မနက်ဖြန် ညမှာ Super Sunday ပရီးမီးယားလိဂ် ပွဲစဉ် ၁၀ ရဲ့ ပွဲကြီးပွဲကောင်း တပွဲ အဖြစ် ချဲလ်ဆီး အသင်း နဲ့ တော့တင်ဟမ် အသင်း တို့ စတမ်းဖို့ဒ်ဘရစ်ချ် မှာ အကြိတ်အနယ် ယှဉ်ပြိုင် ကစားတော့မှာ ဖြစ်ပါတယ် ။
ဇယားထိပ်ပိုင်း က ထိပ်သီး ၂သင်း ထိပ်တိုက် တွေ့ဆုံမှု ဖြစ်တဲ့ အပြင် ၊ ဆရာ တပည့် ၂ယောက် ထိပ်တိုက်တွေ့မှု က လူတွေကို ဒီပွဲအတွက် ပိုပြီး ဆွဲဆောင်စေပါတယ် ။ တပည့် ဖြစ်သူ ဖရန့် လမ်းပတ် ဟာ ဆရာဟောင်း ဟိုဆေး မော်ရင်ဟို ထိပ်တိုက် တွေ့ဆုံမှုမှာ အသာစီး ရထားပါတယ် ။
ပြီးခဲ့တဲ့ ရာသီ ပရီးမီးယားလိဂ် ၊ အိမ်ကွင်း အဝေးကွင်း ၂ကျော့လုံး မှာ လမ်းပတ် ရဲ့ ချဲလ်ဆီး အသင်း ဟာ မော်ရင်ဟို ရဲ့ တော့တင်ဟမ် အသင်း ကို ငြင်းဆန်ဖွယ်မရှိ ၊ အနိုင်ရခဲ့ပါတယ် ။ ဒါ့အပြင် လမ်းပတ် ဟာ ချန်ပီယံရှစ် ကလပ် ဒါဘီ အသင်း ကို ကိုင်တွယ်ခဲ့စဉ် ကလည်း ၊ မော်ရင်ဟို ကို တကြိမ် အနိုင်ရခဲ့ဖူးပါတယ် ။
မော်ရင်ဟို ကတော့ ဒီရာသီ အတွင်း ကစားခဲ့တဲ့ ကာရာဘောင် ဖလား စတုတ္ထ အဆင့် ပွဲမှာ လမ်းပတ် ကို ပင်နယ်တီ အဆုံးအဖြတ် မှာ ပထမဆုံး အကြိမ် အဖြစ် အနိုင်ရခဲ့တာ ဖြစ်ပါတယ် ။ ပရီးမီးယားလိဂ် မှာ လမ်းပတ် ကို မနိုင်ဖူးသေးတဲ့ မော်ရင်ဟို အတွက် ဒီ တကြိမ် ဟာ အနိုင်ယူဖို့ အတောင့်တင်းဆုံး အချိန် လို့ ဆိုနိုင်ပါတယ် ။
အမှတ်ပေးဇယား ထိပ်ဆုံးမှာ ရပ်တည်နေသလို ၊ တော့တင်ဟမ် အသင်း ဟာ အဖွင့် ပရီးမီးယားလိဂ်ပွဲမှာ အဲဗာတန် အသင်း ကို အိမ်ကွင်းမှာ ရှုံးနိမ့်ခဲ့ပြီးနောက် ၊ နောက်ဆုံး ၈ပွဲဆက် ရှုံးပွဲမရှိထားပါဘူး ။ ဒါ့အပြင် ၎င်းတို့ဟာ ပြီးခဲ့တဲ့ အပတ် က ပတ်ဂွာဒီယိုလာ ရဲ့ မန်စီးတီး အသင်း ကို ၂ – ၀ နဲ့ အနိုင်ရခဲ့လို့ ၊ စိတ်ဓာတ်ပိုင်း က အတက်ဖက်ကို ရောက်နေပါတယ် ။
တဖက်မှာ မော်ရင်ဟို ဟာ ဒီ တကြိမ် အသင်းဟောင်း ချဲလ်ဆီး အသင်း နဲ့ ရင်ဆိုင်ဖို့ အတွက် ၊ လမ်းပတ် ရဲ့ ပွဲထွက် အခင်းအကျင်း ၊ ပွဲချဉ်းကပ်ပုံတွေနဲ့ ပတ်သက်ပြီး သတင်း အချက်အလက်တွေ ရထားကြောင်း အင်္ဂလန် မီဒီယာ တချို့ က ဖော်ပြခဲ့ကြပါတယ် ။
မော်ရင်ဟို ကတော့ ဒီ အချက် ကို ငြင်းဆန် ပယ်ချလိုက်ပြီး ၊ အကယ်၍ သူသာ ချဲလ်ဆီး အသင်း ရဲ့ ပွဲအခင်းအကျင်း အကြောင်း သိထားရင်တောင် ၊ သူ့အတွက် ဘာမှ ထူးထူးခြားခြား ဖြစ်လာစေမှာ မဟုတ်ကြောင်း တုန့်ပြန် ပြောဆိုခဲ့ပါတယ် ။
မော်ရင်ဟို က ” ( ချဲလ်ဆီး ရဲ့ ပွဲအခင်းအကျင်း နဲ့ ပတ်သက်ပြီး ) အခုအထိ ဘာမှ မသိသေးပါဘူး ။ သိဖို့လည်း ရှိလာမယ် လို့ မထင်ပါဘူး ။ ဒါပေမယ့် လက်ရှိ ချဲလ်ဆီး အသင်း ရဲ့ ကစားသမား အင်အား ကို ကြည့်မယ် ဆိုရင် ၊ ညာအခြမ်း ခံစစ်မှာ ရိစ်ဂျိမ်းစ် ၊ အက်ဇ်ပီလီကွီတာ ၊ ဘယ်အခြမ်း ခံစစ်မှာ ဘန်ချေဝဲလ် ၊ အီမာဆင် ၊ ဂိုးသမား နေရာမှာ မန်ဒီ ဒါမှမဟုတ် ၊ ပရီးမီးယားလိဂ် သမိုင်း တလျှောက် ကြေးအကြီးဆုံး ဂိုးသမား ( ကီပါ ) တို့ ရှိနေပါတယ် ။ “
