ရီးယဲလ်မက်ဒရစ်အသင်း၏ ဘယ်လ်ဂျီယံလက်ရွေးစင်တောင်ပံကစားသမား ဟာဇက် (၃၀ နှစ်)သည် အလာဗတ်စ်အသင်းအား (၄-၁)ဂိုးဖြင့်အနိုင်ရသော လာလီဂါပွဲစဉ် တွင် ပွဲစဉ်အလိုက် အကောင်းဆုံးကစားသမားဆု (Man of the Match)ကိုရရှိခဲ့ပြီးနောက် နောက်ဆုံး (၁၁)ရာသီအတွင်း Man of the Match ဆုအကြိမ် (၁၀၀)ပြည့်သည့် တတိယမြောက်ကစားသမားအဖြစ် မှတ်တမ်းဝင်ခဲ့ကြောင်း သိရသည်။
၂၀၀၉-၁၀ ဘောလုံးရာသီမှ စတင်ရေတွက်ပါက ဥရောပထိပ်တန်းလိဂ် (၅)ခုတွင် ကလပ်နှင့် လက်ရွေးစင်အသင်းအတွက် Man of the Match ဆုကို အကြိမ် (၁၀၀)နှင့်အထက်ရရှိဖူးသူမှာ ဟာဇက်မတိုင်မီ (၂)ဦးသာရှိခဲ့ပြီး ဘာစီလိုနာနှင့် အာဂျင်တီးနားတိုက်စစ်မှူး မက်ဆီ (၂၈၈ ပွဲ)နှင့် ဂျူဗင်တပ်စ်အသင်း၏ပေါ်တူဂီတိုက်စစ်မှူး စီရော်နယ်လ်ဒို (၁၆၀ ပွဲ)တို့ဖြစ်သည်။ ဟာဇက်သည် အလာဗတ်စ်အသင်းနှင့်ပွဲတွင် အသင်းအတွက် သွင်းဂိုး (၁)ဂိုးနှင့် ဂိုးဖန်တီးမှု (၁)ကြိမ်ပြုလုပ်နိုင်ခဲ့ပြီး ဘန်ဇီမာနှင့် တွဲဖက်ကာ အသင်း၏တိုက်စစ်ကိုလည်း ဦးဆောင်ကစား ပေးနိုင်ခဲ့သည်။ ဟာဇက်အနေဖြင့် ရီးယဲလ်ကစားသမား ဘဝတွင် ယခုကဲ့သို့ ပွဲစဉ်တစ်ပွဲအတွင်း သွင်းဂိုးနှင့်ဂိုးဖန် တီးမှှုပြုလုပ်နိုင်သည်မှာ ဒုတိယအကြိမ်မြောက်ဖြစ်ပြီး ၂၀၁၉ ခုနှစ် အောက်တိုဘာလအတွင်း ယှဉ်ပြိုင်ခဲ့သည့် ဂရန်နာဒါအသင်းနှင့်ပွဲတွင်လည်း ယင်းကဲ့သို့ စွမ်းဆောင် နိုင်ခဲ့ခြင်းဖြစ်သည်။
ဟာဇက်သည် ၂၀၁၉ နွေရာသီအပြောင်းအရွှေ့က ချယ်လ်ဆီးအသင်းမှ ရီးယဲလ်အသင်းသို့ ယူရိုသန်း (၁၀၀) ဖြင့် ပြောင်းရွှေ့လာခဲ့သူဖြစ်ပြီး အဝလွန်ခြင်းများ၊ ဒဏ်ရာ ပြဿနာများနှင့်အတူ ခြေစွမ်းပြရန် ရုန်းကန်နေရသူဖြစ် သည်။ ဟာဇက်သည် ကစားသမားဘဝတွင် လိုင်လီအသင်းနှင့် Man of the Match (၂၁)ကြိမ်၊ ချယ်လ်ဆီးအသင်းနှင့် (၆၉)ကြိမ်၊ ဘယ်လ်ဂျီယံလက်ရွေးစင်အသင်းနှင့် (၇)ကြိမ်ရရှိခဲ့ပြီး ရီးယဲလ်အသင်းတွင်မူ ယခုတစ်ကြိမ်
အပါအဝင် (၃)ကြိမ် ရယူနိုင်ခဲ့ခြင်းဖြစ်သည်။
ဟာဇက်၏ စွမ်းဆောင်ရည်နှင့်ပတ်သက်ပြီး ရီးယဲလ်အသင်းလက်ထောက်နည်းပြ ဒေးဗစ်ဘတ်တိုနီက ”အီဒင်(ဟာဇက်)ရဲ့ မက်ဒရစ်ပထမရာသီနဲ့ ဒီရာသီရာသီဝက်ဟာ ဒဏ်ရာပြဿနာတွေနဲ့ ခက်ခဲခဲ့ပါတယ်။ ရီးယဲလ်မက်ဒစ်မှာကစားရတာဟာ ခက်ခဲပြီး ကျွန်တော်တို့အနေနဲ့ စိတ်ရှည်ပေးရပါမယ်။ အီဒင်အနေနဲ့ တစ်ပွဲထက်တစ်ပွဲ ပိုမိုကောင်းမွန်အောင် ကြိုးစားနေပါတယ်”ဟု ပြောကြားခဲ့သည်။ ဟာဇက်သည် ရီးယဲလ်မက်ဒရစ်အသင်းအတွက် (၂)ရာသီအတွင်း ပြိုင်ပွဲစုံ (၃၄)ပွဲသာ ကစားခွင့်ရသေးပြီး (၄)ဂိုးသာ သွင်းယူထားနိုင်သလို၊ ယခုရာသီတွင်လည်း အသင်းအတွက် ပြိုင်ပွဲစုံ (၁၂)ပွဲကစားရာတွင် (၃)ဂိုးသာ သွင်းယူထားနိုင်ခဲ့သည်။
