ဂျူဗင်တပ်စ်အသင်းမှ နယ်သာလန် လက်ရွေးစင်နောက်ခံလူ ဒီလစ်ကို ခေါ်ယူပြီးနောက် ယခုနွေရာသီအပြောင်းအရွှေ့ကာလအတွင်း ငွေကြေးသုံးစွဲမှုအများဆုံးအသင်းအဖြစ် ဘိုင်ယန်မြူးနစ်အသင်းက ထိပ်ဆုံးရောက်ရှိလာကြောင်း သိရသည်။
ဘိုင်ယန်မြူးနစ်အသင်းသည် အသက် ၂၂ နှစ်အရွယ် ခံစစ်အတွင်းလူ ဒီလစ်ကို ကနဦးပြောင်းရွှေ့ကြေး ယူရိုသန်း ၇၀ နှင့် Add-ons ကြေး ယူရို ၁၀ သန်းဖြင့် ခေါ်ယူကာ ဇူလိုင်လ ၁၉ ရက်တွင် ငါးနှစ်စာချုပ်ချုပ် ဆိုပြီးနောက် ယခုနွေရာသီကာလအတွင်း အသင်း၏အပြောင်းအရွှေ့အသုံးစရိတ်မှာ စုစုပေါင်း ယူရို ၁၂၀ ဒသမ ၅ သန်းအထိ ရှိလာခဲ့သည်။
ဘိုင်ယန်အနေဖြင့် ကစားသမားသစ် လေးဦး ခေါ်ယူထားပြီး ယခင်ရောက်ရှိထားသည့် သုံးဦးတွင် လီဗာပူးလ်တိုက်စစ်ကစားသမား မာနေကို ယူရို ၃၂ သန်း၊ အေဂျက်စ်အသင်းမှ နယ်သာလန်လက်ရွေးစင် ကွင်းလယ်လူ ဂရာဗန်ဘာ့ချ်ကို ယူရို ၁၈ ဒသမ ၅ သန်းပေးချေခဲ့ရကာ အေဂျက်စ်မှပင်ဖြစ်သည့် မော်ရိုကိုနောက်ခံလူ မက်ဇူဟာကိုမူ ပြောင်းရွှေ့ကြေးအလွတ်ဖြင့် ရရှိခဲ့ခြင်းဖြစ်သည်။
ဘိုင်ယန်အသင်း၏ အပြောင်းအရွှေ့ များ ပြီးဆုံးဖွယ်မရှိသောကြောင့် အသုံးစရိတ်ပေါင်းမှာ ထပ်မံမြင့်တက်လာမည့် အနေအထားရှိနေသည်။ လက်ရှိတွင် လိုက်ပ်ဇစ်ကွင်းလယ်လူ လိုင်မာနှင့် ရန်းစ်ကြယ်ပွင့်တိုက်စစ်ကစားသမား မာသီတဲလ်တို့အား ခေါ်ယူရန် စိတ်ဝင်စားနေပြီး ယင်းကစားသမား နှစ်ဦးအတွက် ပြောင်းရွှေ့ကြေးမှာ ယူရို သန်း ၄၀ နှင့် ၅၀ ကြား အသုံးပြုရဖွယ်ရှိသည်။
ယခင်ထိပ်ဆုံးနေရာတွင်ရှိသည့် မန်စီးတီးအသင်းမှာ ဒေါ့မွန်တိုက်စစ်မှူး ဟော်လန်းအား ယူရို သန်း ၆၀၊ လိဒ်စ်ကွင်းလယ်လူ ကယ်လ်ဗင်ဖီးလစ်အား ယူရို ၄၈ ဒသမ ၇၅ သန်းဖြင့်ခေါ်ယူထားကာ ယူရို ၁၀၈ ဒသမ ၇၅ သန်းအထိ သုံးစွဲထားခြင်းဖြစ်သည်။ မန်စီးတီးအနေဖြင့် ဘရိုက်တန်နောက်ခံလူ ကူကူရယ်လာကိုလည်း ခေါ်ယူရန် နီးစပ်နေသဖြင့် ဘိုင်ယန်မြူးနစ်ကို ပြန်လည်ကျော်တက်နိုင်မည့် အနေအထားရှိနေသည်။
ငွေသုံးစွဲမှု တတိယအများဆုံးနေရာတွင် လိဒ်စ်အသင်းက အသင်းကြီးများကို ကျော်ဖြတ်ကာ အံ့အားသင့်ဖွယ် ရပ်တည်လျက်ရှိသည်။ လိဒ်စ်အသင်းသည် ရာဖင်ညာ၊ ကယ်လ်ဗင် ဖီးလစ်တို့အား ရောင်းချထားမှုမှာ ယူရို ၁၀၆ သန်းကျော် ရရှိထားပြီး ကစားသမားသစ်ခေါ် ယူမှုအတွက်မူ ယူရို ၁၀၅ ဒသမ ၆၄ သန်းအ ထိ ပြန်လည်အသုံးပြုထားခြင်းဖြစ်သည်။
ယင်းအသင်းများနောက်တွင် ဘာစီလိုနာ (ယူရို ၁၀၃ သန်း)၊ စပါး(ယူရို ၁၀၁.၉ သန်း)၊ အာဆင်နယ်(ယူရို ၉၇.၀၆ သန်း)၊ ချယ်လ်ဆီး (ယူရို ၉၄.၂ သန်း)၊ ဒေါ့မွန်(ယူရို ၈၆ သန်း)၊ လီဗာပူးလ်(ယူရို ၈၅.၈ သန်း)၊ ရီးယဲလ်မက် ဒရစ်(ယူရို သန်း ၈၀)၊ PSG (ယူရို ၇၉.၅ သန်း)၊ မန်ယူ(ယူရို ၇၂.၃၇ သန်း)ဖြင့် ရှိနေ ကြသည်။ ထိပ်သီးအသင်းများ၏ပြင်ဆင်မှု မပြီးသေးသောကြောင့် အပြောင်းအလဲများစွာ ဖြစ်ပေါ်ဖွယ်ရှိသည်။
