မနက်ဖြန် မှာ ယခုတပတ် ပရီးမီးယားလိဂ် ပွဲစဉ် ၁၇ ရဲ့ Big Match ဖြစ်တဲ့ ချဲလ်ဆီး – မန်စီးတီး ပွဲ ကစားဖို့ ရှိနေပါတယ် ။ သို့ပေမယ့် လောလောဆယ် အင်္ဂလန် နိုင်ငံ အတွင်း ကိုရိုနာ ဗိုင်းရပ်စ် မျိုးကွဲသစ် ကူးစက်မှုနှုန်း မြင့်မားနေလို့ ၊ ပရီးမီးယားလိဂ် ကလပ် တော်တော်များများ လည်း ဒီ ရောဂါ ကို စတင် ခံစားနေရပြီ ဖြစ်ပါတယ် ။
ပြီးခဲ့တဲ့ ကြားရက် က မန်စီးတီး အသင်း အတွင်း အဓိက ပွဲထွက် ကစားသမား ၂ဦး ကိုင်လ် ဝေါ်လ်ကာ နဲ့ ဂါဘရီရယ် ဂျေဆုစ် တို့ ကိုဗစ် ပေါ့စတစ် ဖြစ်ခဲ့ပြီးနောက် ၊ အဲဗာတန် – မန်စီးတီး ပွဲကိုလည်း ရွှေ့ဆိုင်းလိုက်ရပါတယ် ။ မနက်ဖြန် ချဲလ်ဆီး နဲ့ ပွဲမတိုင်မီ အထိ ဆေးစစ်ချက်တွေ အရတော့ မန်စီးတီး ကစားသမား ၅ဦး အထိ ရောဂါ ကူးစက်ခံထားရပြီ လို့ သိရပါတယ် ။
ကလပ် အတွင်း နောက်ထပ် ဝန်ထမ်း ၂ဦးလည်း ကိုဗစ် ကူးစက်ခံထားရပြီးနောက် ၊ မန်စီးတီး အသင်း ဟာ ချဲလ်ဆီး နဲ့ ပွဲမကစားမီ အထိ ဆေးစစ်မှုတွေ ဆက်တိုက် ပြုလုပ်သွားဖို့လည်း ရှိနေပါတယ် ။ ရောဂါ ကူးစက်ခံရမှု အခြေအနေ အပြည့်အစုံ ကို မန်စီးတီး နည်းပြ ပတ် ဂွာဒီယိုလာ က မနေ့က ပွဲကြို သတင်းစာ ရှင်းလင်းပွဲမှာ အခုလိုပဲ ဖြေကြားခဲ့ပါတယ် ။
ဂွာဒီယိုလာ က ” လောလောဆယ် မှာ ကစားသမား ၅ဦး က တနင်္ဂနွေနေ့ပွဲ ကို လွဲချော်သွားပါပြီ ။ သူတို့ဟာ ၁၀ ရက်ကြာ ၊ နေအိမ်မှာ သီးသန့်နေထိုင်ရမှာ ဖြစ်ပါတယ် ။ တချို့သော ပထမ အကြိမ် ဆေးစစ်ချက် အဖြေတွေတော့ ထွက်လာပါပြီ ။ ကစားသမား ၂ဦး နဲ့ အခြား ဝန်ထမ်း ၂ဦးပါ ။ “
” ဒုတိယ တကြိမ်မှာတော့ နောက်ထပ် ကစားသမား ၃ဦးပါ ပေါ့စတစ် အဖြေ ထွက်ထားပါတယ် ။ ဘယ်သူတွေလဲ ဆိုတာတော့ ပရီးမီးယားလိဂ် ဖက်က ကျွန်တော် တို့ကို ပြောခွင့်ပြုထားတယ် လို့ ကျွန်တော် မထင်ပါဘူး ။ ဒါပေမယ့် ဘယ်သူတွေ စတမ်းဖို့ဒ်ဘရစ်ချ် ကို ခရီးနှင်မလဲ ဆိုတာ ခင်ဗျား တို့ သိရမှာ ဖြစ်ပြီး ၊ အဲ့ဒီကို ဘယ်သူတွေ လိုက်မလာနိုင်လဲ ဆိုတာ တွေ့ရမှာပါ ။ ” လို့ ပြောကြားခဲ့ပါတယ် ။