” ဘယ်သူ့ကို ပွဲထုတ်ထုတ် သူတို့ အတွက် သိပ်ပြီး ပြဿနာ ရှိမယ် မထင်ပါဘူး ။ ချဲလ်ဆီး ဟာ အံ့သြဖွယ် ကစားသမား စာရင်း ကို ပိုင်ဆိုင်ထားပါတယ် ။ ဒီတော့ သူတို့ ဘယ်သူတွေနဲ့ ဝန်းရံပြီး ကစားမယ် ဆိုတာက ကျွန်တော့ အတွက် စိုးရိမ်စရာတော့ မဟုတ်ပါဘူး ။ ဘာလို့လဲ ဆိုတော့ သူတို့မှာ ကစားသမားကော င်းတွေသာ ရှိနေလို့ပါ ။ နောက်ပြီး ဒီတကြိမ် ထိပ်တိုက် ရင်ဆိုင်မှု ကလည်း သာမန် ဒါဘီပွဲတပွဲလိုပဲ ဖြစ်လာမှာပါ ။ ဘာမှ ပိုပြီး ထူးခြားမသွားပါဘူး ။ ” လို့ တုန့်ပြန် ပြောဆိုခဲ့ပါတယ် ။
တော့တင်ဟမ် အသင်း ဟာ ကြားရက် က ကစားခဲ့တဲ့ ယူရိုပါလိဂ် အုပ်စုပွဲမှာ လူဒိုဂိုရက်စ် အသင်း ကို ၄ဂိုးပြတ် နဲ့ ထပ်မံ အနိုင်ရထားပြီး စိတ်ဓာတ် တက်ကြွနေပါတယ် ။ တဖက်မှာ အဆင့် ၂ နေရာ က ၎င်းတို့နဲ့ ရမှတ် တူနေတဲ့ လီဗာပူး အသင်း ဟာ ယနေ့ည မှာ ဘရိုက်တန် အသင်း နဲ့ အစောဆုံး ကစားဖို့ ရှိနေပါတယ် ။ ဒီတော့ ဒီနေ့ည ပွဲအပြီး ၊ အဆင့် ၁ နေရာ ကို လွှဲပြောင်းပေးရဖို့ က များနေလို့ ၊ သိပ်ပြီး ပူပန်နေတာမျိုး မရှိကြောင်း မော်ရင်ဟို က တုန့်ပြန်ခဲ့ပါတယ် ။
မော်ရင်ဟို က ” စနေနေ့ ပွဲတွေ ပြီးသွားရင် ၊ ကျွန်တော် တို့ဟာ ဇယားထိပ်ဆုံး မှာ ရှိမနေတော့တာမျိုး ဖြစ်နိုင်ပါတယ် ။ လီဗာပူး ဟာ ဘရိုက်တန် နဲ့ ပွဲမှာ သရေ တမှတ် ၊ ဒါမှမဟုတ် ၊ အနိုင် ၃မှတ် ရသွားနိုင်ပါတယ် ။ ဒီတော့ ကျွန်တော် တို့ အဆင့် ၁ နေရာက ဖယ်ပေးရနိုင်ခြေ ရှိပါတယ် ။ “
” ဒါပေမယ့် ကျွန်တော်တို့ အဆင့် ၁မှာပဲ ရှိနေရှိနေ ၊ လီဗာပူး ကပဲ ကျွန်တော်တို့ကို ကျော်တက်ပြီး ၊ အဆင့် ၁ ကို ရောက်သွားပါစေ ၊ ကျွန်တော်တို့ အတွက် ဘာမှ ပြောင်းလဲသွားမှာ မဟုတ်ပါဘူး ။ ဒီရာသီ စတင် ကတည်းက ကျွန်တော် ပြောခဲ့ဖူးတဲ့ အတိုင်း ၊ ကျွန်တော်တို့ဟာ ကိုယ်ကစားရမယ့် ပွဲစဉ်တွေ အတွက် အနိုင်ရဖို့သာ ကြိုးစားနေကြတာပါ ။ “
” ဒီထက်လည်း ဘာမှ မပိုသွားပါဘူး ။ ကျွန်တော် တို့ကလည်း စတမ်းဖို့ဒ်ဘရစ်ချ် ကို သွားကစားရမှာ ဖြစ်ပြီး ၊ အဖြစ်နိုင်ဆုံး ရလဒ် ၃ခု ရှိပါတယ် ။ ကျွန်တော် တို့ဟာ ဘောလုံး လောကမှာ အချိန် အကြာကြီး ရှိနေကြသူတွေ ဖြစ်လို့ ၊ ဘာမဆို ဖြစ်လာနိုင်မှန်း သိထားကြပါတယ် ။ လာမယ့် ပွဲအတွက် ကျွန်တော်တို့ လုပ်ရမယ့် အလုပ် က အနိုင်ရအောင် ကစားဖို့ပါပဲ ။ ” လို့ ပြောကြားခဲ့ပါတယ် ။
