ဝုလ်ဗ်အသင်းမှ စပိန်တောင်ပံကစားသမား အဒါမာထရာအိုရေးသည် စပါးအသင်း၏ ကမ်းလှမ်းမှုကို ငြင်းပယ်၍ ဘာစီလိုနာအသင်းထံ ပြောင်းရွှေ့ရန် ရွေးချယ်ခဲ့ကြောင်း သိရသည်။
ထရာအိုရေး(၂၆ နှစ်)ကို စပါးအသင်းက ခေါ်ယူနိုင်ရန် နီးစပ်သည့်အခြေအနေရောက် ရှိခဲ့သော်လည်း ဘာစီလိုနာအသင်း၏ ကမ်းလှမ်းမှုရောက်ရှိလာချိန်တွင် ထရာအိုရေးက စပါးအသင်းကို ငြင်းပယ်ခဲ့ခြင်းဖြစ်ကြောင်း သိရသည်။
ထရာအိုရေးသည် ဘာစီလိုနာအသင်း ၏ ကစားသမားဟောင်းတစ်ဦးဖြစ်ခဲ့ပြီး အသင်းတွင် နေရာမရဘဲ ရောင်းထုတ်ခံခဲ့ရသူဖြစ်သည်။
ဘာစီလိုနာအသင်းသည် ၂၀၁၅ ခုနှစ်တွင် ထရာအိုရေးကို ယူရို(၁၀)သန်းဝန်းကျင်ဖြင့် အက်စတွန်ဗီလာအသင်းထံ ရောင်းထုတ်ခဲ့ပြီး (၃)နှစ် အတွင်း ပြန်လည်ခေါ်ယူနိုင်သည့် သဘောတူညီ ချက်ရယူခဲ့သော်လည်း ပြန်လည်ခေါ်ယူခြင်းမရှိခဲ့ပေ။
ယခုနောက်ပိုင်းနှစ်များတွင်မှ ဘာစီလိုနာအသင်းက ထရာအိုရေးကို ပြန်လည်ခေါ်ယူရန် စိတ်ဝင်စားလာခဲ့ခြင်းဖြစ်ပြီး နည်းပြသစ် ဇာဗီလက်ထက်တွင် လက်တွေ့ကျကျကမ်းလှမ်းခဲ့ခြင်း လည်းဖြစ်သည်။
ဘာစီလိုနာအသင်းသည် ထရာအိုရေးကို ရာသီကုန်အထိ အငှားခေါ်ယူပြီး လာမည့်နွေရာသီ၌ ယူရိုသန်း(၃၀)ဖြင့် အပြီးသတ်ခေါ်ယူရန် ကမ်းလှမ်းမှုကို ဝုလ်ဗ်အသင်းကလည်း လက်ခံခဲ့ကြောင်း သိရသည်။ စာချုပ်ချုပ်ဆိုမှုကို သောကြာနေ့(ယနေ့)ပြုလုပ်ဖွယ်ရှိကြောင်း သိရသည်။
