ဇန်နဝါရီ အပြောင်းအရွေ့မှာ လီဗာပူးတို့ ခေါ်ယူသင့်တဲ့ နောက်ခံလူ တစ်ဦးကို ပြောပြလိုက်တဲ့ အင်္ဂလန် ဂိုးသမားဟောင်း

အင်္ဂလန် နဲ့ စပါး ဂိုးသမားဟောင်း ဖြစ်သူ ပေါလ်ရောဘင်ဆင်က ဗဟို ခံစစ်ပိုင်း ပြသနာ ကြီးကြီးမားမား ကြုံတွေ့ နေရတဲ့ လီဗာပူး အသင်း အနေနဲ့ လာမည့် ဇန်နဝါရီ အပြောင်းအရွေ့မှာ ဘယ်သူ့ကို ခေါ်ယူ သင့်သလဲ ဆိုတာ အကြံပေး ပြောဆို သွားခဲ့ ပါတယ်။ လီဗာပူးဟာ လက်ရှိမှာ ခံစစ်ပိုင်း ပြသနာတွေ ကြုံတွေ့ နေရပြီး

အသင်းရဲ့ အဓိက ကစားသမား ဖြစ်သူ ဗာဂျယ်ဗန်ဒိုက်ဟာ မာဆေးဆိုက် ဒါဘီမှာ ရရှိခဲ့တဲ့ ဒူးအရွတ် စုတ်ပြဲ ဒဏ်ရာကြောင့် ဒီရာသီရဲ့ ကာလ အများစုကို လွဲချော် သွားဖို့ ရှိနေပါတယ်။ ပြီးခဲ့တဲ့ ပွဲစဉ်တွေမှာ ဗန်ဒိုက်ရဲ့ နေရာကို ဖြည့်ကစား ပေးခဲ့သူ ကွင်းလယ်လူ ဖာဘင်ညို ကလည်း အင်္ဂါနေ့က မစ်ဂျီလန်းကို ၂-၀ နဲ့ အနိုင်ရခဲ့တဲ့ ချန်ပီယံလိဂ် ပွဲစဉ်မှာ ဒူးကောက်ကြော ဒဏ်ရာ ရရှိ ခဲ့တာကြောင့် လာမည့် ဝက်ဟမ်း အတ္တလန်တာ မန်စီးတီး တို့နဲ့ ပွဲစဉ်တွေကို လွဲချော် သွားဖို့ များနေပါတယ်။

ဂျိုရယ်မာတစ် ကလည်း မာဆေးဆိုက်ဒါဘီမှာ ပွဲချိန်ပြည့် ဝင်ကစား သွားခဲ့ပေမယ့်လည်း အဲဒီပွဲမှာ ဒဏ်ရာ ရရှိ ခဲ့ပြန်တာကြောင့် ပြီးခဲ့တဲ့ ၃ ပွဲစလုံးကို လွဲချော် ထားခဲ့ပြီး အတ္တလန်တာနဲ့ ပွဲစဉ်မှာ အသင်း အတွက် ပြန်ကစား ပေးဖို့ ရှိနေပါတယ်။ ဒါ့ကြောင့် လီဗာပူးမှာ ကြံ့ခိုင်မှု ပြည့်ဝတဲ့ စီနီယာ ဗဟိုနောက်ခံလူ ဆိုလို့ ဂျိုးဂိုးမက်ဇ် တစ်ဦးသာ ရှိနေတော့တဲ့ အနေအထား ဖြစ်ပြီး ကလော့ အနေနဲ့ လာမည့် ပွဲစဉ် အချို့မှာ အသက် ၁၉ နှစ်အရွယ် အကယ်ဒမီ ကြယ်ပွင့် ဖြစ်တဲ့ ရီးစ်ဝီလီယံကို သုံးစွဲ သွားရဖို့ ရှိနေပါတယ်။

