ချယ်လ်ဆီးနှင့် ပြင်သစ်နောက်ခံကစားသမားဟောင်း ဂါးလက်စ်က ချယ်လ်ဆီးအသင်းနေဖြင့် လာမည့် ၂၀၂၃-၂၄ ရာသီတွင် ချန်ပီယံလိဂ်ဝင်ခွင့်မရပါက အသင်းပိုင်ရှင် တော့ဒ်ဘိုလီကို အပြစ်တင်ရမည်ဖြစ်ကြောင်း သုံးသပ်ပြောကြားခဲ့သည်။
အမေရိကန်စီးပွားရေးလုပ်ငန်းရှင် တော့ဒ်ဘိုလီ ဦးဆောင်သည့် BlieCo22 Limited သည် ပြီးခဲ့သည့် မေလ ၇ ရက်တွင် ချယ်လ်ဆီးအသင်းကို ပေါင် ၄ ဒသမ ၂၅ ဘီလီယံဖြင့် ဝယ်ယူခဲ့သည်။ တော့ဒ်ဘိုလီသည် ချယ်လ်ဆီးအသင်းကို ဝယ်ယူပြီးနောက် အသင်းတွင်း အပြောင်းအလဲများစွာပြုလုပ်ခဲ့ပြီး အသင်းဥက္ကဋ္ဌ ဘရုဘက်စ်အပါအဝင် အားကစားဒါရိုက်တာ ဂရာနော့ဗ်စကီယာ နှင့် နည်းပြ တူဟယ်လ်တို့ကို ရာထူးမှ ထုတ်ပယ်ခဲ့သည်။
သို့သော် ချယ်လ်ဆီးအသင်းသည် ယခုရာသီ ပရီးမီးယားလိဂ်တွင် ၁၄ ပွဲ ကစားချိန်$ ရမှတ် ၂၁ မှတ်ဖြင့်အဆင့် ၈ နေရာ၌ ရပ်တည်နေကာ ဇယားထိပ်ဆုံးမှ အာဆင်နယ် (၃၇ မှတ်)နှင့် ၁၆ မှတ်အထိ ကွာဟနေပြီး အဆင့်လေးမှ စပါးအသင်း(၂၉ မှတ်)နှင့်လည်း ခုနစ်မှတ် ကွာဟနေသည်။
ထို့ကြောင့် ဂါးလက်စ်က “တကယ်လို့ ဒီရာသီ ပရီးမီးယားလိဂ်မှာ ချယ်လ်ဆီးအသင်း အဆင့်လေးအတွင်း မဝင်ဘူးဆိုရင် တော့ဒ်ဘိုလီ ကျဆုံးတယ်လို့ ဆိုရမှာပါ။ ချယ်လ်ဆီးလို အသင်းမျိုးအနေနဲ့ အဆင့်လေး ပြင်ပ ရောက်တာကို လက်ခံနိုင်စရာ မရှိပါဘူး။ ကျွန်တော်တို့ ကစားသမားတွေရဲ့စွမ်းဆောင်ရည်ကိုကြည့်ပြီး အကဲဖြတ်သလို အသင်းပိုင်ရှင်ကိုလည်း အကဲဖြတ်ရမှာပါ။ ချန်ပီယံလိဂ်ဝင်ခွင့်မရရင် တော့ဒ်ဘိုလီ အရည်အချင်းမပြည့်မီဘူးလို့ ဆိုရမှာပါ”ဟု ပြောကြားခဲ့သည်။