အင်တာမီလန်အသင်းသည် ယခုရာသီ စီးရီးအေပွဲစဉ် (၈)အပြီးတွင် ရမှတ် (၁၅)မှတ်ဖြင့် အဆင့် (၅)နေရာ၌ ရပ်တည်နေသလို၊ ချန်ပီယံလိဂ်အုပ်စုပွဲစဉ် (၄)အပြီးတွင် ရမှတ် (၂)မှတ်သာ ရရှိထားပြီး အုပ်စုအဆင့်မှ ထွက်ခွာရရန် အလွန်နီးစပ်နေပြီဖြစ်သည်။
ထို့ကြောင့် ကွန်တီက မိမိအနေဖြင့် ခရစ္စမတ်ကာလမတိုင်မီမှာပင် ရာထူးမှထုတ်ပယ်ခံရနိုင်ကြောင်း Striscia La Notizia ရုပ်သံနှင့် တွေ့ဆုံရာတွင် ပြောကြားခဲ့ခြင်းဖြစ်သည်။
အဆိုပါရုပ်သံအစီအစဉ်တွင် ကွန်တီအား အင်တာမီလန်အသင်း၏ ခရစ္စမတ်ပါတီ၌ အသင်းသားများနှင့် Panettone (ခရစ္စမတ်တွင် စားလေ့ရှိသည့် ကိတ်မုန့်တစ်မျိုး) စားနိုင်မည်လားဟု အစီအစဉ်တင်ဆက်သူက မေးမြန်းခဲ့သည်။
ယင်းမေးခွန်းကို ကွန်တီက “လုပ်စရာတွေ အများကြီးပါတယ်။ တကယ်လို့ ကျွန်တော့်အနေနဲ့ အင်တာမီလန်အသင်းရဲ့ ခရစ္စမတ်ပါတီမှာ Panettone မစားနိုင်ခဲ့ဘူးဆိုရင် ဒါဟာ ကျွန်တော်နဲ့ မထိုက်တန်လို့ပါပဲ”ဟု ပြောကြားခဲ့သည်။
ထို့ပြင် ၎င်းအား အင်တာမီလန်ကစားသမားများက ရာထူးမှပြုတ်အောင် လုပ်နေသလားဟု မေးမြန်းမှုကို ကွန်တီက ရူးမိုက်သည့်မေးခွန်းဖြစ်သည်ဟု ပြန်လည်ဖြေကြားခဲ့ပြီး မိမိအနေဖြင့် အသင်းကစားသမားအပေါ် သံသယမရှိကြောင်းလည်း ပြောကြားခဲ့သည်။
