ရီးယဲလ်မက်ဒရစ်အသင်းနည်းပြဇီဒန်းက လက်ရှိတွင်အသင်း၌ အဓိကကစားသမားများ ဒဏ်ရာပြဿနာကြုံတွေ့နေသည်ကို ကြိုက်နှစ်သက်ခြင်းမရှိသော်လည်း မိမိ၏အသင်းအတွက် စိုးရိမ်ပူပန်ခြင်းမရှိကြောင်း ပြောကြားခဲ့ သည်။
ပြီးခဲ့သည့်သောကြာနေ့က ပြုလုပ်ခဲ့သော အသင်း၏လေ့ကျင့်ခန်းအစီအစဉ်တွင် ညာနောက်ခံလူ ကာဗာဟယ်လ်မှာ ပြင်းထန်သည့် ဒူးဒဏ်ရာရရှိခဲ့ပြီး (၂)လခန့်အနားယူရမည်ဖြစ်ကြောင်း အသင်းမှ တရားဝင်ထုတ်ပြန်ခဲ့သည်။ ထို့နောက် ဆက်တိုက်ဆိုသလိုပင် အခြားညာနောက်ခံလူတစ်ဦးဖြစ်သည့် အော်ဒရီယိုဇိုလာမှာလည်း ခြေသလုံးဒဏ်ရာကြောင့် အနည်းဆုံး (၂) ပတ်မှ (၃)ပတ်ခန့်အထိ အနားယူရမည်ဖြစ်ရာ ရီးယဲလ်မက်ဒရစ်အသင်းအနေဖြင့် လီဗန်တေးအသင်းအား (၂-၀)ဂိုးဖြင့် အနိုင်ရသည့်ပွဲတွင် အသင်း၏ ညာနောက်ခံနေရာ၌ နာချိုကိုထည့် သွင်းကစားခဲ့ရသည်။
ရီးယဲလ်မက်ဒရစ်အသင်းအနေဖြင့် အစောပိုင်းတွင် အသင်း၌ဒဏ်ရာပြဿနာများနှင့် ရုန်းကန်နေရသည့် တောင်ပံကစားသမား ဟာဇက်မှာ ကြွက်သားဒဏ်ရာကြောင့် တစ်လခန့် ထပ်မံအနားယူခဲ့ရသလို၊ အဓိကကွင်းလယ်လူတစ်ဦးဖြစ်သည့် တိုနီကရို့စ်မှာလည်း ကြွက်သားဒဏ်ရာကြောင့်ပင် အနည်းဆုံးအောက်တိုဘာလလယ်အထိ အနားယူရဖွယ်ရှိနေသည်။ ထို့ပြင် မီလီတိုနှင့် မာရီယာနိုဒီယက်ဇ်တို့မှာလည်း ဒဏ်ရာပြဿနာများကြောင့် အောက်တိုဘာလကုန်ပိုင်းအထိ အနားယူရဖွယ်ရှိရာ ဇီဒန်းအနေဖြင့် အသင်း၏လူထုတ်ပုံနှင့်ပတ်သက်ပြီး အခက်တွေ့ဖွယ်ရှိနေကြောင်း စပိန်မီဒီယာများက သုံးသပ်ဖော်ပြခဲ့ ကြသည်။
လက်ရှိဒဏ်ရာအခြေအနေများနှင့်ပတ်သက်ပြီး ဇီဒန်းက ” ဒဏ်ရာပြဿနာတွေများတာကို ကျွန်တော့်အနေနဲ့ ကြိုက်နှစ်သက်ခြင်းမရှိပေမယ့် ဒီပြဿနာနဲ့ပတ်သက်လို့တော့ စိုးရိမ်ပူပန်မှုမရှိပါဘူး။ ဒဏ်ရာရရှိတဲ့ကစားသမားတွေအတွက် ကျွန်တော့်အနေနဲ့ ဝမ်းနည်းရပါတယ်။ ဒါပေမဲ့ ကျွန်တော်တို့ဟာ ရှေ့ဆက်သွားနေရမှာပါ”ဟု ပြောကြားခဲ့သည်။ ထို့ပြင် ဇီဒန်းက လက်ရှိသတင်းများထွက်ပေါ်နေသော လိုင်ယွန်ကွင်းလယ်လူ အာဝါ၏ အပြောင်းအရွှေ့နှင့်ပတ်သက်၍လည်း ”အာဝါဟာ အရည်အသွေးမြင့်ကစားသမားတစ်ဦးပါ။ ခင်ဗျားတို့ဆီမှာ သူနဲ့ပတ်သက်ပြီး ဘယ်လိုအချက်အလက်တွေရှိနေလဲဆိုတာ ကျွန်တော် မသိပါဘူး။ တစ်နေ့မှာ သူ့(အာဝါ)အနေနဲ့ ရီးယဲလ်မက်ဒရစ်အသင်းမှာ ကစားနိုင်ပါတယ်။ ဒါပေမဲ့ လက်ရှိအချိန်မှာတော့ ကျွန်တော့်အနေနဲ့ အသင်းရဲ့အစုအဖွဲ့အကြောင်းကိုပဲ တွေးထားပြီး ဒီအစုအဖွဲ့နဲ့ ဆက်သွားဖို့ပဲစဉ်းစားထားပါတယ်”ဟု ဆိုခဲ့သည်။
