ဒီနေ့ နံနက် မှာတော့ မန်ချက်စတာ ယူနိုက်တက် အသင်းဟာ ဆဲလ်ဟာ့စ် ပါ့ခ် ကွင်းထဲ ခရစ္စတယ် ပဲလေ့စ် အသင်းနဲ့ ရင်ဆိုင် ကစားခဲ့ ရပြီး 0 – 2 ဆိုတဲ့ ရလဒ် နဲ့ အဝေးကွင်း နိုင်ပွဲ ရယူ နိုင်ခဲ့ ပါတယ် ။ ဒါပေမယ့် တကယ်တမ်း မှာတော့ ယူနိုက်တက် အသင်း ရဲ့ ကစားပုံ တွေဟာ အထူး ကျေနပ် အားရစရာ မဖြစ် ခဲ့ရ ပါဘူး ။
အဆိုပါ နိုင်ပွဲကြောင့် အခုတော့ ယူနိုက်တက် တို့ဟာ နောက်ဆုံး ကစားထား ခဲ့တဲ့ ပြိုင်ပွဲစုံ 19 ပွဲဆက် ရှုံးပွဲမရှိ ဆိုတဲ့ မှတ်တမ်းကောင်း တစ်ရပ်ကို ပိုင်ဆိုင် သွားနိုင်ခဲ့ ပါတယ် ။ ဒါ့အပြင် ထိပ်သီး လေးသင်း စာရင်း ဝင်ရောက် နိုင်ရေး အတွက် အဓိက ပြိုင်ဖက်တွေ ဖြစ်တဲ့ ချဲလ်ဆီး နဲ့ လက်စတာ စီးတီး အသင်း တွေကို ဆက်လက် ဖိအားပေး နိုင်ခဲ့ ပါတယ် ။
ဒီပွဲ မှာတော့ ယူနိုက်တက် အသင်း အတွက် သွင်းဂိုး တွေကို တိုက်စစ် ကစားသမား နှစ်ဦး ဖြစ်တဲ့ ရပ်ရှ်ဖို့ နဲ့ မာရှယ် တို့က 1 ဂိုးစီ သွင်းယူ ပေးနိုင် ခဲ့ကြ ပါတယ် ။ ဒီပွဲ အတွက်တော့ ရပ်ရှ်ဖို့ ဟာ တစ်ဂိုးသွင်း ၊ တစ်ဂိုး ဖန်တီး ဆိုတဲ့ စွမ်းဆောင်ရည်နဲ့ အကောင်းဆုံး ကစားသမား ဖြစ်ခဲ့ ပေမယ့် ဒီဂီယာရဲ့ ဂိုးပေါက် ကာကွယ်မှု တွေက နိုင်ပွဲ အတွက် အထူး အရေးပါခဲ့ ပါတယ် ။