တဖက်မှာ ဂွာဒီယိုလာ က ပြီးခဲ့တဲ့ အဲဗာတန် – မန်စီးတီး ပွဲကို ရွှေ့ဆိုင်းဖို့ ၎င်းကိုယ်တိုင် ကပဲ အဲဗာတန် နည်းပြ ကာလို အန်ဆယ်လော့တီ ကို ဖုန်းဆိုခဲ့ကြောင်း နဲ့ အဲဗာတန် ကို ရင်ဆိုင်ဖို့ ၎င်းတို့ဆီမှာ ကစားသမား အလုံအလောက် ရှိပေမယ့် ၊ အားလုံး ရဲ့ ဘေးကင်း လုံခြုံမှု အတွက် ပွဲဖျက်ဖို့ တိုက်တွန်းခဲ့ခြင်း ဖြစ်ကြောင်း အခုလိုပဲ ရှင်းလင်းခဲ့ပါတယ် ။
ဂွာဒီယိုလာ က ” ကျွန်တော် တို့မှာ အဲဗာတန် ကို ရင်ဆိုင်ဖို့ ကစားသမား အလုံအလောက် ရှိခဲ့ပါတယ် ။ ကျွန်တော်တို့ ကိုယ်တိုင်ကလည်း ဒီပွဲကို ကစားချင်ခဲ့ပါတယ် ။ ဒါပေမယ့် အဲ့ဒီ တနေ့ထဲမှာပဲ ပြည်တွင်း ရောဂါ ကူးစက်မှုနှုန်း က အတော်လေး မြင့်တက်လာခဲ့သလို ၊ ဗိုင်းရပ်စ် ဟာ ကျွန်တော် တို့ရဲ့ လေ့ကျင့်ရေး စင်တာထဲမှာ အခြေချုပ် ရှိနေခဲ့လို့ အရင်ဆုံး ပရီးမီးယားလိဂ် အဖွဲ့ချုပ် ကို အကြောင်းကြားခဲ့ပါတယ် ။ “
” အဲ့ဒီနောက် ကျွန်တော် ကာလို ကို ဖုန်းခေါ်ခဲ့ပြီး ၊ ကျွန်တော်တို့ဖက် က အခြေအနေ အပြည့်အစုံ ကို ရှင်းလင်းခဲ့ကာ ၊ ပွဲဖျက်သိမ်းဖို့ကို ကြေညာဖို့ ပြောခဲ့ပါတယ် ။ ကျွန်တော် တို့ဖက်က ဒီပွဲကို ကစားနိုင်ခဲ့ပေမယ့် ၊ ကျွန်တော်တို့ ဆီကနေ ပြိုင်ဖက် နည်းပြ အဖွဲ့ဝင်တွေ ၊ ကစားသမား တွေဆီကို ရောဂါ ကူးစက်မှုတွေ ထပ်မံ ဖြစ်ပွားခဲ့ရင် ဘယ်လို လုပ်မှာလဲ ။ “
” ဆေးစစ်မယ့်နေ့ မတိုင်မီ တရက် အလိုက ကျွန်တော် တို့ဟာ လေ့ကျင့်ရေး အစီအစဉ် အတွင်း တယောက် နဲ့ တယောက် ထိတွေ့မှုတွေ ရှိခဲ့တာပါ ။ ဒီတော့ ကျွန်တော် တို့ကြောင့် အဲဗာတန် ကစားသမား တွေနဲ့ ဝန်ထမ်းတွေမှာ ဗိုင်းရပ်စ် ကူးစက်ခံရဖို့ အခွင့်အလမ်း အလွန် များသွားနိုင်ပါတယ် ။ “
