စပါးနှင့် အင်္ဂလန်တိုက်စစ်မှူးဟောင်း ဒါရင်းဘန့်က တန်ဟက်ဂ်၏နည်းစနစ်မှာ စီရော်နယ်လ်ဒိုနှင့် ကိုက်ညီခြင်းမရှိသဖြင့် ၎င်းအနေဖြင့် မန်ယူအသင်းတွင် နေရာမရနိုင်ကြောင်း သုံးသပ်ပြောကြားခဲ့သည်။
မန်ယူအသင်းသည် စီရော်နယ်လ်ဒို မိနစ်(၉၀) အပြည့်ကစားသည့်ပွဲ၌ ဘရန့်ဖို့ဒ်အသင်းကို (၄-ဝ) ဂိုးဖြင့် ရှုံးနိမ့်ခဲ့ပြီး လီဗာပူးလ်ကို (၂- ၁) ဂိုးဖြင့် အနိုင်ရသည့်ပွဲတွင်မူ စီရော်နယ်လ်ဒိုအနေဖြင့် ပွဲချိန် (၈၆)မိနစ်တွင်မှ လူစားဝင်ကစားခွင့်ရခဲ့သည်။
အဆိုပါပွဲစဉ်အပြီးတွင် ဒါရင်းဘန့်က တန်ဟက်ဂ်၏ ပြင်းထန်သည့် Pressing ကစားဟန်မှာ စီရော်နယ်လ်ဒိုနှင့် ကိုက်ညီမှုမရှိကြောင်း ပြောကြားခဲ့ခြင်းဖြစ်သည်။
“လီဗာပူးလ်နဲ့ပွဲမှာ ဗဟိုနောက်ခံလူ (၂)ဦးနဲ့ တိုက်စစ်ကစားသမား (၃)ဦးက ခြေစွမ်းအပြနိုင်ဆုံးပါပဲ။ လူတွေက ဒီအသင်းမှာ စီရော်နယ်လ်ဒိုကို ချန်လှပ်လို့မရဘူးဆိုပြီး ပြောကြတယ်။ ဒါပေမဲ့ တန်ဟက်ဂ်ကစားတဲ့ စွမ်းရည်မြင့်၊ High Pressing စနစ်မှာ စီရော်နယ်လ်ဒိုကို ထည့်ကစားဖို့ မဖြစ်နိုင်ပါဘူး။ ဒီစနစ်မှာ အသက် (၃၇)နှစ်ကျော်ပြီဖြစ်တဲ့ စီရော်နယ်လ်ဒို ပါဝင်ကစားဖို့ မဖြစ်နိုင်ပါဘူး” ဟု ဒါရင်းဘန့်က ပြောကြားခဲ့သည်။
စီရော်နယ်လ်ဒိုအနေဖြင့် ယခုနွေတွင် မန်ယူအသင်းမှထွက်ခွာရန် စီစဉ်နေသော်လည်း အသင်းကြီးများမှာ ၎င်းကိုခေါ်ယူလိုခြင်းမရှိကြောင်း သိရသည်။ လက်ရှိတွင် မန်ယူအသင်းကလည်း စီရော်နယ်လ်ဒိုကို အသင်းမှထွက်ခွာသွားရန် အလိုရှိနေကြောင်း Daily Mail က ဖော်ပြခဲ့သည်။
