ချယ်လ်ဆီးအသင်းသည် အသင်းတိုက်စစ်မှူး ဗာနာအား ရောင်းထုတ်ရန် စဉ်းစားနေသော်လည်း အစားထိုးမည့် တိုက်စစ်မှူး ခေါ်ယူပြီးမှသာ လက်လွှတ်ဖွယ်ရှိနေကြောင်း ဗြိတိန်သတင်းစာ Daily Mail က ဖော်ပြခဲ့သည်။
အသက် (၂၆) နှစ်အရွယ်ရှိ ဂျာမန်တိုက်စစ်မှူး ဗာနာသည် ၂၀၂၀ နွေရာသီတွင် လိုက်ပ်ဇစ်အသင်းမှ ချယ်လ်ဆီးအသင်းသို့ ပေါင် (၄၇.၅)သန်းဖြင့် ပြောင်းရွှေ့လာသူဖြစ်သည်။
သို့သော် ၎င်းသည် ချယ်လ်ဆီးအသင်းတွင် ပုံမှန်ခြေစွမ်းရရန် ရုန်းကန်နေရပြီး (၂) ရာသီအတွင်း ပြိုင်ပွဲစုံ (၈၉) ပွဲတွင် (၂၃) ဂိုးသာ သွင်းယူနိုင်ခဲ့သည်။
ထို့ပြင် ဗာနာအနေဖြင့် ပြီးခဲ့သည့်ရာသီက ချယ်လ်ဆီးအသင်းတွင် ပုံမှန်ပွဲထွက်ခွင့်ရရန် ရုန်းကန်ခဲ့ရသောကြောင့် ယခုနွေတွင် အသင်းမှ ထွက်ခွာဖွယ်ရှိနေသည်ဟု သုံးသပ်မှုများလည်းရှိနေသည်။
ယခုအခါ ချယ်လ်ဆီးအသင်းသည် အသင်းတွင် အံမဝင်သည့် ဗာနာကို ရောင်းထုတ်ရန် စဉ်းစားလာခြင်းဖြစ်ပြီး တိုက်စစ်မှူးတစ်ဦးဦး ခေါ်ယူပြီးပါက ၎င်းကို လက်လွှတ်ဖွယ်ရှိနေကြောင်း သိရသည်။
ဗာနာကို ခေါ်ယူရန် နယူးကာဆယ်၊ ဂျူဗင်တပ်စ်နှင့် အသင်းဟောင်း လိုက်ပ်ဇစ်တို့က စိတ်ဝင်စားနေကြောင်းလည်း Daily Mail က ဖော်ပြခဲ့သည်။
