၂၀၂၁ ကိုပါအမေရိကပြိုင်ပွဲ၏ အကောင်းဆုံးကစားသမားဆုကို အာဂျင်တီးနားအသင်းခေါင်းဆောင် မက်ဆီနှင့် ဘရာဇီးလ်တိုက်စစ်မှူး နေမာတို့၏စွမ်းဆောင်ရည်များကြောင့် တစ်ဦးတည်းရွေးချယ်ရန် မည်သို့မျှမဖြစ်နိုင်သဖြင့် သမိုင်းတစ်လျှောက် ပထမဆုံးအဖြစ် ပူးတွဲချီးမြှင့်ခဲ့ကြောင်း သိရသည်။
နောက်ဆုံးဗိုလ်လုပွဲတွင် ထိပ်တိုက်ရင်ဆိုင်ခဲ့ရသည့် ၎င်းတို့နှစ်ဦးစလုံးမှာ ယခုပြိုင်ပွဲ၌ အကောင်းဆုံးခြေစွမ်းပြခဲ့ကြသူများဖြစ်ပြီး ချန်ပီယံ အာဂျင်တီးနားအသင်းခေါင်းဆောင် မက်ဆီမှာမူ ဂိုးသွင်းအများဆုံး၊ ဂိုးဖန်တီးမှုအများဆုံးဟူသည့် မှတ်တမ်းကောင်းများလည်း ရယူနိုင်ခဲ့သည်။
မက်ဆီသည် ၂၀၂၁ ကိုပါအမေရိကပြိုင်ပွဲ၌ (၄)ဂိုးသွင်းယူကာ ဂိုးဖန်တီးမှု (၅)ကြိမ် ပြုလုပ်နိုင်ခဲ့ခြင်းဖြစ်ပြီး နေမာမှာမူ (၂)ဂိုးသွင်းယူပြီး ဂိုးဖန်တီးမှု (၃)ကြိမ်သာ ပြုလုပ်နိုင်ခဲ့သည်။
သို့သော် တောင်အမေရိကဘောလုံးအဖွဲ့ချုပ်(CONMEBOL)က အကောင်းဆုံးကစားသမားဆုအတွက် တစ်ဦးတည်းကို ရွေးချယ်ရန် မည်သို့မျှ မဖြစ်နိုင်သောကြောင့် မက်ဆီနှင့် နေမာ နှစ်ဦးစလုံးကို ၂၀၂၁ ကိုပါအမေရိကပြိုင်ပွဲ၏အကောင်းဆုံးကစားသမားအဖြစ် ရွေးချယ်ကြောင်း ကြေညာချက်ထုတ်ပြန်ခဲ့သည်။
CONMEBOL ၏ ကြေညာချက်၌ ”အကောင်းဆုံးကစားသမားအဖြစ် တစ်ဦးတည်းကို ရွေးချယ်ဖို့ မဖြစ်နိုင်ပါဘူး။ ဘာကြောင့်လဲဆိုတော့ ဒီပြိုင်ပွဲမှာ အကောင်းဆုံးကစားသမား (၂)ဦးရှိနေတာကြောင့်ပါ။ သူတို့က ပွဲတိုင်းမှာ မတူကွဲပြားတဲ့ အရည်အသွေးတွေနဲ့ အဆုံးအဖြတ်ကစားသမားတွေလည်း ဖြစ်ခဲ့ကြပါတယ်။ နှစ်ဦးစလုံးက ဗိုလ်လုပွဲကိုရောက်ရှိပြီး ထိပ်တန်းအဆင့် စွမ်းဆောင်ရည်ကိုလည်း ပြသခဲ့ကြပါတယ်။ နှစ်ဦးစလုံး သွင်းဂိုးအများဆုံးစာရင်းမှာ ပါဝင်ခဲ့သလို၊ ဂိုးဖန်တီးမှုစာရင်းမှာလည်း ဦးဆောင်ခဲ့ကြပါတယ်။ သူတို့ထဲက တစ်ဦးကို ဘယ်လိုရွေးချယ်မှာလဲ”ဟု ဖော်ပြခဲ့သည်။
ထို့ကြောင့် မက်ဆီနှင့် နေမာတို့သည် ကိုပါအမေရိကပြိုင်ပွဲ၏ သမိုင်းတစ်လျှောက် ပထမဆုံးအကြိမ်အဖြစ် အကောင်းဆုံးကစားသမားဆုကို ပူးတွဲပိုင်ဆိုင်သူများ ဖြစ်ခဲ့သည်။
ထို့ပြင် မက်ဆီသည် ယခုပြိုင်ပွဲ၌ သွင်းဂိုးအများဆုံး၊ ဂိုးဖန်တီးမှုအများဆုံးဟူသည့် ဂုဏ်ပုဒ်များနှင့်အတူ အကောင်းဆုံးကစားသမားဆုကို ရယူနိုင်ခဲ့ခြင်းကြောင့် ပြိုင်ပွဲ တစ်ခုတည်း၌ ယင်းကဲ့သို့ စွမ်းဆောင်နိုင်သည့် ပထမဆုံးကစားသမားဖြစ်ကြောင်း ချီးကျူးဖော်ပြမှုများလည်းရှိခဲ့သည်။
မက်ဆီသည် ယခုပြိုင်ပွဲ၌ ဂိုးသွင်းဘုရင်ဆုကိုလည်း ရရှိခဲ့သည်။
