ဆိုးရှားရဲ့ နည်းပြရာထူးကို ဆက်ခံမယ့်သူဟာ မန်ယူနိုက်တက် အသင်းတွင်းမှာ ရှိနေပြီလို့ မှတ်ချက်ပေးလိုက်တဲ့ တင်ရှားဝုဒ်

တင်ရှားဝုဒ်က မန်ချက်စတာယူနိုက်တက် အသင်း အနေနဲ့ အိုလီဂန်နာဆိုးရှားရဲ့ နည်းပြ ရာထူးကို ဆက်ခံမယ့် မန်နေဂျာကို အခြားမှာ သွားရှာစရာ မလိုဘဲ ကလပ် အသင်းတွင်းမှာ ပိုင်ဆိုင်ထားခဲ့ပြီး ဖြစ်တယ်လို့ ဆိုလိုက်ပါတယ်။ နော်ဝေး နည်းပြဟာ လွန်ခဲ့တဲ့ ၃ နှစ်က ဂျိုဆေးမော်ရင်ညိုရဲ့ နေရာမှာ အစားဝင်ရောက်လာခဲ့ပြီးနောက် ယူနိုက်တက်ကို တစ်ဖြည်းဖြည်း တိုးတက်လာအောင် စွမ်းဆောင်ပေးထားခဲ့ပေမယ့်လည်း ပြီးခဲ့တဲ့ နွေရာသီက ထိပ်တန်း ကစားသမားတွေ အားဖြည့်ခဲ့မှုကြောင့် ဒီရာသီမှာ ဆုဖလား ရယူပေးဖို့ ဖိအားတွေ ရှိလာခဲ့ပါတယ်။

ယူနိုက်တက်ဟာ ဒီရာသီ ပရီးမီးယားလိဂ် ပွဲစဉ် ၅ အပြီးမှာ ရမှတ် ၁၃ မှတ်ထိ ရယူကာ ဇယားထိပ်ပိုင်းမှာ ရပ်တည်နေခဲ့ပေမယ့်လည်း ဝုဖ် နဲ့ ဝက်ဟမ်း တို့ကို ကံတရားရဲ့ ဖေးမမှုတွေကြောင့် အနိုင်ရခဲ့တာ ဖြစ်ပါတယ်။ ဒါ့အပြင် ဒေးဗစ်မိုရက်ရဲ့ အသင်းဟာ ပြီးခဲ့တဲ့ ဗုဒ္ဓဟူးနေ့က ယူနိုက်တက်ကို အိုးထရပ်ဖို့ဒ်မှာ အနိုင်ယူကာ ကာရာဘောင်ဖလား ပြိုင်ပွဲကနေ ထုတ်ပယ်ခဲ့တာကြောင့် ဖလား တစ်လုံးတော့ လက်လွှတ်လိုက်ရပြီ ဖြစ်ပါတယ်။

ရော်နယ်ဒိုဟာ ဂျူဗင်တပ်ကနေ ယူနိုက်တက်ကို ပြန်လည် ရောက်ရှိလာခဲ့ပြီးနောက် ကလပ်အတွက် ၃ ပွဲမှာ ၄ ဂိုးထိ သွင်းယူပေးထားခဲ့ပေမယ့်လည်း ယန်းဘွိုင်းကို ရှုံးနိမ့်ခဲ့တဲ့ ချန်ပီယံလိဂ် ပွဲစဉ်မှာ ကွင်းဘေးစည်းကနေ နည်းပြတစ်ဦးလို အော်ဟစ်ညွှန်ကြားမှုတွေကြောင့် ဖာဒီနန် အပါအဝင် pundit တွေရဲ့ ဝေဖန်မှုတွေကို ခံခဲ့ရပါသေးတယ်။ စပါး မန်နေဂျာဟောင်း ဖြစ်သူ တင်ရှားဝုဒ် ကတော့ ရော်နယ်ဒိုဟာ လာမည့် ၁၈ လ အတွင်း ဆိုးရှားရဲ့ နည်းပြ ရာထူးကို ဆက်ခံသွားဖို့ ရှိနေတယ်လို့ ယုံကြည်နေပါတယ်။

