စပိန်လက်ရွေးစင်အသင်းအတွက်ကစားပေးရန် လာပေါ့တ်အသင့်ရှိနေပြီး မေ(၂၁)ရက်နေ့တွင်ထုတ်ပြန်မည့် ယူရိုလူစာရင်းတွင် ပါဝင်လာဖွယ်ရှိ

မန်စီးတီးအသင်း၏ ပြင်သစ်နောက်ခံလူလာပေါ့တ်က သူသည် စပိန်လက်ရွေးစင်အသင်းအတွက် ကစားပေးရန် အသင့်ရှိနေကြောင်း ပြီးခဲ့သည့် ဗုဒ္ဓဟူးနေ့က အတည်ပြုခဲ့ပြီး လာမည့်မေလ (၂၁)ရက်နေ့တွင် စပိန်လက်ရွေးစင်အသင်းနည်းပြ အင်းနရစ်ထုတ်ပြန်မည့် ယူရို-၂၀၂၀ ပြိုင်ပွဲဝင် စပိန်အသင်းလူစာရင်းတွင် ပါဝင်လာဖွယ်ရှိနေကြောင်း သိရှိရသည်။

ပြင်သစ်နိုင်ငံ အနောက်တောင်ဘက်ရှိ Agen မြို့တွင်မွေးဖွားခဲ့သော လာပေါ့တ်သည် ပြင်သစ်ယူ-၁၇၊ ယူ-၁၈၊ ယူ-၁၉၊ ယူ-၂၁ အသင်းများတွင် ဆက်တိုက်ကစားခဲ့သူဖြစ်သည်။

သို့ သော် သူ၏အဖိုးအဖွားများမှာ ဘတ်စ်ကေးမျိုးနွယ်များဖြစ်ကြပြီး လာပေါ့တ်သည် စပိန်ကလပ်အသင်းများတွင် ကစားသမားအဖြစ် (၈)နှစ်ကြာဖြတ်သန်းခဲ့သည်။

စပိန်နိုင်ငံသားခံယူထားသူ လာပေါ့တ်သည် ပြင်သစ်လက်ရွေးစင်အသင်း (သို့မဟုတ်) စပိန်လက်ရွေးစင်အသင်းတွင် ကစားရန် ရွေးချယ်ခွင့်ရှိနေသူတစ်ဦးဖြစ်သည်။

လက်ရှိအချိန်အထိ ပြင်သစ်လက်ရွေးစင်အသင်းအတွက် တစ်ပွဲမျှ မကစားရသေးသော လာပေါ့တ်သည် စပိန်လက်ရွေးစင်အသင်းအတွက်သာ ကိုယ်စားပြုကစားရန် ဆုံးဖြတ်ခဲ့ခြင်းဖြစ်ကြောင်း သိရှိရသည်။

လာပေါ့တ်သည် ၂၀၁၉ ခုနှစ်က ပြင်သစ်အသင်း၌ရွေးချယ်ခံရသော်လည်း ဒဏ်ရာကြောင့် အသင်းလူစာရင်းမှ ပြန်နုတ်ထွက်ခဲ့ရသည်။

ထိုစဉ်က ပြင်သစ်အသင်းနည်းပြ ဒေးရွှမ့်က လာပေါ့တ်အား ယူရို-၂၀၂၀ ခြေစစ်ပွဲစဉ်များအတွက် ပြင်သစ်လူစာရင်းတွင် ရွေးချယ်ခဲ့ခြင်းဖြစ်သည်။