စပါးအသင်း၏ ဒဏ်ရာရကစားသမားစာရင်းတွင် တိုက်စစ်ကစားသမား ဘာ့ဂ်ဝင်းချ် နှင့် လူးကပ်စ်မော်ရာတို့ ထပ်တိုးလာပြီး စိုးရိမ်စရာအခြေအနေဖြစ်ကြောင်း နည်းပြဖြစ်သူ နူနိုက ဝန်ခံပြောကြားခဲ့သည်။
ကြာသပတေးနေ့က ယှဉ်ပြိုင်ကစားသည့် ယူရိုပါကွန်ဖရင့်လိဂ် အုပ်စုအဖွင့်ပွဲစဉ်တွင် ရန်းစ်အသင်းနှင့် စပါးအသင်းတို့ နှစ်ဂိုးစီ သရေကျခဲ့ပြီး ပွဲထွက်အဖြစ် ကစားခဲ့သော နယ်သာလန်ကစားသမား ဘာ့ဂ်ဝင်းချ်နှင့် ဘရာဇီးလ်ကစားသမား လူးကပ်စ်မော်ရာတို့ ဒဏ်ရာရရှိခဲ့ခြင်းဖြစ်သည်။ နှစ်ဦးစလုံး ခြေ ချင်းဝတ်ဒဏ်ရာရရှိခဲ့ခြင်းဖြစ်ပြီး ဘာ့ဂ်ဝင်းချ် မှာ ပထမပိုင်း မိနစ် ၃၀ နှင့် လူးကပ်စ်မော်ရာ မှာ ဒုတိယပိုင်း ၅၄ မိနစ်တွင် လူစားလဲခဲ့ရသည်။
စပါးအသင်းတွင် ဆွန်ဟောင်မင်၊ ဒိုင်ယာနှင့် ဆီဆက်နွန်တို့ ဒဏ်ရာရရှိနေပြီး တောင်အမေရိက ကစားသမားများဖြစ်သည့် ရိုမဲရိုး၊ ဆယ်လ်ဆိုနှင့် ဒါဗင်ဆန်ဆန်းချက်ဇ် တို့ Quarantine စည်းမျဉ်းကြောင့် ကစားခွင့် မရသေးသလို တန်ဂန်ဂါမှာလည်း ပြီးခဲ့သည့် တစ်ပတ်က အနီကတ်ပြစ်ဒဏ်ကြောင့် ပွဲပယ် ခံရမည်ဖြစ်သည်။ ယင်းအခြေအနေတွင် ဘာ့ဂ်ဝင်းချ်နှင့် လူးကပ်စ်မော်ရာတို့၏ ဒဏ်ရာသတင်းမှာ စပါးအသင်းအတွက် ကြီးမားသည့် ထိုးနှက်ချက်ဖြစ်စေခဲ့သည်။
“ပွင့်ပွင့်လင်းလင်းပြောရရင် ကြောက်စရာကောင်းတဲ့အခြေအနေပါပဲ။ ဘာကိုမှ ဖုံးကွယ်ထားလို့မရပါဘူး။ ဝက်ဖို့ဒ်နဲ့ပွဲပြီးက တည်းက ဖြစ်ပျက်ခဲ့သမျှကိစ္စတွေက ကျွန် တော်တို့အတွက် သိပ်မကောင်းခဲ့ပါဘူး။ ဒါ ပေမဲ့ ဘောလုံးဆိုတာ ဒါပါပဲ ။ ဒီအခြေအနေကို ကျွန်တော်တို့ ကျော်ဖြတ်ရမယ်ဆိုတာလည်း သိထားပါတယ်။ ဒီနေ့ကစားရမယ့်ပွဲအကြောင်း စဉ်းစားပြီးတော့ ဒီနေ့မှာ ကစားသမားတွေအတွက် အဖြေရှာဖို့ ကျွန် တော်တို့ ကြိုးစားခဲ့တယ်။ အဲဒါက အခက် အခဲအတားအဆီးတွေကို ကျော်ဖြတ်ဖို့ပါ။ ဒီအခြေအနေက အနာဂတ်မှာ ကျွန်တော်တို့ ကို ပိုပြီးသန်မာလာစေမယ်ဆိုတာ သေချာပါတယ်” ဟု နူနိုက ပြောကြားခဲ့သည်။
စပါးအသင်းသည် ပရီးမီးယားလိဂ်ပွဲစဉ် ၅ အဖြစ် ယနေ့တွင် လန်ဒန်ဒါဘီပြိုင်ဘက် ချယ်လ်ဆီးအသင်းနှင့် အိမ်ကွင်းယှဉ်ပြိုင်ကစားရမည်ဖြစ်သည်။
