ဂျေးဇူးနှင့် ရာဖင်ညာတို့ကို ခေါ်ယူနိုင်ရန် နီးစပ်နေသည့် အာဆင်နယ်အသင်း ဘရာဇီးလ်ကစားသမား အများဆုံးပိုင်ဆိုင်သည့်ရာသီ ဖြစ်လာဖွယ်ရှိနေ

အာဆင်နယ်အသင်းသည် မန်စီးတီးအသင်းမှ တိုက်စစ်မှူး ဂျေးဇူးနှင့် လိဒ်စ်အသင်းမှ တောင်ပံကစားသမား ရာဖင်ညာတို့ကို ခေါ်ယူနိုင်ရန် နီးစပ်နေပြီးနောက် ဘရာဇီးလ်ကစားသမားအများဆုံးပိုင်ဆိုင်သည့်ရာသီ ဖြစ်လာဖွယ်ရှိနေကြောင်း သိရသည်။

မီဒီယာများ၏ ဖော်ပြမှုအရ အာဆင်နယ်အသင်းသည် မန်စီးတီးမှ ဘရာဇီးလ်တိုက်စစ်မှူး ဂျေးဇူးကို ပေါင်(၄၅)သန်းဖြင့်ခေါ်ယူရန် သဘောတူညီမှုရရှိထားပြီး အသေးစိတ်အချက်အလက်များ ဆွေးနွေးရန်သာ ကျန်ရှိတော့သည်ဟု သိရသည်။

အပြောင်းအရွှေ့ကျွမ်းကျင်သူ ဖာဘရီဇီယိုရိုမာနိုက အာဆင်နယ်အသင်းနှင့် မန်စီးတီးအသင်းတို့ကြား ရာနှုန်းပြည့်သဘောတူညီမှု ရရှိခဲ့ပြီဖြစ်သလို၊ အာဆင်နယ်အသင်းနှင့် ဂျေးဇူးတို့မှာလည်း ပုဂ္ဂိုလ်ရေးဆိုင်ရာ သဘောတူညီမှု ရရှိခဲ့ပြီဖြစ်ပြီး (၅)နှစ်စာချုပ် ချုပ်ဆိုလိမ့်မည်ဟု ဖော်ပြခဲ့သည်။

ထို့ပြင် လိဒ်စ်အသင်းမှ ဘရာဇီးလ်တောင်ပံကစားသမား ရာဖင်ညာကိုလည်း ပေါင်သန်း(၅၀)ဝန်းကျင်ဖြင့် ခေါ်ယူနိုင်ရန် နီးစပ်နေပြီဖြစ်ကြောင်း ဗြိတိန်မီဒီယာများက ဖော်ပြနေကြသည်။

အာဆင်နယ်အသင်းသည် ယခုနွေရာသီတွင် ဆော်ပေါ်လိုအသင်းမှ ဆယ်ကျော်သက်ဘရာဇီးလ်တောင်ပံကစားသမား မာကင်ဟို့စ်ကို ခေါ်ယူထားပြီးဖြစ်သောကြောင့် ဂျေးဇူးနှင့် ရာဖင်ညာတို့ အမှန်တကယ်ရောက်ရှိလာခဲ့ပါက ဘရာဇီးလ်ကစားသမား (၅)ဦးအထိ ရှိလာမည်ဖြစ်သည်။

ယင်းအရေအတွက်မှာ အာဆင်နယ်အသင်း၏ သက်တမ်းတစ်လျှောက် ဘရာဇီးလ်ကစားသမားအများဆုံးပိုင်ဆိုင်သည့်ရာသီအဖြစ် မှတ်တမ်းဝင်မည်ဖြစ်သည်။

အာဆင်နယ်အသင်းသည် ပရီးမီးယားလိဂ်ခေတ်၌ ပြည်ပကစားသမားများကို ခေါ်ယူအသုံးပြုမှုများပြားသည့် အသင်းတစ်သင်းဖြစ်သော်လည်း ဘရာဇီးလ်ကစားသမား ခေါ်ယူမှုမှာမူ မာကင်ဟို့စ်အပါအဝင် (၁၅)ဦးသာရှိခဲ့သည်။

ယခင်က တစ်ရာသီအတွင်း အများဆုံးပိုင်ဆိုင်မှုမှာ (၄)ဦးသာရှိခဲ့ပြီး ၂၀၂၀-၂၁ ရာသီ၌ ဂါဘရီယဲလ်၊ ဒေးဗစ်လူးဝစ်ဇ်၊ ဝီလီယံနှင့် မာတင်နယ်လီတို့ကို ပိုင်ဆိုင်ခဲ့ခြင်းဖြစ်သည်။

ယခုအခါ ဂါဘရီယဲလ်၊ မာတင်နယ်လီနှင့် မာကင်ဟို့စ်တို့ရှိနေပြီး ဂျေးဇူးနှင့် ရာဖင်ညာတို့ ရောက်ရှိလာခဲ့ပါက ဘရာဇီးလ်ကစားသမား (၅)ဦးဖြစ်သွားမည်ဖြစ်သည်။

ထို့ကြောင့် နည်းစနစ်ဒါရိုက်တာအဖြစ် တာဝန်ယူထားသော ဘရာဇီးလ်သား အီဒူးက ဘရာဇီးလ်ကစားသမားများကို ပိုမိုစုဆောင်းနေခြင်းဖြစ်ကြောင်း သုံးသပ်မှုများလည်း ရှိနေသည်။

ပရီးမီးယားလိဂ်ခေတ်၌ အာဆင်နယ်အသင်းတွင် ကစားခဲ့ဖူးသည့် ဘရာဇီးလ်ကစားသမားများ

အမည် နေရာ ကာလ

ဆယ်လ်ဗင်ဟို နောက်တန်း ၁၉၉၉ – ၂၀၀၁

ဂျူအန် ကွင်းလယ် ၂၀၀၁ – ၂၀၀၃

အီဒူး ကွင်းလယ် ၂၀၀၂ – ၂၀၀၅

ဂီလ်ဘာတိုဆေးလ်ဗား ကွင်းလယ် ၂၀၀၂ – ၂၀၀၈

ဘက်တစ္စတာ ကွင်းလယ် ၂၀၀၆ –

ဒီနယ်လ်ဆင် ကွင်းလယ် ၂၀၀၆ – ၂၀၁၁

ဘိုတယ်လ်ဟို နောက်တန်း ၂၀၀၇ – ၂၀၁၁

ဝယ်လင်တန်ဆေးလ်ဗား တိုက်စစ် ၂၀၁၁ – ၂၀၁၃

အန်ဒရေဆန်းတို့စ် ကွင်းလယ် ၂၀၁၁ -၂၀၁၃

ပယ်လစ္စတာ နောက်တန်း ၂၀၁၅ – ၂၀၁၇

ဒေးဗစ်လူးဝစ်ဇ် နောက်တန်း ၂၀၁၉ – ၂၀၂၁

မာတင်နယ်လီ တိုက်စစ် ၂၀၁၉ – လက်ရှိ

ဝီလီယံ တိုက်စစ် ၂၀၂၀ – ၂၀၂၁

ဂါဘရီယဲလ် နောက်တန်း ၂၀၂၀ – လက်ရှိ

မာကင်ဟို့စ် တိုက်စစ် ၂၀၂၂ – လက်ရှိ