ဥရုဂွေး – ပါရာဂွေး(မြန်မာစံတော်ချိန် ဇွန်လ ၂၉ ရက် နံနက် ၆း၃၀ နာရီ)
ဥရုဂွေးအသင်းက ကစားသမားကောင်းတွေရှိပေမဲ့ စွမ်းဆောင်ရည်ကတော့ မျှော်လင့်ထားတာနဲ့ အတော်လေးလမ်းလွဲနေတယ်။ ဥရုဂွေးအသင်းမှာ ခံစစ်လောက်ပဲ ပုံမှန်အနေအထားရှိတယ်လို့ပြောရမယ်။ ဒါတောင်မှ ဟီမင်နက်ဇ်၊ ဂိုဒင်တို့က အရင်လို Set-piece တွေကနေ ပြိုင်ဘက်အသင်းဂိုးပေါက်ကို ခြိမ်းခြောက်နိုင်စွမ်းက အတော်လေးလျော့ကျသွားတာ တွေ့ရတယ်။ တိုက်စစ်မှာ ဆွာရက်ဇ်-ကာဗာနီတို့အတွဲက အားရစရာမရှိသေးပေမဲ့ ပွဲအဖြေပြောင်းလဲနိုင်တဲ့ ကစားသမားတွေ ဖြစ်လို့ စောင့်တော့ကြည့်ရမယ်။ ဥရုဂွေးအသင်းမှာ စိတ်ပျက်စရာအကောင်းဆုံးက ဘန်တန်ကာ၊ တော်ရဲရား၊ ဗယ်စီနို၊ ဗယ်လ်ဗာဒီ၊ နန်ဒက်ဇ်၊ အာရက်စကေတာတို့ရှိနေတဲ့ ကွင်းလယ်ဖြစ်ပြီး မျှော်လင့်ထားသလောက် ဘာမှမဖြစ်လာဘူး။ ပါရာဂွေးကတော့ လက်ရှိအခြေအနေမှာ ဥရုဂွေးထက် တည်ငြိမ်တယ်လို့ ပြောရမယ်။ အုပ်စုနေရာလုရတဲ့ အနေအထားဖြစ်လို့ ဥရုဂွေးကို ပိုကြိုက်တယ်။
ဘိုလစ်ဗီးယား – အာဂျင်တီးနား(မြန်မာစံတော်ချိန် ဇွန်လ ၂၉ ရက် နံနက် ၆း၃၀ နာရီ)
အာဂျင်တီးနားအသင်းအနေနဲ့ အုပ်စုပထမနေရာရမှ တစ်ဖက်က ထိပ်ဆုံးနေရာကနေ တက်လာဖို့ရှိတဲ့ ဘရာဇီးလ်အသင်းကို အစောပိုင်းအဆင့်တွေမှာ မတွေ့ဆုံရအောင် လုပ်ဆောင်နိုင်လိမ့်မယ်။ မက်ဆီ၊ လော်တာရိုမာတီနက်ဇ်၊ အဂွဲရိုးတို့လို့ ကမ္ဘာ့ထိပ် တန်းအဆင့် တိုက်စစ်မှူးတွေရှိနေတဲ့ အာဂျင်တီးနားလိုအသင်းက တစ်ပွဲ တစ်ဂိုးလောက်ပဲ သွင်းနေတာက အတော်စိတ်ပျက် စရာကောင်းပါတယ်။ ဘိုလစ်ဗီးယားက မျှော်လင့်ချက်မဲ့နေလို့ ဒီပွဲမှာ သိပ်အားမစိုက်လောက်တော့ဘူး။ အာဂျင်တီးနား ဂိုးပြတ်နိုင်ဖို့များတယ်။
