မန်ချက်စတာ ယူနိုက်တက် အသင်းရဲ့ လူငယ် ကြယ်ပွင့် တိုက်စစ် ကစားသမားလေး ဖြစ်တဲ့ မေဆွန် ဂရင်းဝုဒ်ဟာ ဒီလထဲ အဂ်လန်တို့ အိုင်ယာလန် အသင်း နဲ့ ကစားမယ့် ခြေစမ်းပွဲ ၊ ဘယ်လ်ဂျီယံ ၊ အိုက်စလန် အသင်း တွေနဲ့ ရင်ဆိုင် ရမယ့် ဥရောပ နေးရှင်းလိဂ် ပွဲစဉ် တွေမှာ ပါဝင် ကစားပေး နိုင်မှာ မဟုတ်တော့ ပါဘူး ။
သူဟာ ပြီးခဲ့တဲ့ တစ်ကြိမ် တုန်းက အင်္ဂလန် လက်ရွေးစင် အသင်း အတွက် ပထမဆုံး အကြိမ် ပွဲထွက် ကစားပေးခွင့် ရရှိ ခဲ့စဉ် ၊ အိုက်စလန် မြေမှာ အသင်းဖော် ဖိုဒန် နဲ့ အတူ မော်ဒယ် အချို့ နဲ့ ညလုံးပေါက် ပျော်ပါး ခဲ့ပြီး နိုင်ငံ ရဲ့ သတ်မှတ် ထားခဲ့တဲ့ ကိုဗစ် စည်းမျဉ်းကို ချိုးဖောက် ခဲ့တဲ့ အတွက် အင်္ဂလန်ကို အိမ်ပြန် စောခဲ့ရ ပါတယ် ။
အဲ့ဒီနောက် မှာတော့ သူဟာ ပုံစံကောင်း တွေကို ပြသ နိုင်ဖို့ ရုန်းကန် ရတာ ရှိခဲ့ သလို ယူနိုက်တက် အသင်း အတွက်လည်း ပုံမှန် ပွဲထွက် ကစားပေးခွင့် ရရှိ နိုင်ဖို့ ရုန်းကန် ခဲ့ရ ပါတယ် ။ ဒါ့အပြင် သူဟာ အသင်း ရဲ့ လေ့ကျင့်ရေး အစီအစဉ် တွေကို နောက်ကျလေ့ ရှိသူ ဖြစ်ကြောင်း ဝေဖန်ခံခဲ့ ရပါ သေးတယ် ။
ဒါပေမယ့် ယူနိုက်တက် နည်းပြ ဆိုးလ်ရှား ကတော့ သူ့ရဲ့ တိုက်စစ် ကစားသမား ဖြစ်သူဟာ အသေးစာ ဒဏ်ရာ ပြသနာ ရရှိ နေခဲ့တာကြောင့် အသင်းရဲ့ ကစားသမား စာရင်းထဲ မပါဝင် ခဲ့တာ ဖြစ်ကြောင်း ကာကွယ် စကား ဆိုခဲ့ပါ သေးတယ် ။ အခြား တစ်ဖက် မှာတော့ ဂရင်းဝုဒ်ဟာ ဒီ ရာသီ အသင်း အတွက် သွင်းဂိုး 2 ဂိုးသာ သွင်းယူပေးထား ခဲ့ပါ သေးတယ် ။
အခုတော့ အင်္ဂလန် လက်ရွေးစင် အသင်းရဲ့ နည်းပြ ဂါးရတ် ဆောက်ဂိတ် က ဂရင်းဝုဒ်ဟာ ပွဲကစားချိန် မိနစ်တွေ နည်းပါး နေခဲ့တဲ့ အတွက် သူ့ကို မရွေးချယ် ခဲ့တာ ဖြစ်ကြောင်း ၊ သူဟာ ရှေ့ဆက် အခွင့်အရေးတွေ အများကြီး ပိုင်ဆိုင် နိုင်ဦးမယ့် အဆုံးသတ် ကောင်းမွန်သူ တိုက်စစ်မှူး တစ်ဦး ဖြစ်ကြောင်း ချီးကျူး စကားတွေ ဆိုသွားခဲ့လိုက် ပါတယ် ။
” ပထမဆုံး ပြောချင်တာ ကတော့ လူငယ် တစ်ဦး အနေနဲ့ သူ့ အပေါ်မှာ ကျွန်တော်တို့ ယုံကြည်မှု အများကြီး ထားရှိ ထားကြ ပါတယ် ။ သူက အံ့ဖွယ် ကောင်းတဲ့ လူငယ် ကစားသမားလေး တစ်ဦးပါ ။ ဒါဟာ သူ့အတွက် အသေးစား မကျေနပ်စရာ ကိစ္စ တစ်ခု ဖြစ်ကောင်း ဖြစ်နေမှာပါ ။ ဒါပေမယ့် သူဟာ ရှေ့ဆက်ဖို့ အတွက် အချိန်တွေ အများကြီး ပိုင်ဆိုင် ထားပါ သေးတယ် ”
” သူဟာ အရမ်းတော်တဲ့ အဆုံးသတ် စွမ်းရည် ကောင်းမွန်သူ တစ်ဦး ပါပဲ ။ ဒါကို ကျွန်တော်တို့ အားလုံး သိရှိ နားလည် ထားခဲ့ကြ ပါတယ် ။ ဒါပေမယ့် ပြီးခဲ့တဲ့ လ အနည်းငယ်ကို ပြန်လည် ကြည့်ရှုလိုက်မယ် ဆိုရင် သူဟာ ပွဲကစားချိန် မိနစ်တွေ အတော်လေး နည်းပါး နေခဲ့တာကို တွေ့မြင် ခဲ့ရ ပါတယ် ”
” သူဟာ အခွင့်အရေး တွေကို ရှေ့ဆက် ပိုင်ဆိုင် သွားမှာပါ ။ ဒါက ရှည်လျားတဲ့ ဘောလုံး ရာသီ တစ်ခုပဲလေ ။ ပြီးတော့ ကျွန်တော်တို့ရဲ့ ကစားသမား တွေကလည်း ပြီးခဲ့တဲ့ ဘောလုံး ရာသီ ကုန်ဆုံး ခဲ့စဉ် တုန်းကလည်း အားလပ်ရက် အတော်လေး နည်းပါး ခဲ့ကြ ပါတယ် ။ ဒါ့ကြောင့် ပွဲဆက် နေတဲ့ အချိန်မှာ သူဟာ အခွင့်အရေး တွေကို ပိုင်ဆိုင်ပါ လိမ့်မယ် ”
” သူက လူငယ်တွေကို အလေးထား ပျိုးထောင်တဲ့ အသင်း တစ်ခုမှာ ရှိနေရသူပါ ။ သူဟာ ဒါကို ကောင်းကောင်း အသုံးချ နိုင်ခဲ့ပြီး အခွင့်အရေး တွေကို ရယူ ထားနိုင်ခဲ့ ပါတယ် ။ သူဟာ ဒါတွေကို ဆက်လက် လုပ်ဆောင်နိုင်ပါဦးမယ် ။ သူနဲ့ ပတ်သက်လို့ ကျွန်တော် အိုလီ နဲ့ စကားတွေ ပြောဖြစ်ခဲ့ပါသေးတယ် ။ သူက အကောင်းဆုံး ကစားသမား တစ်ဦး ဖြစ်နိုင်မယ့်သူပါ ” လို့ ဂါးရတ် ဆောက်ဂိတ် က ထုတ်ဖော် ပြောကြား ခဲ့လိုက် ပါတယ် ။
