အာဆင်နယ်အသင်းသည် ဝက်စ်ဟမ်းအသင်း၏ အင်္ဂလန်ကွင်းလယ်ကြယ်ပွင့် ဒက်ကလန်ရိုက်စ်အတွက် ပေါင် (၁၀၅) သန်း အကုန်အကျခံ ခေါ်ယူထားပြီး ဒက်ကလန်ရိုက်စ်ကလည်း အကောင်းဆုံးပုံစံပြနေသည့်တိုင် ၎င်းတို့ရောင်းထုတ်ခဲ့သည့် ချာကာက ပိုမိုကောင်းမွန်သည့် မှတ်တမ်းများကို ပြသလျက်ရှိနေကြောင်းသိရသည်။
အာဆင်နယ်အသင်းသည် အသင်း၏ ဆွစ်ဇာလန်လက်ရွေးစင်ကွင်းလယ်လူဖြစ်သည့် ဂရာနစ်ချာကာအား လေဗာကူဆင်အသင်းထံသို့ ပေါင် (၂၁.၅) သန်းဖြင့် ရောင်းထုတ်ခဲ့ခြင်းဖြစ်ပြီး ချာကာသည် ဇာဘီအလွန်ဆို၏ လေဗာကူဆင်အသင်းတွင် အကောင်းဆုံးပုံစံကို ပြသလျက်ရှိသည်။
လေဗာကူဆင်အသင်းသည် လက်ရှိအချိန်တွင် ဘွန်ဒစ်လီဂါအမှတ်ပေးဇယားထိပ်ဆုံးတွင် ရပ်တည်နေပြီး ချာကာကလည်း အသင်း၏ ယခုရာသီ ဘွန်ဒစ်လီဂါ ပွဲစဉ် (၁၁) ပွဲစလုံးတွင် ပါဝင်ကစားထားသည်။
ဒက်ကလန်ရိုက်စ်သည် ယခု ရာသီတွင် အာဆင်နယ်အသင်းအတွက် တစ်ပွဲပျမ်းမျှ (၈၅) မိနစ် ကစားထားချိန်တွင် ချာကာက (၈၈) မိနစ်အထိ ကစားထားသလို နိုင်ပွဲရာခိုင်နှုန်းအနေဖြင့်လည်း ဒက်ကလန်ရိုက်စ် ကစားသည့်ပွဲများတွင် ရရှိသည့် နိုင်ပွဲရာခိုင်နှုန်း (၆၇)ရာခိုင်နှုန်းထက် ချာကာ၏ (၉၁) ရာခိုင်နှုန်းက ပိုကောင်းသလို ပေးပို့မှုမှတ်တမ်းများတွင်လည်း ချာကာက အပြတ်အသတ်သာလွန်လျက်ရှိသည်။
