ပြီးခဲ့သည့်မန်စီးတီးအသင်းနှင့် ချန်ပီယံလိဂ်ဆီမီးဖိုင်နယ်ပထမအကျော့ပွဲစဉ်တွင် ရီးယဲလ်အသင်းအတွက် (၂)ဂိုးသွင်းယူပြီးနောက် တိုက်စစ်မှူး ဘန်ဇီမာသည် စီရော်နယ်လ်ဒို၏ တစ်ရာသီအတွင်း ချန်ပီယံလိဂ်သွင်းဂိုး စံချိန်များကိုကျော်ဖြတ်ရန် နီးစပ်လာခဲ့သည်။
လက်ရှိရာသီချန်ပီယံလိဂ်တွင် ဘန်ဇီမာသည် (၁၄) ဂိုးသွင်းယူထားရာ စီရော်နယ်လ်ဒို၏ တစ်ရာသီအတွင်း ချန်ပီယံလိဂ်သွင်းဂိုးအများဆုံးစံချိန်ဖြစ်သည့် (၁၇)ဂိုးကို လိုက်မီရန် (၃)ဂိုးသာလိုတော့သည်။
စီရော်နယ်လ်ဒိုသည် ၂၀၁၃-၁၄ ရာသီတွင် ရီးယဲလ်အသင်းနှင့်အတူ အဆိုပါစံချိန်ကို ပိုင်ဆိုင်ထားခြင်းဖြစ်သည်။ ချန်ပီယံလိဂ်သမိုင်းတစ်လျှောက် တစ်ရာသီအတွင်း သွင်းဂိုးအများဆုံးစံချိန်များကို ပိုင်ဆိုင်ထားသူမှာ စီရော်နယ်လ်ဒို တစ်ဦးတည်းဖြစ်ပြီး ၂၀၁၃-၁၄ ရာသီတွင် (၁၇)ဂိုး၊ ၂၀၁၅-၁၆ ရာသီ တွင် (၁၆) ဂိုး၊ ၂၀၁၇-၁၈ ရာသီတွင် (၁၅) ဂိုးစီဖြင့် စံချိန်တင်ထားကြောင်း သိရသည်။
ယင်းနောက်တွင် လီဝန်ဒေါ စကီးက ၂၀၁၉-၂၀ ရာသီ၌ (၁၅) ဂိုး၊ မက်ဆီက ၂၀၁၁-၁၂ ရာသီ၌ (၁၄)ဂိုးဖြင့် ရပ်တည်နေပြီး ယခုအခါ ဘန်ဇီမာက အဆိုပါစာရင်းထဲ ပါဝင်လာခြင်းလည်းဖြစ်သည်။
ထို့ပြင် ဘန်ဇီမာသည် လက်ရှိရာသီ ချန်ပီယံလိဂ်ရှုံးထွက်အဆင့်ပွဲစဉ်များတွင် (၉)ဂိုးအထိ သွင်းယူထားနိုင်သဖြင့် ၂၀၁၆-၁၇ ရာသီ၌ စီရော်နယ်လ်ဒို ပိုင်ဆိုင်ထားသည့် ချန်ပီယံလိဂ်ရှုံးထွက်အဆင့်ပွဲစဉ်များတွင် သွင်းဂိုးအများဆုံးစံချိန်ကို လိုက်မီရန် (၁)ဂိုးသာလိုအပ်တော့ကြောင်း သိရသည်။
ဘန်ဇီမာသည် မန်စီးတီးနှင့်ပွဲမတိုင်မီ (၆)ရက်အတွင်းကစားသည့် အိုဆာဆူနာအသင်းနှင့်ပွဲတွင် ပယ်နယ်တီ (၂)ကြိမ် လွဲချော်ခဲ့သော်လည်း ယခုပွဲစဉ်၌ ရရှိသောပယ်နယ်တီကို Panenka ကန်ချက်ဖြင့် တည်ငြိမ်စွာကန်သွင်းခဲ့ပြီး အဆိုပါလုပ်ရပ်အပေါ် ဘောလုံး ဝေဖန်သုံးသပ်သူများက ချီးကျူးပြောဆိုနေကြသည်။
ဘန်ဇီမာက “ကျွန်တော့်ခေါင်းထဲ အမြဲတမ်းတွေးထားတာက ပယ်နယ်တီမကန်ဘူးဆိုရင် ဘယ်တော့မှ ပယ်နယ်တီမလွဲဘူးဆိုတာပဲ။ ကျွန်တော် စိတ်ဓာတ်ခိုင်မာစွာပဲ ကန်သွင်းယူခဲ့တာပါ။ အခု ဒုတိယအကျော့ပွဲစဉ်အတွက် ဘာနေဗျူးမှာကစားဖို့အသင့်ရှိနေပြီး နိုင်ပွဲနဲ့အတူ ပရိသတ်တွေ အတွက်မှော်ဆန်တဲ့ရလဒ်ဖန်တီးပေးပါမယ်” ဟုဆိုခဲ့သည်။
