ဝက်စ်ဟမ်းအသင်းသည် လိုင်ယွန်အသင်းမှ ဘရာဇီးလ်ကွင်းလယ်တိုက်စစ်ကစားသမား ပါကေတာကို ကလပ်စံချိန်တင်ပြောင်းရွှေ့ ကြေး ယူရိုသန်း(၆၀)ဖြင့် ခေါ်ယူလိုက်ကြောင်း သိရသည်။
ဝက်စ်ဟမ်းအသင်းသည် ပါကေတာ(၂၅ နှစ်)ကို Add-ons ကြေးအပါအဝင် ယူရိုသန်း (၆၀)ဖြင့် ခေါ်ယူခဲ့ခြင်းဖြစ်ပြီး (၅)နှစ်စာချုပ် ချုပ်ဆိုခဲ့သည်။
ပါကေတာကို ခေါ်ယူရန် နွေရာသီအစောပိုင်းကာလများတွင် အာဆင်နယ်အသင်းကလည်း စိတ်ဝင်စားခဲ့ပြီးမှ နောက်ဆုတ်သွားခဲ့ခြင်းဖြစ်ပြီး ယခုအခါ ဝက်စ်ဟမ်းအသင်းက ခေါ်ယူနိုင်ခဲ့ခြင်းဖြစ်သည်။
ပါကေတာက ”ဒါဟာ ကျွန်တော့်အတွက် ပျော်ရွှင်စရာခရီးစဉ် စတင်ခြင်းဖြစ်လိမ့်မယ်လို့ မျှော်လင့်ပါတယ်။ ဝက်စ်ဟမ်းအသင်းရဲ့ ဝတ်စုံကို ဝတ်ဆင်ရတဲ့အတွက် စိတ်လှုပ်ရှားမိပါတယ်။ ပြီးတော့ အသင်းနဲ့ အသင်းဖော်တွေကို ကူညီပေးဖို့ ကျွန်တော် ဘာတွေလုပ်နိုင်တယ်ဆိုတာ ပြသသွားချင်ပါတယ်” ဟု ပြောကြားခဲ့သည်။
ဝက်စ်ဟမ်းအသင်း၏နည်းပြ ဒေးဗစ်မွိုက်စ်ကလည်း ”တခြားလိဂ်ပြိုင်ပွဲတစ်ခုမှာ ခြေစွမ်းပြထားတဲ့ ကစားသမားတစ်ယောက်ကို အားဖြည့်နိုင်ခဲ့တဲ့အတွက် စိတ်လှုပ်ရှားမိပါတယ်။ အသားကျဖို့တော့ အချိန်ယူရပါလိမ့်မယ်”ဟု ပြောကြားခဲ့သည်။
ဝက်စ်ဟမ်းအသင်းသည် ယခုနွေရာသီတွင် ကစားသမားသစ်များစွာ ခေါ်ယူအားဖြည့်ထားရာ ယခု ပါကေတာအထိ စုစုပေါင်း ယူရို သန်း(၂၀၀)ဝန်းကျင် သုံးစွဲထားပြီဖြစ်ကြောင်း သိရသည်။
