ချယ်လ်ဆီးတိုက်စစ်ကစားသမားများသည် အသင်းနည်းပြ တူဟယ်လ်၏ ပြောဆိုဆက်ဆံပုံများကြောင့် မပျော်မရွှင်ဖြစ်နေကြကြောင်း The Athletic က ဖော်ပြခဲ့သည်။
ဂျာမန်လူမျိုးနည်းပြ တူဟယ်လ်သည် ဇန်နဝါရီ (၂၆)ရက်က ချယ်လ်ဆီးနည်းပြဘဝ တစ်နှစ်ပြည့်မြောက်ခဲ့ပြီး ၂၀၂၁ FIFA အကောင်းဆုံးနည်းပြဆုကိုလည်း ရရှိထားသည်။
သို့သော် ချယ်လ်ဆီးအသင်းသည် ကွင်းအတွင်း ရုန်းကန်နေရပြီး ပရီးမီးယားလိဂ်နောက်ဆုံး (၈)ပွဲတွင် (၂)ပွဲသာ အနိုင်ရခဲ့သည်။
ချယ်လ်ဆီးအသင်းတိုက်စစ်မှူး လူကာကူသည် ဒီဇင်ဘာလက ပြုလုပ်ခဲ့သည့် Sky Italia နှင့်ပြုလုပ်သည့် အင်တာဗျူးတွင် တူဟယ်လ်၏ နည်းဗျူဟာပိုင်းကို မေးခွန်းထုတ်ခဲ့ပြီးနောက် ချယ်လ်ဆီးအသင်းမှာ ရလဒ်များ ကျဆင်းခဲ့ခြင်းဖြစ်သည်။
The Athletic ၏ဖော်ပြမှုအရ ချယ်လ်ဆီးအသင်းတွင် လူကာကူတစ်ဦးတည်းသာမက တိုက်စစ်ကစားသမားများသည် တူဟယ်လ်၏ ပြောဆိုဆက်ဆံပုံများကြောင့် မပျော်မရွှင်ဖြစ်နေကြောင်း သိရသည်။
ချယ်လ်ဆီးတိုက်စစ်ကစားသမားများသည် တူဟယ်လ်၏စိတ်နေစိတ်ထားကို နှစ်သက်ခြင်းမရှိသလို၊ ကွင်းအတွင်း အမှားပြုလုပ်ပါက ခက်ထန်သည့်စကားလုံးများဖြင့် ပြောဆိုဆက်ဆံတတ်သည့် တူဟယ်လ်၏ အမူအကျင့်များကိုလည်း စိတ်ပျက်နေကြကြောင်း The Athletic က ဖော်ပြခဲ့သည်။
ထို့ကြောင့် ချယ်လ်ဆီးတိုက်စစ်ကစားသမားအချို့သည် အသင်းမှထွက်ခွာရန်ပင် စီစဉ်နေကြောင်း သိရှိရသည်။
