ဆွာရက်ဟာ ဂျူဗီ ကို ပြောင်းရွှေ့ အတွက် စာချုပ် ဆိုင်ရာ အချက်အလက်တွေက သဘောတူညီမှု ရရှိထားပြီးပြီ ဖြစ်ပါတယ်။ သူဟာ တူရင် ကလပ် နဲ့ 3 နှစ် စာချုပ် + တစ်နှစ် လုပ်ခ ယူရို 10 သန်း နဲ့ စာချုပ် ချုပ်ဆိုမှာပါ။
သို့သော် အပြောင်းအရွှေ့ ကိစ္စတွေ ရှေ့မဆက်ခင်မှာ သူ့အနေနဲ့ ဂျူဗီ ကစားသမား စာရင်း ရဲ့ Non-European ပတ်စပို့ ကိုင်ဆောင်ထားသူ မဖြစ်ဖို့ အတွက် လုပ်ဆောင်ရဦးမှာ ဖြစ်ပါတယ်။ တစ်နည်း အားဖြင့် ဆိုရရင် အီတလီ ပတ်စ်ပို့ ရယူနိုင်ဖို့ အတွက် ဘာသာစကား ဆိုင်ရာ စာမေးပွဲ ဝင်ရောက် ဖြေဆိုရဦးမှာပါ။
ဘာစီလိုနာ မှာ ကစားစဉ် ကတော့ စပိန် အစိုးရက သတ်မှတ်ထားတဲ့ စည်းမျဉ်းတွေဟာ ဇနီး ဖြစ်သူ ဆိုဖီယာ ရဲ့ ပတ်စပို့ ကြောင့် အဆင်ပြေသွားခဲ့ပါတယ်။ သို့သော် အီတလီ ကို ပြောင်းရွှေ့ ကစားဖို့ အကြောင်းဖန်လာချိန်မှာတော့ သူမရဲ့ ပတ်စ်ပို့ တစ်ခုတည်းနဲ့ မလုံလောက်တော့ပါဘူး။
ဒါကြောင့် ဆွာရက်ဟာ ဒီကနေ့မှာပဲ စပိန် က အီတလီ ကောင်စစ်ဝန်ရုံး ကို သွားရောက်ကာ ၊ အီတလျံ ဘာသာစကား စာမေးပွဲကို ဖြေဆိုသွားမှာ ဖြစ်ပါတယ်။ အဲဒီ ကနေ ထွက်ပေါ်လာတဲ့ ရလာဒ်က အောင်မှတ် ဖြစ်မှသာ အပြောင်းအရွှေ့ ကိစ္စတွေ ရှေ့ဆက်နိုင်ဖို့ ခွင့်ပြုချက် ရရှိမှာပါ။
အီတလီ က သတင်းတွေ ကတော့ ဆိုဖီယာ ရဲ့ မျိုးဆက် ဇယားမှာ အီတလီ နွယ်ဝင်တွေ ပါဝင်ထားတာကြောင့် ၊ ဆွာရက် ပတ်စပို့ ရဖို့ ကိစ္စဟာ သိပ်ပြီး မခက်နိုင်ဘူးလို့ သုံးသပ်နေကြပါတယ်။
ဘာာစီလိုနာ နဲ့ ဆွာရက် တို့အကြားက စာချုပ် ဆိုင်ရာ အငြင်းပွားနေတဲ့ ကိစ္စကတော့ နောက်ဆုံးမှာ နှစ်ဖက် သဘောတူညီမှု နဲ့ ဖျက်သိမ်းပြီး အလွတ်ကြေး နဲ့ ထွက်ခွာခွင့် ရရှိလိမ့်မယ်လို့ သတင်းတွေ ထွက်လာပါတယ်။
ဆွာရက်ဟာ လက်ရှိ စာချုပ်သက်တမ်း တစ်နှစ် အပြင် ၊ အလိုအလျှောက် သက်တမ်း တိုးခွင့်က နောက်တစ်နှစ် အထိ ရှိသေးတာပါ။ အဲဒီ အလိုအလျှောက် သက်တမ်း တိုးခွင့်ဆိုတာ ၊ ဆွာရက် ရဲ့ 2020-2021 ဘောလုံးရာသီ အတွင်း ဘာစီလိုနာ အတွက် ပါဝင် ကစားပေးနိုင်တဲ့ အရေအတွက် ကို မူတည်ကာ ချုပ်ဆိုပေးရမှာ ဖြစ်ပါတယ်။
တစ်နည်းအားဖြင့် ဆိုရရင် နည်းပြ ရော်နယ်ကိုးမန်း သာ သတ်မှတ်ထားတဲ့ ပွဲအရေအတွက် အထိ ဆွာရက်ကို ထည့်သွင်း ကစားစေခဲ့ရင် ၊ ကလပ် အသင်းအနေနဲ့ ဥရုဂွေး တိုက်စစ်မှုးကြီးကို လိုအပ်သည် ဖြစ်စေ ၊ မလိုအပ်တော့သည် ဖြစ်စေ ၊ သက်တမ်းတိုးပေးရမှာ ဖြစ်ပါတယ်။
ဒါကြောင့် နယ်သာလန် နည်းပြကြီးဟာ အစောပိုင်း ကတည်းက ဆုံးဖြတ်ချက် ကို ပြတ်ပြတ်သားသား ချမှတ်ပြီး ၊ သူ့ စီမံကိန်းတွေထဲမှာ မလိုအပ်တော့ကြောင်း အသိပေးထားခဲ့တာ ဖြစ်ပါတယ်။
လက်ရှိမှာတော့ ကစားသမားဟာ လေ့ကျင့်ခန်း အစီအစဉ်တွေကို သီးသန့် လုပ်ဆောင်လျှက် ရှိနေပါတယ်။
ဆွာရက် ဟာ ဘာစီလိုနာ အတွက် စုစုပေါင်း 283 ပွဲ အထိ ပါဝင် ကစားပေးထားပြီး ၊ 198 ဂိုး သွင်းယူကာ ၊ 109 ကြိမ် ဂိုးဖန်တီးမှု ပြုလုပ်ပေးထားပါတယ်။
ပြီးခဲ့တဲ့ ဘောလုံးရာသီမှာတော့ ဒဏ်ရာပြသနာတွေ နဲ့ ရုန်းကန်ခဲ့ရတာကြောင့် ပြိုင်ပွဲပေါင်းစုံမှ 36 ပွဲသာ ပါဝင် ကစားပေးနိုင်ခဲ့ပြီး ၊ လာလီဂါ ပြိုင်ပွဲမှာ ဆိုရင် 10 ပွဲ အထိတောင် လွဲချော်ခဲ့ရသူပါ။ သို့သော် သွင်းဂိုးနှုန်းကတော့ 21 ဂိုး + ဂိုးဖန်တီးမှု 12 ကြိမ် အထိ ရှိခဲ့တာကြောင့် စွမ်းဆောင်ရည်ပိုင်းမှာ လုံး၀ ကျဆင်းသွားခြင်း မရှိသေးဘူးလို့ မှတ်ချက်ပေးရမှာပါ။
နည်းပြ ရော်နယ် ကိုးမန်း က သူ့ရဲ့ နေရာကို အစားထိုးဖို့ အတွက် လီယွန် က တိုက်စစ်မှုး ဒီပေး ကို ချိတ်ဆက်လျှက် ရှိနေတယ်လို့ သတင်းတွေ ပေါ်ထွက်ထားပါတယ်။