ရှားဝုဒ်က “လာမည့် ၁၈ လ အတွင်း ရော်နယ်ဒိုဟာ မန်ချက်စတာယူနိုက်တက် အသင်းရဲ့ မန်နေဂျာ ဖြစ်လာလိမ့်မယ်လို့ ကျွန်တော် မြင်နေပါတယ်။ ကျွန်တော် ကတော့ အိုလီ အနေနဲ့ ရော်နယ်ဒိုရဲ့ ကွင်းဘေးစည်းကနေ နည်းပြတစ်ဦးလို အော်ဟစ် ညွှန်ကြားမှုတွေကို လက်ခံ သွားရလိမ့်မယ်လို့ ထင်ပါတယ်။ အိုလီဟာ ရော်နယ်ဒိုလို ကစားသမားမျိုးကို ဒီကလပ်ကို ခေါ်ယူခဲ့တာကြောင့် သူဟာ ဘာတွေ ယူဆောင်လာမလဲဆိုတာ သိထားပြီး ဖြစ်မှာပါ။

ဒါဟာ ပထမအကြိမ် အိုးထရပ်ဖို့ဒ်မှာ ကစားခဲ့တဲ့ ရော်နယ်ဒိုနဲ့ လုံး၀ ခြားနားသွားပြီ ဖြစ်ပါတယ်။ အိုလီဟာ သူ့လို ကစားသမားမျိုးကို အသင်းမှာ လိုအပ်နေပါတယ်။ အကယ်၍ ရော်နယ်ဒို အနေနဲ့ မန်နေဂျာရဲ့ ဘေးကနေ အော်ဟစ် ညွှန်ကြားဖို့ လိုအပ်တယ်လို့ သူခံစားမိနေတယ် ဆိုရင် သူ့ကို ဒီလို လုပ်ဖို့အတွက် ခွင့်ပြု သွားရမှာ ဖြစ်ပါတယ်။

မော်ရင်ညိုသာ ယူနိုက်တက် မန်နေဂျာ အဖြစ် ရှိနေသေးတယ် ဆိုရင် ရော်နယ်ဒိုဟာ ဒီလို လုပ်ချင်မှ လုပ်မှာပါ။ သူသာ ရှိသေးတယ် ဆိုရင် အရမ်းကို ခြားနားနေမှာပါ။ ဒါပေမယ့် ရော်နယ်ဒို ဒီလို လုပ်ဖို့ ဘာကြောင့် လိုအပ်သလဲ ဆိုတာကိုတော့ သူ့ကို အစကတည်းက မေးမြန်းသွားရမှာ ဖြစ်ပါတယ်။

ပေါ်တူဂီ လက်ရွေးစင် အသင်းနဲ့ နိုင်ငံတကာ ပွဲစဉ် တစ်ချို့မှာ သူ ဒီလို လုပ်ခဲ့တာကို ကျွန်တော်တို့ မြင်တွေ့ ခဲ့ဖူးပါတယ်။ ပြီးခဲ့တဲ့ ယူရိုပြိုင်ပွဲတုန်းကလည်း သူ ဒီလို လုပ်ခဲ့တာကို တွေ့ခဲ့ရမှာပါ။ ဒီကောင်လေးဟာ ၁၀၀% မန်နေဂျာ တစ်ဦး ဖြစ်လာမယ့်သူပါ။ ကျွန်တော် ကတော့ သူဟာ လာမည့် ၁၈ လ အတွင်း မန်ချက်စတာယူနိုက်တက် အသင်းရဲ့ မန်နေဂျာ တစ်ဦး ဖြစ်လာလိမ့်မယ်လို့ လောင်းလိုက်ချင်ပါတယ်။” လို့ ပြောသွားပါတယ်။