မန်စီးတီးအသင်းသည် ချန်ပီယံလိဂ်ပြိုင်ပွဲတွင် ၎င်းတို့အသင်းထက်အရင် PSG အသင်း ဗိုလ်စွဲမည်ကို စိုးရိမ်သောကြောင့် အသင်းကွင်းလယ်ကစားသမား ဘာနာဒိုဆေးလ်ဗားအတွက် PSG အသင်း၏ ကမ်းလှမ်းမှုကို ငြင်းဆန်ပယ်ချခဲ့ကြောင်း ဗြိတိန်သတင်းစာThe Times က ဖော်ပြခဲ့သည်။
PSG အသင်းသည် ယခုနွေရာသီအပြောင်းအရွှေ့ကာလတွင် ပေါ်တိုကွင်းလယ်လူ ဗီတင်ညာ၊ လိုင်လီကွင်းလယ်လူ ရီနာတိုဆန်းချက်စ်၊ လိုက်ပ်ဇစ်နောက်ခံလူ မူကီလီတို့ သုံးဦးပေါင်း ယူရိုသန်း ၆၀ ကျော်ဖြင့် ခေါ်ယူထားပြီး Reims တိုက်စစ်မှူး အီတီကီကို တစ်ရာသီအငှားဖြင့် ခေါ်ယူထားသလို ပြီးခဲ့သည့် ရာသီက အငှားခေါ်ယူခဲ့သည့် စပို့တင်းလစ္စဘွန်းနောက်ခံလူ နူနိုမန်ဒက်စ်ကိုလည်း အပြီးသတ်ခေါ်ယူထားသည်။
သို့သော် PSG အသင်းကို ယခုရာသီတွင် စတင်ကိုင်တွယ်သည့် နည်းပြ ဂယ်လ်ချီသည် နွေရာသီအပြောင်းအရွှေ့စျေးကွက်ပိတ်သိမ်းမည့် စက်တင်ဘာ ၁ ရက်နေ့မတိုင်မီ အသင်းကို အင်အားဖြည့်တင်းမှုများ ဆက်လက်ပြုလုပ်ရန် ဆန္ဒရှိနေကြောင်း သိရသည်။
PSG အသင်းသည် အသင်းကွင်းလယ်ပိုင်းအတွက် မန်စီးတီးအသင်းမှ ပေါ်တူဂီ ကွင်းလယ်ကစားသမား ဘာနာဒိုဆေးလ်ဗား ကို ပစ်မှတ်ထားနေသည်မှာ ကြာပြီဖြစ်ပြီး ယခုအခါ ယူရိုသန်း ၇၀ ဖြင့် ၎င်းအား ခေါ်ယူ ရန် မန်စီးတီးအသင်းထံ ကမ်းလှမ်းခဲ့ခြင်း ဖြစ်ကြောင်း သိရသည်။ သို့သော် မန်စီးတီး အသင်းသည် ဘာနာဒိုဆေးလ်ဗားအတွက် PSG အသင်း၏ ကမ်းလှမ်းမှုကို ချက်ချင်း ငြင်းဆန်ပယ်ချခဲ့ကြောင်း The Times က ဖော်ပြခဲ့သည်။
အသက် ၂၈ နှစ်အရွယ် ဘာနာဒိုဆေးလ်ဗားသည် မန်စီးတီးအသင်းနှင့် ၂၀၂၅ ခုနှစ်အထိ စာချုပ်သက်တမ်းရှိနေသော်လည်း ယခုနွေတွင် အသင်းမှထွက်ခွာလိုနေကြောင်း သိရသည်။ မန်စီးတီးနည်းပြ ဂွါဒီယိုလာက အသင်းတွင် မပျော်သည့် ကစားသမားများ ကို ဆက်ထိန်းမည်မဟုတ်ဟု ပြောကြားထားသော်လည်း ဘာနာဒိုဆေးလ်ဗားကိုမူ PSG အသင်းသို့ ရောင်းချလိုခြင်းမရှိကြောင်း သိရှိရသည်။
PSG နှင့် မန်စီးတီးအသင်းတို့သည် ချန်ပီယံလိဂ်ဖလား မရဖူးသေးရာ ဂွါဒီယိုလာအနေဖြင့် ချန်ပီယံလိဂ်ပြိုင်ပွဲတွင် ၎င်းတို့အသင်းထက်အရင် PSG အသင်း ဗိုလ်စွဲသွားမည်ကို မလိုလားသဖြင့် ဘာနာဒိုဆေးလ်ဗားကို PSG အသင်းထံ မရောင်းချလိုခြင်းဖြစ် ကြောင်း The Times က ဖော်ပြခဲ့သည်။
ဘာနာဒိုဆေးလ်ဗားသည် ၂၀၁၇ နွေ ရာသီတွင် မိုနာကိုအသင်းမှ မန်စီးတီးအသင်း သို့ ယူရိုသန်း ၅၀ ဖြင့် ရောက်ရှိလာသူဖြစ်သည်။ ၎င်းသည် မန်စီးတီးအသင်းအတွက် ငါးရာသီကျော်အတွင်း ပြိုင်ပွဲစုံ ၂၅၅ ပွဲတွင် ၄၉ ဂိုး သွင်းယူထားသည်။ ထို့ပြင် ၎င်းသည် မန်စီးတီးအသင်းနှင့် ပရီးမီးယားလိဂ် ချန်ပီယံဆု လေးကြိမ်အပါအဝင် ဆုဖလား ၁၁ လုံး အထိ ရယူထားကြောင်း သိရသည်။
