အဲဗာတန်အသင်း၏နည်းပြ အန်ဆယ် လော့တီက ဥရောပစူပါလိဂ်သည် ပြက်လုံးတစ်ခုသာဖြစ်သည်ဟု ပြောကြားခဲ့သည်။
ဥရောပထိပ်သီးအသင်း(၁၂)သင်း ဦးဆောင်အကောင်အထည်ဖော်ရန် စီစဉ်ထားသည့် ဥရောပစူပါလိဂ်ပြိုင်ပွဲမှာ လက်ရှိအချိန်တွင် ပေါ်ပေါက်လာနိုင်ခြေ မရှိတော့သလောက် ဖြစ်သွားပြီဖြစ်သော်လည်း ယင်းပြိုင်ပွဲအပေါ် မှတ်ချက်ပေးမှုများ ရှိနေဆဲဖြစ်ပြီး အန်ဆယ်လော့တီက ယခုကဲ့သို့ သုံးသပ်ခဲ့ခြင်းလည်းဖြစ်သည်။
“ဥရောပစူပါလိဂ်ပြိုင်ပွဲဟာ ကျွန်တော့် အမြင်အရတော့ ပြက်လုံးတစ်ခုပါပဲ။ ဘာကြောင့်လဲဆိုတော့ ဒါဟာ ဖြစ်လာနိုင်မှာ မဟုတ်တဲ့အရာ၊ ဖြစ်နိုင်ခြေမရှိတဲ့အရာ ဖြစ်နေတာကြောင့်ပါပဲ။ အားကစားယဉ်ကျေးမှုက ဥရောပနဲ့ အမေရိက ခြားနားပါတယ်။ ဒါဟာ ကျွန်တော်တို့ မှန်ပြီး သူတို့ မှားတယ်လို့ ဆိုလိုတာမဟုတ်ပါဘူး။ နေထိုင်ကြတဲ့ လူတွေချင်း ခြားနားတာကြောင့်ပါ။ အမေရိကမှာ အားကစားက ဖျော်ဖြေရေးအသွင်ဆောင်ပေမဲ့ ဥရောပမှာတော့ အဲဒီထက်ပိုတဲ့ စိတ်အားထက်သန်မှုတွေ ပါဝင်နေပါတယ်။ ကျွန်တော်တို့က အိမ်နီးချင်းပြိုင်ဘက်အသင်းကို အနိုင်ယူလိုစိတ်တွေနဲ့ ကြီးပြင်းလာခဲ့ကြတာပါ။ ဘောလုံးအားကစားက စီးပွားရေးဖြစ်လာပေမဲ့ အခြေအနေ နှစ်ခုကို မှန်ကန်အောင် သုံးသပ်နိုင်ဖို့ လိုအပ်ပါတယ်”ဟု အန်ဆယ်လော့တီက ဆိုခဲ့သည်