မန်စီးတီးနည်းပြ ဂွါဒီယိုလာသည် ပရီးမီးယားလိဂ်ပြိုင်ပွဲတွင် နှစ်ပွဲဆက်တိုက် နောက်မှလိုက်ကစားခဲ့ရသည့်အတွက် ကစားသမားများကို သတိပေးခဲ့ကြောင်း သိရသည်။
မန်စီးတီးအသင်းသည် ပြီးခဲ့သည့် တစ်ပတ်က နယူးကာဆယ်အသင်းနှင့် (၃-၃)ဂိုးဖြင့် သရေကျခဲ့သည့်ပွဲတွင် (၁-၃)ဂိုးဖြင့် ရှုံးနိမ့်နေသည့် အနေအထားမှ ချေပဂိုး(၂)ဂိုးပြန်သွင်းကာ တစ်မှတ် ရယူနိုင်ခဲ့ခြင်းဖြစ်သည်။
ယခုတစ်ပတ်တွင်လည်း ခရစ္စတယ်ပဲလေ့စ်အသင်းကို (ဝ-၂)ဂိုးဖြင့် ရှုံးနိမ့်နေခဲ့ပြီးမှ (၄)ဂိုးပြန်သွင်းကာ အနိုင်ရခဲ့ခြင်းဖြစ်သည်။ ထို့ကြောင့် ဂွါဒီယိုလာက မန်စီးတီးကစားသမားများအနေဖြင့် စွန့်စားလွန်းရာကျနေပြီး အရှုံးမှ ပြန်လာနိုင်မည်ဟု အမြဲတွက်ထား၍ မရနိုင်ကြောင်း သတိပေးခဲ့ ခြင်းဖြစ်သည်။
ဂွါဒီယိုလာက “လက်ရှိ ကျွန်တော်တို့ ရင်ဆိုင်နေရတဲ့ ပြဿနာက ဂိုးတွေအများကြီးပေးနေရတာပါပဲ။ ကျွန်တော်တို့ စွန့်စားမှုတွေအများကြီးနဲ့ ကစားနေတာဖြစ်ပြီး တစ်နေ့မှာ ပြန်မလာနိုင်ဘဲ ဖြစ်သွားနိုင်ပါတယ်။ ဒီနေ့(ပဲလေ့စ်နှင့်ပွဲ) ကျွန်တော်တို့ ကံကောင်းလို့ ပြန်လာနိုင်တာပါ။ ဒီနိုင်ပွဲကနေ သင်ခန်းစာယူနိုင်ဖို့ အရေးကြီးပါတယ်” ဟု ပြောကြားခဲ့သည်။
ဂွါဒီယိုလာက တိုက်စစ်မှူး ဟော်လန်းကိုမူ ချီးကျူးခဲ့ပြီး ၎င်းလို အရည်အသွေးရှိသည့်ကစားသမား ဟက်ထရစ်သွင်းယူနိုင်ခြင်းမှာ အံ့အားသင့်စရာမရှိဟု ပြောကြားခဲ့သည်။
