ချယ်လ်ဆီးအသင်းပရိသတ်များသည် ဆောက်သမ်တန်အသင်းကို (၁-၂)ဂိုးဖြင့် ရှုံးနိမ့်ပြီးနောက် အသင်းနည်းပြ တူဟယ်လ်ကို လူမှုကွန်ရက်များတွင် ဝေဖန်မှုများပြုလုပ်ခဲ့ကြကြောင်း သိရှိရသည်။
ချယ်လ်ဆီးအသင်းသည် ဆောက်သမ်တန်အသင်းကို ရှုံးနိမ့်သည့်ပွဲတွင် ခံစစ်ပိုင်းအားနည်းခဲ့သလို၊ အခွင့်အရေးရရှိမှုမှာလည်း အိမ်ရှင် ဆောက်သမ်တန်အသင်းထက် နည်းပါးခဲ့သည်။
အဆိုပါပွဲစဉ်အပြီးတွင် ချယ်လ်ဆီးအသင်းပရိသတ်များသည် ကစားသမားဒဏ်ရာရခြင်းကို အမြဲလိုလို ညည်းတွားလေ့ရှိသည့် အသင်းနည်းပြ တူဟယ်လ်ကို ပြစ်တင်ဝေဖန်မှုများ ပြုလုပ်ခဲ့ကြခြင်းဖြစ်သည်။
ချယ်လ်ဆီးပရိသတ်တစ်ဦးက ”တူဟယ်လ်အနေနဲ့ ကစားသမားတွေ ဆုံးရှုံးလိုက်ရလို့ ညည်းတွားနေတာကိုရပ်ပြီး ပြဿနာတွေကို အဖြေရှာဖို့လိုနေပါပြီ”ဟု Twitter တွင် ရေးသားခဲ့သည်။
အခြားပရိသတ်တစ်ဦးကလည်း ”စိတ်ပျက်စရာကောင်းတဲ့ စွမ်းဆောင်မှုပါပဲ။ တူဟယ်လ်က ဆင်ခြေတွေ လျှောက်ပေးနေတယ်။ အခုမှ ၂၀၂၂ နှစ်စပိုင်းကလိုပဲ။ ချယ်လ်ဆီးအသင်းက နောက်ပြန်ဆုတ်နေပြီ။ အသင်းက စည်းလုံးမှုမရှိသလို၊ ကစားကွက်လည်း မရှိဘူး”ဟု မှတ်ချက်ပြုခဲ့သည်။
နောက်ချယ်လ်ဆီးပရိသတ်တစ်ဦးကမူ ” အေဘရာမိုဗစ်ချ်သာ ချယ်လ်ဆီးအသင်းပိုင်ရှင်အဖြစ် ဆက်ရှိနေဦးမယ်ဆိုရင် တူဟယ်လ်အနေနဲ့ ရာသီကုန်တဲ့အထိ အသင်းကို ကိုင်တွယ်ခွင့်ရမှာ မဟုတ်ပါဘူး”ဟု မှတ်ချက်ရေးသားခဲ့သည်။
