မန်ယူအသင်း၏ ယခုရာသီ ကစားသမားများလစာငွေပေးချေမှုမှာ ပရီးမီးယားလိဂ်၏စံချိန်တင်နှုန်းထားတစ်ရပ်သို့ ရောက်ရှိလာနိုင်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
စီရော်နယ်လ်ဒို၊ ဗာရန်း၊ ဆန်ချိုအစရှိသည့် နာမည်ကျော်ကစားသမားများရောက်ရှိလာခြင်းကြောင့် ၎င်းတို့၏ မြင့်မားသောလစာငွေပေးချေမှုများအပါအဝင် အသင်း၏ ယခုရာသီလစာငွေပေးချေမှုမှာ စံချိန်တင် ပေါင်(၃၈၇)သန်းအထိရှိနိုင်ကြောင်း သိရသည်။
ယခင်က ပရီးမီးယားလိဂ်တွင် ကစားသမားများ လစာငွေပေးချေမှုအတွက် တရားဝင်ထုတ်ပြန်ထားသော စာရင်းဇယားများအရ မန်စီးတီးအသင်းက စံချိန်တင်ခဲ့ကြောင်း သိရသည်။
၂၀၁၉-၂၀ ဘောလုံးရာသီအတွက် ယခုနှစ် နှစ်ဆန်းပိုင်းကထုတ်ပြန်သော မန်စီးတီးအသင်း၏ဘဏ္ဍာရေးရှင်းတမ်းတွင် ယင်းရာသီအတွက် စုစုပေါင်းပေးချေခဲ့ရသော ကစားသမားလစာငွေမှာ ပေါင်(၃၅၁)သန်းရှိခဲ့ကြောင်း သိိရသည်။
ယင်းပမာဏမှာ ပရီးမီးယားလိဂ်အသင်းတစ်သင်းအတွက် ရာသီတစ်ခုအတွင်း ပေးချေခဲ့ရသည့် အမြင့်ဆုံးပမာဏဖြစ်ခဲ့ပြီး စံချိန်တစ်ရပ်အဖြစ် တရားဝင်တည်ရှိနေခြင်း ဖြစ်သည်။
မန်ယူအသင်းအနေဖြင့် ပြီးခဲ့သည့် ၂၀၂၀-၂၁ ဘောလုံးရာသီအတွက် အသင်း၏ဘဏ္ဍာရေးရှင်းတမ်းကို တရားဝင်မထုတ်ပြန်သေးသော်လည်း ယင်းရာသီအတွက် စုစုပေါင်း ပေးချေခဲ့ရသော ကစားသမားလစာငွေမှာ ပေါင်(၃၂၂)သန်း ဝန်းကျင်ရှိနိုင်ကြောင်း အသင်းဘဏ္ဍာရေးအရာရှိတစ်ဦးဖြစ်သူ ကလပ်ဖ်ဘက်တီက ခန့်မှန်းခဲ့သည်။
ယခုရာသီတွင် အသင်းသို့ စီရော်နယ်လ်ဒို၊ ဗာရန်း၊ ဆန်ချိုအစရှိသည့် ကစားသမားများရောက်ရှိလာခြင်းကြောင့် ၎င်းတို့၏ မြင့်မားသောလစာငွေပေးချေမှုများအပါအဝင် အသင်း၏ ယခုရာသီ လစာငွေပေးချေမှုမှာ ယခင်ကထက် ၂၀ %ခန့် တိုးမြင့်သွားနိုင် ကြောင်း ကလပ်ဖ်ဘက်တီက ခန့်မှန်းခဲ့သည်။
ရော်နယ်လ်ဒိုသည် မန်ယူအသင်းတွင် လက်ရှိ၌ လစာငွေအများဆုံးကစားသမားအဖြစ် တစ်ပတ်လျှင် ပေါင် (၄)သိန်း(၈)သောင်းခန့် ရရှိနေပြီး သူ၏တစ်နှစ်လစာငွေမှာ ပေါင်(၂၅)သန်းခန့် ရှိနိုင်သည်။
သို့ဖြစ်ရာ ကစားသမားများ၏လစာငွေစုစုပေါင်း၌ ယခင်ရာသီ(ပေါင် ၃၂၂ သန်း)ထက် ပေါင် (၆၅)သန်းခန့်အထိ မြင့်တက်လာနိုင်ပြီး တစ်ရာသီလုံးပေးချေမှုမှာ (ယခင် တရားဝင်စံချိန်ဖြစ်ခဲ့သည့် ပေါင် ၃၅၁ သန်းကို ကျော်လွန်ပြီး) ပေါင်(၃၈၇)သန်းအထိရှိလာနိုင်ကြောင်း Daily Mail က ဖော်ပြခဲ့သည်။
မန်ယူအသင်း၏ ဘဏ္ဍာရေးပိုင်းဆိုင်ရာကို အဓိကကိုင်တွယ်ရသော ကလစ်ဖ်ဘက်တီက ” ဒီရာသီမှာ မြင့်တက်လာတဲ့ လစာငွေနှုန်းထားတွေအရ ကျွန်တော်တို့အနေနဲ့ ယခင်ရာသီထက် လစာငွေစုစုပေါင်း (၂၀%)လောက် တိုးမြင့်လာမယ်လို့ မျှော်လင့်ထားပါတယ်။ ပြီးခဲ့တဲ့နွေရာသီအပြောင်းအရွှေ့ကာလအတွင်း ထိပ်တန်းကစားသမားခေါ်ယူမှုတွေကို ပြုလုပ်ခဲ့တာကြောင့် ဒီလိုနှုန်းထားမြင့်တက်လာခြင်းဖြစ်ပါတယ်”ဟု ပြောကြားခဲ့သည်။
အကယ်၍ မန်စီးတီးအသင်းက ၂၀၂၀-၂၁ ရာသီတွင် အသုံးပြုသောကစားသမား လစာငွေနှုန်းထားများကို တရားဝင်ထုတ်ပြန်ခဲ့ပါက မန်ယူအသင်း၏ သုံးစွဲငွေကို ပြန်လည်ကျော်လွန်ဖွယ်ရှိကြောင်းလည်း Daily Mail သတင်းစာက ဖော်ပြခဲ့သည်။
