ချယ်လ်ဆီးအသင်းသည် အသင်းဂန္ထဝင်ကစားသမား ဂျွန်တယ်ရီ ဝတ်ဆင်ခဲ့သည့် ကျောနံပါတ် (၂၆) ဂျာစီအား နောက်ခံလူသစ် ကူလီဘလီအား ပေးအပ်ခဲ့ရာ အသင်းပရိသတ်များ ဒေါသထွက်နေခြင်းကြောင့် ယင်းနံပါတ်မှာ အတည်မဟုတ်သေးကြောင်း ထုတ်ပြန်ခဲ့ရသည်။
ချယ်လ်ဆီးအသင်းသည် ရူဒီဂါနှင့် ခရစ္စတန်ဆင်တို့ ထွက်ခွာသွားသည့် ခံစစ်ပိုင်းအတွက် နာပိုလီအသင်းမှ ဆီနီဂေါလက်ရွေးစင်နောက်ခံလူ ကူလီဘလီကို ပေါင် (၃၄)သန်း ဖြင့်ခေါ်ယူကာ ၂၀၂၆ ခုနှစ်အထိ သက်တမ်းရှိ စာချုပ်တစ် ရပ်ချုပ်ဆိုခဲ့သည်။
ချယ်လ်ဆီးအသင်းသည် နောက်ခံလူသစ် ကူလီဘလီအား အသင်းဂန္ထဝင်နောက်ခံလူ ဂျွန်တယ်ရီ ဝတ်ဆင်ခဲ့သည့် နာမည်ကျော် ကျောနံပါတ် (၂၆)ဂျာစီကို ပေးအပ်ခဲ့ခြင်းဖြစ်သည်။
သို့သော် ချယ်လ်ဆီးအသင်း၏လုပ်ရပ်မှာ အသင်းပရိသတ်များအတွက် မနှစ်မြို့စရာဖြစ်ခဲ့ပြီး လူမှုကွန်ရက်တွင် အသင်းကို ဝေဖန်မှုများပြုလုပ်ခဲ့ကြသည်။
၂၀၁၈ ခုနှစ်တွင် ကစားသမားဘဝမှ အနားယူခဲ့သည့် အင်္ဂလန်နောက်ခံလူဟောင်း ဂျွန်တယ်ရီသည် ချယ်လ်ဆီးအသင်းတွင် ၁၉၉၈ ခုနှစ်မှ ၂၀၁၇ ခုနှစ်အထိကစားခဲ့ပြီး အသင်းသမိုင်းတစ်လျှောက် ကြီးကျယ်ခမ်းနားဆုံးကစားသမားတစ်ဦးအဖြစ် သတ်မှတ်ခံထားရသူဖြစ်သည်။
ချယ်လ်ဆီးအသင်းသည် အသင်းမှ ဂျွန်တယ်ရီ ထွက်ခွာသွားပြီးကတည်းက ၎င်းဝတ်ဆင်ခဲ့သည့် ကျောနံပါတ် (၂၆)ဂျာစီကို အနားပေးထားပြီး ယခုအချိန်တွင် ကူလီဘလီကို ယင်းနံပါတ်အား ပေးအပ်ခဲ့ခြင်းဖြစ်သည်။
အသက် (၃၁)နှစ်အရွယ်ရှိ ကူလီဘလီသည် ယခင်ကလပ် နာပိုလီအသင်းတွင်လည်း ကျောနံပါတ် (၂၆)ကို ဝတ်ဆင်ခဲ့သူဖြစ်သည်။
ချယ်လ်ဆီးအသင်းသည် အသင်းပရိသတ်များ၏ ဝေဖန်မှုထွက်ပေါ်လာပြီးနောက် ကူလီဘလီအနေဖြင့် ကျောနံပါတ် (၂၆)ကို ရာသီကြိုတွင်သာ ဝတ်ဆင်မည်ဖြစ်ပြီး အတည်မဟုတ်သေးကြောင်း ထုတ်ပြန်ခဲ့သည်။
ချယ်လ်ဆီးပရိသတ်များက ဂျွန်တယ်ရီ၏ ကျောနံပါတ် (၂၆)ကို ထာဝရ အနားပေးသင့်ပြီး ကူလီဘလီအနေဖြင့် နံပါတ် (၄)ဂျာစီကို ဝတ်ဆင်နိုင်ကြောင်း မှတ်ချက်ပြုခဲ့ကြသည်။
