ဂရီးလစ်ရှ်ကို ဗြိတိန်စံချိန်တင်ပြောင်းရွှေ့ကြေးဖြင့် ခေါ်ယူရန် မန်စီးတီးအသင်း နီးစပ်နေ

မန်စီးတီးအသင်းသည် အက်စတွန်ဗီလာအသင်းခေါင်းဆောင် ဂရီးလစ်ရှ်ကို ဗြိတိန်စံချိန်တင်ပြောင်းရွှေ့ကြေးဖြင့် ခေါ်ယူရန် နီးစပ်နေပြီဖြစ်ကြောင်း ဗြိတိန်သတင်းစာ Daily Mail က ဖော်ပြခဲ့သည်။

မန်စီးတီးအသင်းသည် အသက် (၂၅)နှစ်အရွယ်ရှိ အင်္ဂလန်ကွင်းလယ်လူ ဂရီးလစ်ရှ်ကို ပေါင် (၁၀၀)သန်းဖြင့် ကမ်းလှမ်းထားပြီး အပြောင်းအရွှေ့ကိစ္စအတွက် အက်စတွန်ဗီလာအသင်းနှင့်ဆွေးနွေးနေကြောင်း ဗြိတိန်မီဒီယာများက ဖော်ပြနေကြသည်။

မန်စီးတီးအသင်း၏ ကမ်းလှမ်းမှုကို အက်စတွန်ဗီလာအသင်း လက်ခံခဲ့မည်ဆိုပါက ဂရီးလစ်ရှ်သည် ဗြိတိန်ကလပ်အသင်းများ ခေါ်ယူသည့် ကစားသမားထဲတွင် ပြောင်းရွှေ့ကြေးအများဆုံးအဖြစ် စံချိန်တင်နိုင်မည်ဖြစ်သည်။

လက်ရှိတွင် ဗြိတိန်ကလပ်အသင်း ခေါ်ယူသည့် ကစားသမားများထဲတွင် ပြောင်းရွှေ့ကြေးအများဆုံးအဖြစ် မန်ယူကွင်းလယ်လူ ပေါ့ဘာက ရပ်တည်နေသည်။

မန်ယူအသင်းသည် ၂၀၁၆ နွေရာသီအပြောင်းအရွှေ့ကာလတွင် ပြင်သစ်ကွင်းလယ်လူ ပေါ့ဘာကို ပေါင် (၈၉)သန်းဖြင့် ခေါ်ယူခဲ့ခြင်းဖြစ်ပြီး ယင်းမှာ ဗြိတိန်ကလပ်အသင်းများထဲတွင် ပြောင်းရွှေ့ကြေးအများဆုံးအဖြစ် မှတ်တမ်းဝင်နေခြင်းဖြစ်သည်။

မန်စီးတီးအသင်းသည် ဂရီးလစ်ရှ်အတွက် ပြောင်းရွှေ့ကြေးကို ပေါင်သန်း (၁၀၀) ပေးချေသွားမည်ဖြစ်သလို၊ ၎င်းကိုလည်း တစ်ပတ်လစာ ပေါင် (၂၀၀၀၀၀) ကျော် ပေးချေသွားရန် စီစဉ်နေကြောင်း Daily Mail က ဖော်ပြခဲ့သည်။