မန်ချက်စတာ ယူနိုက်တက် နောက်ခံလူဟောင်း ရီယို ဖာဒီနန် က ဒီနှစ် ချန်ပီယံလိဂ်မှာ မန်ချက်စတာ စီးတီး အသင်းဟာ ဗိုလ်စွဲဖို့ အလားအလာ အကောင်းဆုံး အသင်း ဖြစ်ပြီး သူတို့ကို ရပ်တန့်ဖို့ အခွင့်အရေး အနည်းအကျဉ်း ပဲ ရှိတယ်လို့ ပြောကြား လိုက်ပါတယ် ။
ချန်ပီယံလိဂ် လက်ရှိ ချန်ပီယံ မန်စီးတီး အသင်းဟာ ဒီမနက်မှာ ကစားခဲ့တဲ့ ချန်ပီယံလိဂ် ၁၆ သင်း ရှုံးထွက် အဆင့် ဒုတိယ အကျော့မှာ လိုက်ပ်ဇစ် အသင်းကို သုံးဂိုး တစ်ဂိုး နဲ့ အနိုင် ရသွားခဲ့ပြီး နှစ်ကျော့ပေါင်း ရလဒ် ၆-၂ နဲ့ ကွာတားဖိုင်နယ် အဆင့် ကို တက်လှမ်း သွားခဲ့ပါတယ် ။
ဖာဒီနန် ကတော့ ဒီနှစ်မှာလည်း မန်စီးတီး အသင်းကို ရပ်တန့်နိုင်မယ့် အသင်း တစ်သင်းမှ မတွေ့မိဘဲ ဖိုင်နယ်မှာလည်း အခြေအနေ တစ်ရပ်မှသာလျှင် သူတို့ကိုရပ်တန့် နိုင်လိမ့်မယ်လို့ သုံးသပ် ပြောကြား လိုက်ပါတယ် ။ ” ကျနော်ကတော့ နှစ်ကျော့ ကစားရတဲ့ အဆင့်တွေမှာ မန်စီးတီး အသင်းကို အနိုင်ယူ ကျော်ဖြတ် နိုင်မယ့် အသင်း တစ်သင်းမှ မတွေ့မိပါဘူး ။ ဖိုင်နယ် ကို ဘယ်အသင်း တက်လာမလဲပဲ တစ်ချက် ကြည့်ရမှာပေါ့ဗျာ ။ ”
” မန်စီးတီး နဲ့ ဖိုင်နယ်မှာ ရင်ဆိုင်ရမယ့် အသင်းမှာ မှော်ဆန်တဲ့ စွမ်းဆောင်ရည်တွေ ပြသပြီး ပွဲအဖြေ ပြောင်းလဲ ပေးနိုင်တဲ့ ကစားသမား ၂ ဦးလောက် ရှိမှပဲ အနိုင်ရဖို့ အခွင့်အရေး ရှိမှာပါ ။ ဒါပေမဲ့ စီးတီး က ဗိုလ်စွဲဖို့ ရေပန်း အစားဆုံး အသင်းပါပဲ ၊ သူတို့က တခြားအသင်းထက်ကို တစ်ဆင့် မြင့်နေတာပါ ။ ” လို့ ပြောကြား သွားခဲ့ပါတယ် ။
