အာဆင်နယ်အသင်းပရိသတ်များသည် ပြီးခဲ့သည့် ဇန်နဝါရီအပြောင်းအရွှေ့ဈေးကွက်တွင် အဓိကပစ်မှတ်ကစားသမားများအား ခေါ်ယူနိုင်ခြင်းမရှိသည့် အသင်းကို လူမှုကွန်ရက်တွင် လှောင်ပြောင်မှုများ ပြုလုပ်ခဲ့ကြကြောင်း ဗြိတိန်သတင်းစာ Daily Mail က ဖော်ပြခဲ့သည်။
အာဆင်နယ်အသင်းအားပေးသူ ပရိသတ်များသည် ချန်ပီယံလိဂ်ဝင်ခွင့် (၅)နှစ်ဆက်တိုက် ဆုံးရှုံးမှုကို အဆုံးသတ်ရန်အတွက် အသင်းအနေဖြင့် ပြီးခဲ့သည့်ဇန်နဝါရီအပြောင်းအရွှေ့ကာလတွင် နာမည်ကျော်ကစားသမားများကို ခေါ်ယူအားဖြည့်လိမ့်မည်ဟု မျှော်လင့်ခဲ့ကြသည်။
အာဆင်နယ်အသင်းအနေဖြင့် ဇန်နဝါရီလအတွင်း ကစားခဲ့သည့် ပြိုင်ပွဲစုံ (၅)ပွဲတွင် နိုင်ပွဲလုံးဝမရှိသလို၊ FA ဖလားနှင့် လိဂ်ဖလား (Carabao Cup) ပြိုင်ပွဲတို့မှ ထွက်ခွာခဲ့ရသည်။
ယင်းအခြေအနေကြောင့် အာဆင်နယ်အသင်းအနေဖြင့် ပြီးခဲ့သည့်ဇန်နဝါရီတွင် အင်အားဖြည့်တင်းမှုများ ပြုလုပ်လိမ့်မည်ဟု အသင်းပရိသတ်များက ယုံကြည်ခဲ့ကြသည်။
သို့သော် အာဆင်နယ်အသင်းသည် ပြီးခဲ့သည့်ဇန်နဝါရီအပြောင်းအရွှေ့တွင် မထင်မရှားလူငယ်ကစားသမား (၂)ဦးသာ ခေါ်ယူနိုင်ခဲ့ပြီး အဓိကပစ်မှတ်များဖြစ်သည့် ဗလာဟိုဗစ်၊ ဂီမာရေ့စ်တို့ကို ခေါ်ယူနိုင်ခဲ့ခြင်းမရှိပေ။
ထို့ပြင် အာဆင်နယ်အသင်းအနေဖြင့် အသင်း၏အဓိကကစားသမားဖြစ်သူ အူဘာမီယန်းကို ပြောင်းရွှေ့ကြေးအလွတ်ဖြင့် ဘာစီလိုနာအသင်းထံ လက်လွှတ်ခဲ့ရသည်။
ထို့ကြောင့် အာဆင်နယ်အသင်းပရိသတ်များသည် ဒေါသပေါက်ကွဲခဲ့ကြပြီး လူမှုကွန်ရက်တွင် အသင်းကို လှောင်ပြောင်မှုများ ပြုလုပ်ခဲ့ကြခြင်းဖြစ်သည်။
အာဆင်နယ်ပရိသတ်များသည် လူမှုကွန်ရက်များတွင် နာမည်ကျော် Meme ပုံများဖြင့် အသင်း၏ အဓိကပစ်မှတ် ကစားသမားခေါ်ယူရန် ပျက်ကွက်ခဲ့ခြင်းကို လှောင်ပြောင်ခဲ့ကြပြီး ဇန်နဝါရီတွင် နာမည်ကျော်ကစားသမားများကို ခေါ်ယူနိုင်ခြင်းမရှိသည့်အတွက် စိတ်ပျက်နေကြောင်း သိရသည်။
