အင်္ဂလန်လက်ရွေးစင်အသင်းနည်းပြ ဆောက်ဂိတ်သည် ဆွစ်ဇာလန်၊ အိုင်ဗရီကို့စ်တို့နှင့် ယှဉ်ပြိုင်ကစားမည့် ခြေစမ်းပွဲများအတွက် လူစာရင်းထုတ်ပြန်ခဲ့ရာ မန်ယူအသင်း၏ တိုက်စစ်ကစားသမားများဖြစ်သည့် ရပ်ရှ်ဖို့ဒ်နှင့် ဆန်ချိုတို့ ချန်လှပ်ခံခဲ့ရကြောင်း သိရသည်။
အင်္ဂလန်လက်ရွေးစင်အသင်းသည် မတ်(၂၆)တွင် ဆွစ်ဇာလန်၊ မတ်(၂၉)တွင် အိုင်ဗရီကို့စ်အသင်းတို့နှင့် ခြေစမ်းပွဲများ ယှဉ်ပြိုင်ကစားမည်ဖြစ်ပြီး ယင်းအတွက် ကစားသမား (၂၅)ဦးစာရင်းကို ကြာသပတေးနေ့က ထုတ်ပြန်ခဲ့ခြင်းဖြစ်သည်။
အင်္ဂလန်အသင်းနည်းပြ ဆောက်ဂိတ်သည် အမာခံကစားသမားများကိုပင် အဓိကရွေးချယ်ခဲ့ခြင်းဖြစ်သော်လည်း လက်ရွေးစင်အသင်းတွင် တစ်ကြိမ်မျှ ရွေးချယ်ခံရဖူးခြင်းမရှိသေးသည့် ခရစ္စတယ်ပဲလေ့စ်နောက်ခံလူ မာ့ခ်ဂူဟီကို ပထမဆုံးအကြိမ် ရွေးချယ်ခဲ့သည်။
ချယ်လ်ဆီးအသင်း၏ လူငယ်ကစားသမားဟောင်းတစ်ဦးဖြစ်သော ဂူဟီ(၂၁ နှစ်)သည် ယခုရာသီတွင် ခရစ္စတယ်ပဲလေ့စ်အသင်းအ တွက် ခြေစွမ်းပြနေခြင်းကြောင့် ယခုကဲ့သို့ ရွေးချယ်ခံခဲ့ရခြင်းဖြစ်သည်။
အင်္ဂလန်လက်ရွေးစင်အသင်း နည်းပြ ဆောက်ဂိတ်၏ ရွေးချယ်မှုတွင် ရပ်ရှ်ဖို့ဒ် မပါဝင်ခဲ့ခြင်းအတွက် ဝေဖန်မှု သိပ်မရှိခဲ့သော်လည်း ဆန်ချို မပါဝင်ခဲ့ခြင်းကိုမူ ဝေဖန်မှုများရှိခဲ့ကြောင်း သိရသည်။
ဆန်ချိုသည် ယခုနောက်ပိုင်း မန်ယူအသင်း၏ ပွဲစဉ်များတွင် ခြေစွမ်းပိုင်းတိုးတက်မှု ပြသနေခြင်းကြောင့် ဆောက်ဂိတ်၏ ရွေးချယ်မှုအပေါ် ဝေဖန်မှုများ ရှိနေခြင်းဖြစ်သည်။