ဒါ့ကြောင့်လည်း လီဗာပူးဟာ လာမည့် ဇန်နဝါရီ အပြောင်းအရွေ့မှာ ဗဟို နောက်ခံလူ တစ်ဦးတော့ ခေါ်ယူ သွားရဖို့ ရှိနေပြီး လက်ရှိမှာတော့ RB လိုက်ပ်ဇစ်ရဲ့ အူပါမက်ကာနို ၊ နာပိုလီရဲ့ ကူလီဘာလီ အပါအဝင် နောက်ခံလူ တော်တော်များများကို ချိတ်ဆက် နေတယ်လို့ သိရပါတယ်။ ဒါပေမယ့်လည်း ပေါလ်ရော်ဘင်ဆင်က ဗာဂျယ်ဗန်ဒိုက်ရဲ့ နေရာမှာ အစားထိုး သွားမယ့် ကစားသမား ရှာဖွေ နေတဲ့ ယာဂန်ကလော့ အတွက် ဘရိုက်တန် နောက်ခံလူ ဘန်ဝိုက်ကို ခေါ်ယူရန် စဉ်းစား သင့်တယ်လို့ အကြံပေး လိုက်ပါတယ်။

ရော်ဘင်ဆင်က “လီဗာပူး အနေနဲ့ တက်နိုင်သမျှ အစောဆုံး အပြောင်းအရွေ့ ကိစ္စကို လုပ်ဆောင် သွားရမှာ ဖြစ်ပါတယ်။ ဆိုလိုချင်တာ ကတော့ ကလော့ အနေနဲ့ ဗန်ဒိုက်ရဲ့ နေရာကို အစားထိုး သွားမယ့် ကစားသမားကို ဇန်နဝါရီ အပြောင်းအရွေ့ရဲ့ ဈေးကွက် ဖွင့်ဖွင့်ချင်းမှာပဲ ခေါ်ယူ သွားရမှာပါ။ ပြသနာ ကတော့ သူတို့ ပြန်လည် အားဖြည့် သွားရမယ့် ဒီဧရိယာဟာ လီဗာပူးတို့ ရုန်းကန် နေရတဲ့ နေရာ ဆိုတာ ကမ္ဘာ့ဘောလုံးလောကမှာ ရှိတဲ့ လူတိုင်း သိနေပြီး ဖြစ်ပါတယ်။

ဒါ့ကြောင့်လည်း သူတို့ ခေါ်ယူချင်တဲ့ နောက်ခံလူ အတွက် ဈေးနှုန်းဟာ ရုတ်တရက်ကြီး ထိုးတက် သွားမှာပါ။ လီဗာပူး အနေနဲ့ ဘရိုက်တန်ရဲ့ ဘန်ဝိုက်ကို ခေါ်ယူ သင့်တယ်လို့ ကျွန်တော် ထင်ပါတယ်။ သူ့ရဲ့ ကစားပုံကို လိဒ်ယူနိုက်တက်မှာ ကျွန်တော် အနီးကပ် စောင့်ကြည့် ခဲ့ပါတယ်။ သူဟာ ထူးချွန်တဲ့ ဗဟို နောက်ခံလူ တစ်ဦး ဖြစ်ပါတယ်။ အကယ်၍ လီဗာပူးဟာ သူ့ကို ခေါ်ယူဖို့ ကမ်းလှမ်းခဲ့မယ် ဆိုရင် ဘရိုက်တန်ဟာ လက်ရှိ အချိန်မှာ သူ့ရဲ့ ပုံမှန် ပေါက်ဈေးထက် ပေါင် ၁၅ သန်း ၂၀ လောက် တင်ထားမှာ ဖြစ်ပါတယ်။” လို့ ပြောသွား ပါတယ်။

ဘန်ဝိုက်ဟာ အသက် ၂၃ နှစ်သာ ရှိသေးပြီး ပရီးမီးယားလိဂ်မှာ အတွေ့အကြုံ နည်းပါး ပေမယ့် ဒီပြိုင်ပွဲမှာ ကောင်းကောင်း ကစား နိုင်စွမ်း ရှိကြောင်းကို ဒီရာသီ ဘရိုက်တန်နဲ့ အတူ ပြသ ထားခဲ့ပါတယ်။ ဝိုက်ဟာ အင်္ဂလန် လက်ရွေးစင် အသင်း အတွက် ရွေးချယ်ခံရခြင်း မရှိသေးပေမယ့်လည်း ပြီးခဲ့တဲ့ ရာသီက လိဒ်ယူနိုက်တက် ကို ချန်ပီယံရှစ်မှာ ဗိုလ်စွဲပြီး တန်းတက် လာနိုင်အောင် အကောင်းဆုံး ကစား ပြခဲ့ပါတယ်။