ရီးယဲလ်မက်ဒရစ်အသင်းနည်းပြ ဇီဒန်းက ယခုရာသီ လာလီဂါချန်ပီယံဆု ဆွတ်ခူးရယူပေးထားနိုင်သော်လည်း လာမည့်ရာသီတွင် ဆက်ရှိနေရန် မသေချာကြောင်း ဝန်ခံ ပြောကြားသည်။
ဇီဒန်းသည် ရီးယဲလ်အသင်းအား နှစ်ရာသီကြာဝေးကွာနေသည့် လာလီဂါချန်ပီယံဆု ပြန်လည်ရယူပေးနိုင်ခဲ့ပြီး နောက်ဆုံး ၁၀ နှစ်အတွင်း လာလီဂါချန်ပီယံဆုရရှိသည့် သုံးကြိမ်အနက် နှစ်ကြိမ်ကို ၎င်းင်းက ရယူပေးထားခြင်းဖြစ်သည်။
စာချုပ်သက်တမ်းမှာ ၂၀၂၂ ခုနှစ်အထိ ကျန်ရှိနေသော်လည်း အနာဂတ်အစီအစဉ်နှင့်ပတ်သက်၍ ဇီဒန်းက ”အနာဂတ်မှာ ဘာဖြစ်မလဲဆိုတာ ဘယ်သူမှ မသိနိုင်ပါဘူး။ လာမယ့်ရာသီအကြောင်း ဒါမှမဟုတ် နောက်တစ်နှစ်အကြောင်းကို ကျွန်တော် ဘယ်တော့မှပြောလေ့မရှိပါဘူး။ ကျွန်တော့်မှာ စာချုပ်ရှိနေသေးပြီး ပျော်ရွှင် နေပါတယ်။ အနာဂတ်မှာ ဘာဖြစ်မလဲဆိုတာ ခင်ဗျားလည်း ဘယ်တော့မှ ကြိုသိမှာမဟုတ်ပါဘူး။ ဘောလုံးကမ္ဘာမှာ အားလုံးက တစ်ညတည်းမှာပဲ ပြောင်းလဲသွားနိုင်တယ်။ အနာဂတ်မှာ ဘယ်လိုဖြစ်မလဲဆိုတာ မစဉ်းစားထားပါဘူး”ဟု ပြောကြားသည်။
ဇီဒန်းသည် ရီးယဲလ်အသင်းကို ဒုတိယအကြိမ် ကိုင်တွယ်နေခြင်းဖြစ်ပြီး ပထမအကြိမ်ကိုင်တွယ်စဉ် ချန်ပီယံလိဂ်ဖလား သုံးနှစ်ဆက် တိုက်ရရှိပြီးနောက် ၂၀၁၈ ခုနှစ် မေလတွင် ရာထူးမှနုတ်ထွက်ကြောင်း ရုတ်တရက်ကြေညာခဲ့ဖူးသည်။
ထို့ပြင် ၎င်းင်းက အသက် ၆၀- ၇၀ ရောက်သည်အထိ နည်းပြအလုပ်ကို လုပ်ကိုင်ရန် အစီအစဉ်မရှိကြောင်း ယခုနှစ်ဆန်းပိုင်းတွင် ပြောကြားထားသည်။
ဇီဒန်းသည် စီနီယာကလပ်အဖြစ် ရီးယဲလ်တစ်သင်းတည်းကိုသာ ကိုင်တွယ်ဖူးသော်လည်း လာလီဂါချန်ပီယံ နှစ်ကြိမ်၊ ချန်ပီယံလိဂ် သုံးကြိမ်၊ စပိန် စူပါဖလား၊ ဥရောပစူပါဖလားနှင့် ကလပ်ကမ္ဘာ့ ဖလား နှစ်ကြိမ်စီ ဆွတ်ခူးရရှိထားသည်။