” ဒါဟာ အလွန် ကြီးမားတဲ့ အန္တရာယ် စက်ကွင်းကြီး ဖြစ်ပါတယ် ။ ဒါဟာ မန်စီးတီး တသင်းတည်း မှာ ဖြစ်ခဲ့တာနဲ့ချည်း သက်ဆိုင်တာ မဟုတ်ပါဘူး ။ အခုဟာ က တကမ္ဘာလုံး နဲ့ သက်ဆိုင်တာပါ ။ ကမ္ဘာ တဝှမ်းမှာ သာမက ၊ ဒီ ရောဂါကြောင့် လူတွေ သေဆုံးနေကြရပါတယ် ။ ဗြိတိန် အတွင်းမှာလည်း ပြီးခဲ့တဲ့ ၂ရက်အတွင်း သေဆုံးမှု ၉၀၀ကျော် ရှိခဲ့ပါတယ် ။ “
” ပြဿနာ က အခုထိ ဆက်ရှိနေဆဲပါ ။ ဒါပေမယ့် လောလောဆယ် လေ့ကျင့်ရေး စင်တာ တခုလုံး ကို ပိုးသတ်ဆေးတွေ ဖြန်းထားပြီးပါပြီ ။ နောက်ထပ် ဆေးစစ်မှုတွေမှာ negative အဖြေပဲ ထွက်ဖို့ နဲ့ ပေါ့စတစ် ထွက်ထားသူတွေလည်း အမြန် ပြန်လာနိုင်ဖို့ကို မျှော်လင့်ပါတယ် ။ “
” ကျွန်တော် ဟာ အဲဗာတန် ဖက်က တရားဝင် ကြေညာချက်ထက် ၊ ကာလို ( အန်ဆယ်လော့တီ ) ရဲ့ ကြေညာချက် ကို ပိုပြီး သဘောကျပါတယ် ။ ကျွန်တော် တို့ဟာ ပရီးမီးယားလိဂ် အဖွဲ့ချုပ် နဲ့ အရင် စကား ပြောခဲ့ပါတယ် ။ မနှစ်က မီခေးလ် အာတီတာ ပေါ့စတစ် အဖြေထွက်တုန်းက သူ ပရီးမီးယားလိဂ် အဖွဲ့ချုပ် ကို အကြောင်းကြားပြီး ကျွန်တော်တို့နဲ့ ကစားမယ့် ပွဲကို ဖျက်သိမ်းဖို့ ပြောသလိုမျိုးပေါ့ ။ “
” ကျွန်တော် တို့ဟာ အဲဗာတန် နဲ့ ရင်ဆိုင် ကစားချင်ခဲ့ပါတယ် ။ ဂွတ်ဒီဆင်ပါ့ခ် ကို သွားပြီး ဟားမက်စ် ရိုဒရီဂွက်ဇ် ၊ လူကာဒင်း ၊ အယ်လန် ၊ ရစ်ချာလီဆင် တို့လို့ အဓိက ကစားသမားကောင်းတွေ ပါဝင်နေတဲ့ အဲဗာတန် ကို ရင်ဆိုင် အနိုင်ယူချင်ခဲ့ပါတယ် ။ “
” ဒါပေမယ့် ပရီးမီးယားလိဂ် ဖက်က အားလုံး ရဲ့ ဘေးကင်း လုံခြုံမှု အတွက် ဉာဏ်ရှိရှိ နဲ့ ဆုံးဖြတ်ချက် ချခဲ့တာ ဖြစ်ပါတယ် ။ ဒီပွဲ ပျက်သွားခဲ့ပြီး ၊ နောက် ၂ရက် ၊ ၃ရက်အတွင်း ကျွန်တော် တို့မှာ ပေါ့စတစ် အဖြေထွက်သူ ၇ဦး အထိ ရှိလာခဲ့ပါတယ် ။ ” လို့ ပြောကြားခဲ့ပါတယ် ။
