ဂျူဗင်တပ်စ်ကွင်းလယ်လူ ပေါ့ဘာသည် ရာသီကြို လေ့ကျင့်ခန်းအစီအစဉ်တွင် ရရှိခဲ့သည့် ဒူးဒဏ်ရာကြောင့် (၂)လခန့် အနားယူရနိုင်ကြောင်း အီတလီမီဒီယာများက ဖော်ပြခဲ့ကြသည်။
ဂျူဗင်တပ်စ်အသင်း၏ကြေညာချက်တွင် ပြင်သစ်လက်ရွေးစင်ကွင်းလယ်လူ ပေါ့ဘာ၏ဒူးဒဏ်ရာကို အထူးကုသမားတော်တစ်ဦးနှင့် တိုင်ပင်ကာ စမ်းသပ်စစ်ဆေးမှုများ ထပ်မံပြုလုပ်သွားမည်ဟု ထုတ်ပြန်ခဲ့သည်။
ပေါ့ဘာသည် ယင်းဒဏ်ရာကြောင့် ကုသမှုများခံယူရန် အမေရိကန်မှ အီတလီသို့ ပြန်လာခဲ့ပြီး ဇူလိုင်လ (၂၆) ရက်က ယှဉ်ပြိုင်ကစားခဲ့သည့် ဘာစီလိုနာနှင့် ရာသီကြိုခြေစမ်းပွဲတွင်လည်း ပါဝင်နိုင်ခြင်းမရှိခဲ့ကြောင်း သိရသည်။
ပေါ့ဘာသည် အသင်းဟောင်း ဂျူဗင်တပ်စ်သို့ ပြောင်းရွှေ့ကြေးအလွတ်ဖြင့် ပြန်လည်ရောက်ရှိလာပြီးနောက် နှစ်ပတ်အကြာတွင် ယင်းဒဏ်ရာရရှိခဲ့ခြင်းဖြစ်ပြီး ခွဲစိတ်ကုသမှု ခံယူရခြင်း ရှိ၊ မရှိကို အထူးကုသမားတော်မှ ဆုံးဖြတ်ချက်ချဖွယ်ရှိသည်ဟု Football Italia သတင်းဌာနမှ ဖော်ပြခဲ့သည်။
ယင်းဒဏ်ရာများသည် ခွဲစိတ်ကုသမှုမလိုအပ်လျှင် ရက်သတ္တပတ် (၂)ပတ် သို့မဟုတ် (၃)ပတ်ခန့် အနားယူရ ပြီး ခွဲစိတ်ခဲ့လျှင်မူ အနည်းဆုံး တစ်လခန့် အနားယူရနိုင်ကြောင်း သိရသည်။
Gazzetta dello Sport ကမူ ပေါ့ဘာ၏ဒဏ်ရာသည် ခွဲစိတ်ကုသမှုခံယူရမည့် ဒဏ်ရာအမျိုးအစားဟု ဖော်ပြခဲ့ပြီး ရက်သတ္တပတ် (၆)ပတ် သို့မဟုတ် (၈)ပတ်ခန့် အနားယူရနိုင်ကြောင်း အတိအလင်း ရေးသားခဲ့သည်။
ပေါ့ဘာသည် ပြီးခဲ့သည့်ဧပြီလက လီဗာပူးလ်အသင်းအား (၀-၄)ဂိုးဖြင့် အရေးနိမ့်သည့်ပွဲတွင် ခြေသလုံးကြွက်သားဒဏ်ရာ ရရှိပြီးကတည်းက အနားယူခဲ့ရပြီး ဂွါဒါလာဂျာရာနှင့်ပွဲတွင်မှ ပထမဆုံးပွဲပြန်လည်ကစားနိုင်ခြင်းဖြစ်သည်။
အသက်(၂၉)နှစ်အရွယ်ရှိ ပေါ့ဘာသည် ၂၀၁၉-၂၀ ရာသီမှစတင်ကာ ဒဏ်ရာ (၈)ကြိမ်အထိ ရရှိခဲ့ပြီး အဆိုပါ(၃၃)လတာအတွင်း နေမကောင်းဖြစ်မှု သို့မဟုတ် ဒဏ်ရာရရှိမှုကြောင့် ပွဲစဉ်ပေါင်း (၇၂)ပွဲအထိ လွဲချော်ခဲ့ရသည်။
၂၀၁၉-၂၀ ရာသီမှာ ပေါ့ဘာအတွက် အခြေအနေအဆိုးဆုံးဖြစ်ပြီး ခြေချင်းဝတ်ဒဏ်ရာ (၂)ကြိမ် ရရှိမှုကြောင့် ပရီးမီးယားလိဂ်ပွဲစဉ်ပေါင်း (၁၉)ပွဲသာ ကစားရကာ ပြိုင်ပွဲစုံ ပွဲ(၄၀)အထိ လွဲချော်ခဲ့ရသည်။
ဂျူဗင်တပ်စ်သို့ တစ်ကျော့ပြန်လာရာတွင်လည်း ပရိသတ်အချို့က သူ၏ဒဏ်ရာအခြေအနေနှင့်ပတ်သက်ပြီး စိုးရိမ်ပူပန်မှုများ ရှိခဲ့သည်။
ဂျူဗင်တပ်စ်အသင်းသည် သြဂုတ်လ (၁၅)ရက်တွင် ဆာဆူအိုလိုအသင်းနှင့် စီးရီးအေရာသီအဖွင့်ပွဲစဉ် ကစားရမည်ဖြစ်ပြီး ယင်းပွဲအမီ ကြံ့ခိုင်မှု ပြည့်ဝရန် ရုန်းကန်ရမည့်အနေအထားဖြစ်သည်။
ဂျူဗင်တပ်စ်အနေဖြင့် အသင်းကွင်းလယ်ကစားသမားများဖြစ်သည့် အာသာနှင့် ရာဘီယူတို့ကို ယခုနွေရာသီအပြောင်း အရွှေ့ကာလအတွင်း ရောင်းချသွားဖွယ်ရှိနေရာ ယခု ပေါ့ဘာ ဒဏ်ရာရရှိမှုကြောင့် အသင်း၏ အပြောင်းအရွှေ့အစီအစဉ်များ အပြောင်းအလဲဖြစ်လာနိုင်ကြောင်း အီတလီသတင်းများက ဖော်ပြခဲ့သည်။
