ချယ်လ်ဆီးနည်းပြ တူဟယ်လ်က အသင်းကစားသမားအနေဖြင့် မိမိကို မုန်းလျှင်လည်း ဂရုမစိုက်ကြောင်း ပြောကြားခဲ့သည်။
ချယ်လ်ဆီးအသင်းသည် ပရီးမီးယားလိဂ်နောက်ပိုင်းပွဲစဉ်များတွင် ရလဒ်များ ဆိုးရွားနေပြီး လိဒ်စ်နှင့်ပွဲ မတိုင်မီ ပရီးမီးယားလိဂ်နောက်ဆုံး (၅) ပွဲတွင် (၁) ပွဲသာ အနိုင်ရခဲ့သည်။
မေ (၇) ရက်(စနေနေ့)က ကစားခဲ့သည့်ပွဲတွင် ဝုလ်ဗ်အသင်းကို (၂)ဂိုး ပြတ်ဦးဆောင်နိုင်ခဲ့သော်လည်း ပွဲအပြီးတွင် (၂-၂)ဂိုးဖြင့် သရေကျခဲ့သည်။
ထို့ကြောင့် တူဟယ်လ်သည် တနင်္ဂနွေနေ့တွင် အသင်းကစားသမားများကို အနားမပေးဘဲ လေ့ကျင့်ခန်းဆင်းစေခဲ့ကြောင်း သိရသည်။
တူဟယ်လ်က ”စနေမှာ စိတ်ပျက်စရာတွေကြုံရပြီးနောက် နားရက်ဖြစ်တဲ့ တနင်္ဂနွေမှာ လေ့ကျင့်ရတာကို တချို့က အပြစ်ပေးခံရတာလို့ ခံစားရနိုင်ပါတယ်။ ဒါပေမဲ့ အဲဒီလိုမဟုတ်ပါဘူး။ ဒါက ပုံမှန်လေ့ကျင့်တာမျိုးပါပဲ။ ပြီးတော့ ပြိုင်ဆိုင်မှုပြင်းထန်တဲ့ မော်ဒန်ဘောလုံးလောကမှာ နည်းပြတွေအနေနဲ့ အချစ်ခံရဖို့ဆိုတာ မဖြစ်နိုင်ပါဘူး။ လက်ရှိမှာ ကျွန်တော့်အနေနဲ့ ကစားသမားတွေအကြား ပေါ်ပြူလာ မဖြစ်ဘူးဆိုရင်တောင် ကျွန်တော် ဂရုမစိုက်ပါဘူး”ဟု ပြောကြားခဲ့သည်။
