ရုရှားဘောလုံးအဖွဲ့ချုပ်သည် FIFA နှင့် UEFA တို့၏ ပိတ်ပင်မှုများအတွက် နိုင်ငံတကာ အားကစားခုံရုံး(CAS)ထံ အယူခံဝင်ရန် စီစဉ်နေကြောင်း သိရသည်။
ကမ္ဘာ့ဘောလုံးအဖွဲ့ချုပ်(FIFA)နှင့် ဥရောပဘောလုံးအဖွဲ့ချုပ်(UEFA)တို့သည် ယူကရိန်းနိုင်ငံအပေါ် ရုရှားနိုင်ငံ၏ ကျူးကျော်တိုက်ခိုက်မှုကြောင့် ရုရှားကလပ်အသင်းများနှင့် လက်ရွေးစင်အသင်းအားလုံးကို ပြိုင်ပွဲယှဉ်ပြိုင်ခွင့် ပိတ်ပင်ခဲ့သည်။
ယင်းအတွက် ရုရှားဘောလုံးအဖွဲ့ချုပ်က နိုင်ငံတကာအားကစားခုံရုံးထံ အယူခံဝင်ရန် စီစဉ်ခြင်းဖြစ်ကြောင်း သိရသည်။
ရုရှားဘောလုံးအဖွဲ့ချုပ်က FIFA နှင့် UEFA တို့၏ ဆုံးဖြတ်ချက်မှာ အားကစားလောက၏ တရားမျှတမှုစည်းမျဉ်းကို ချိုးဖောက်ခြင်းဖြစ်သည်ဟုလည်း ဆိုခဲ့သည်။
ရုရှားနိုင်ငံသည် ၂၀၁၈ ကမ္ဘာ့ဖလားပြိုင်ပွဲကို အိမ်ရှင်အဖြစ် လက်ခံကျင်းပခဲ့သည့် နိုင်ငံဖြစ်ပြီး ၂၀၂၂ ကမ္ဘာ့ဖလားပြိုင်ပွဲအတွက် ခြေစစ်ပွဲ Play-off အဆင့် ယှဉ်ပြိုင်ကစားရမည်ဖြစ်သော်လည်း FIFA နှင့် UEFA တို့၏ပိတ်ပင်မှုကြောင့် ယှဉ်ပြိုင်ခွင့် ရရှိတော့မည် မဟုတ်ပေ။
အယူခံဝင်မည့် အစီအစဉ်နှင့်ပတ်သက်၍ ရုရှားဘောလုံးအဖွဲ့ချုပ်က ကြေညာချက်ထုတ်ပြန်ခဲ့ရာတွင် ”လက်ရွေးစင်အမျိုးသားအသင်းနှင့် အမျိုးသမီးအသင်းများအနေဖြင့် မူလအတိုင်း ပြန်လည်ယှဉ်ပြိုင်ခွင့်ရရှိရန် တောင်းဆိုသွားမည်ဖြစ်ကြောင်း၊ အခွင့်အရေးပြန်ရမည်ဟု ယုံကြည်ကြောင်း” ပါရှိခဲ့သည်။
