လီဗာပူးလ်အသင်းနည်းပြ ယာဂန်ကလော့ပ်က အသင်းတိုက်စစ်ကစားသမား ဆာလာ၏ စာချုပ်ကိစ္စနှင့်ပတ်သက်ပြီး မိမိအနေဖြင့် ပြောစရာမရှိကြောင်း ပြောကြားခဲ့သည်။
အသက် (၂၉)နှစ်အရွယ်ရှိ အီဂျစ်တိုက်စစ်ကစားသမား ဆာလာနှင့် လီဗာပူးလ်အသင်းတို့ ချုပ်ဆိုထားသည့်စာချုပ်မှာ ၂၀၂၃ ခုနှစ်တွင် စာချုပ်သက်တမ်း ကုန်ဆုံးမည်ဖြစ်သည်။
လီဗာပူးလ်အသင်းသည် ဆာလာအား စာချုပ်သက်တမ်းတိုးရန် ကြိုးပမ်းနေသည်ဟု သတင်းများထွက်ပေါ်နေသလို ဆာလာအနေဖြင့် တစ်ပတ်လစာ ပေါင် (၅၀၀၀၀၀)အထိ အလိုရှိနေခြင်းကြောင့် စာချုပ်သစ်ချုပ်ဆိုရန်ကိစ္စမှာ ဖြစ်နိုင်ဖွယ်မရှိဟု သုံးသပ်မှုများလည်း ရှိနေသည်။
သောကြာနေ့ကပြုလုပ်သည့် ခရစ္စတယ်ပဲလေ့စ်အသင်းနှင့် ပွဲကြိုမီဒီယာတွေ့ဆုံမှုတွင် မီဒီယာများက ဆာလာ၏ စာချုပ်ကိစ္စနှင့်ပတ်သက်ပြီး မေးမြန်းခဲ့ရာ ကလော့ပ်က ပြောစရာမရှိကြောင်း တုံ့ပြန်ခဲ့ခြင်းဖြစ်သည်။
ကလော့ပ်က “ဆာလာရဲ့ စာချုပ်ကိစ္စနဲ့ပတ်သက်ပြီး ကျွန်တော့်အနေနဲ့ ဘာမှပြောစရာမရှိပါဘူး။ အဲဒီကိစ္စဟာ ကျွန်တော်နဲ့ သက်ဆိုင်တဲ့ကိစ္စလည်း မဟုတ်ပါဘူး။ ကျွန်တော်ကတော့ ဆာလာအနေနဲ့ ပွဲကစားဖို့ အသင့်ဖြစ်မဖြစ်ပဲ စိတ်ဝင်စားပါတယ်။ စာချုပ်ကိစ္စနဲ့ပတ်သက်ပြီး ကျွန် တော့်မှာ ပြောစရာမရှိပါဘူး” ဟု ပြောကြားခဲ့သည်။
ဆာလာသည် ၂၀၁၇ နွေရာသီအပြောင်းအရွှေ့စျေးကွက်တွင် ရိုးမားအသင်းမှ လီဗာပူးလ်အသင်းသို့ ပေါင် (၃၆)သန်းဖြင့် ပြောင်းရွှေ့လာခဲ့ပြီး အသင်းတွင် ခြေစွမ်းပြကစားနေသူဖြစ်သည်။
