ်သည့် ဂျော်ဂျင်ဟိုသည် အသင်းမှ ထွက်ခွာရန် စဉ်းစားလျက်ရှိသည့်အတွက်လည်း ၎င်းနေရာတွင် ပြန်လည်အစားထိုးရန်အတွက် ပေါ့ဘာကို ခေါ်ယူလိုနေခြင်းဖြစ်သည်။

ဂျော်ဂျင်ဟိုသည် နောက်ပိုင်းပွဲစဉ်များတွင် ချယ်လ်ဆီးအသင်းတွင် ပုံမှန်နေရာမရဖြစ်နေသည့်အပြင် ၎င်းကိုယ်တိုင်ကလည်း အီတလီတွင် ပြန်လည်သွားရောက် ကစားရန် ဆန္ဒရှိနေခြင်းဖြစ်ပြီး ဂျော်ဂျင်ဟိုအား စီးရီးအေအသင်းအတော်များများက ခေါ်ယူရန်စိတ်ဝင်စားလျက်ရှိသည်။

ဂျော်ဂျင်ဟိုအား ခေါ်ယူလိုသည့် အသင်းများထဲတွင် အေစီမီလန်အသင်းအပြင် အသင်းဟောင်း နာပိုလီနှင့် ၎င်းနှင့် လက်တွဲခဲ့ဖူးသည့် ဆာရီ၏ လာဇီိယိုအသင်းတို့လည်း ပါဝင်လျက်ရှိသည်။

ဂျူဗင်တပ်စ်အသင်းကလည်း ပေါ့ဘာနှင့် ဂျော်ဂျင်ဟိုတစ်ဦးဦးကို ခေါ်ယူလိုနေကြောင်း အီတလီမီဒီယာများက ဖော်ပြလျက်ရှိသည်။