ဘာစီလိုနာအသင်း၏ ဆယ်ကျော်သက်တိုက်စစ်မှူး အန်ဆူဖာတီသည် စပိန်လက်ရွေးစင်အသင်းတွင် ပထမဆုံးအကြိမ် ရွေးချယ်ခံခဲ့ရကြောင်း သိရှိရသည်။အန်ဆူဖာတီသည် ဂီနီဘစ်ဆောနိုင်ငံတွင် မွေးဖွားခဲ့သူဖြစ်ပြီး ၂၀၁၉ ခုနှစ်တွင် စပိန်နိုင်ငံသားအဖြစ် စတင်အသိအမှတ်ပြုခံခဲ့ရသူဖြစ်သည်။
ထို့ပြင် ၂၀၁၉ အောက်တိုဘာလတွင် စပိန်ယူ-၂၁ အသင်းအတွက် စတင်ရွေးချယ်ခြင်းခံခဲ့ရပြီး ယခုအခါ စပိန်လက်ရွေးစင်အသင်းနည်းပြ လူးဝစ်အင်းနရစ်က စပိန်လက်ရွေးစင်အသင်းအတွက် ရွေးချယ်ခဲ့ခြင်းဖြစ်သည်။
စပိန်လက်ရွေးစင်အသင်းသည် စက်တင်ဘာ(၃)ရက်တွင် ဂျာမနီ၊ စက်တင်ဘာ(၆)ရက်တွင် ယူကရိန်းအသင်းတို့နှင့် Nations League ပွဲစဉ်များ ယှဉ်ပြိုင်ကစားရမည်ဖြစ်၍ လူရွေးချယ်မှု ပြုလုပ်ခဲ့ခြင်းဖြစ်သည်။
လူးဝစ်အင်းနရစ်သည် ၂၀၁၉-၂၀ ရာသီလာလီဂါတွင် ခြေစွမ်းပြခဲ့သော လူငယ်ကစားသမားများကိုလည်း ရွေးချယ်ခဲ့ပြီး အသက်(၁၇)နှစ်သာရှိသေးသည့် အန်ဆူဖာတီမှာ အငယ်ဆုံးကစားသမားဖြစ်ခဲ့သည်။
အန်ဆူဖာတီသည် ယခုရက်ပိုင်းအတွင်း အေးဂျင့်အပြောင်းအလဲပြုလုပ်ထားပြီး နာမည်ကျော်အေးဂျင့် ဂျော့ချ်မန်ဒက်စ်နှင့် စတင်လက်တွဲနေပြီဖြစ်ကြောင်းလည်း သိရှိရသည်။
