မန်စီးတီးအသင်းနည်းပြ ဂွါဒီယိုလာအနေဖြင့် မိမိတို့၏အခက်အခဲကို နားမလည်သောကြောင့် မိမိအလုပ်ကိုသာ အာရုံစိုက်သင့်ကြောင်း မန်စီးတီးအသင်း တရားဝင် အားပေးသူများအဖွဲ့ အထွေထွေအတွင်းရေးမှူးဖြစ်သူက တုံ့ပြန်ပြောကြားခဲ့သည်။
ဗုဒ္ဓဟူးနေ့က လိုက်ပ်ဇစ်အသင်းနှင့် ယှဉ်ပြိုင်ကစားသည့် ချန်ပီယံလိဂ်အုပ်စုအဖွင့် ပွဲစဉ်တွင် ပရိသတ် ၅၅၀၀၀ ဝင်ဆံ့သည့် အီတီဟတ်ကွင်းအတွင်း ၃၈၀၀၀ ကျော်သာ လာရောက်ကြည့်ရှုခဲ့သဖြင့် ဆောက်သမ်တန်နှင့်ပွဲတွင် ပရိသတ်များ ပိုမိုလာရောက်အားပေးရန် ဂွါဒီယိုလာက တိုက်တွန်းခဲ့သည်။
သို့သော် ၎င်း၏မှတ်ချက်စကားကို ပရိသတ်များအဖွဲ့ အထွေထွေအတွင်းရေးမှူး ကယ်ဗင်ပါကားက “ဗုဒ္ဓဟူးနေ့ ည ၈ နာရီ အီတီဟတ်မှာကစားတဲ့ပွဲကို ကြည့်ခွင့်ရဖို့ တချို့လူတွေမှာ ဘယ်လိုအခက်အခဲတွေရှိလဲ ဆိုတာ သူနားမလည်ပါဘူး။ COVID နဲ့ပတ်သက်တဲ့ ကိစ္စတွေကလည်း ရှိနေပါသေးတယ်။ သူက ကမ္ဘာ့အကောင်းဆုံးနည်းပြဆိုတာ သေချာပါတယ်။ ဒါပေမဲ့ ကိုယ့်အလုပ်ကိုပဲ အာရုံစိုက်သင့်တယ်လို့ထင်တယ်”ဟု တုံ့ပြန်ခဲ့သည်။
မနေ့ကယှဉ်ပြိုင်ကစားခဲ့သည့် ဆောက်သမ်တန်နှင့်ပွဲတွင် ပရိသတ် ၅၀၀၀၀ ကျော်လာရောက်ကြည့်ရှုခဲ့သော်လည်း မန်စီးတီးအသင်းသည် ဆောက်သမ်တန်အသင်းအား အနိုင်မရခဲ့ပဲ ဂိုးမရှိသရေဖြင့်သာ ကျေနပ်ခဲ့ရသည်။
