ဗြိတိန်ရုပ်သံ Sky Sports ၏ ရုပ်သံ ဘောလုံးဝေဖန်သူများဖြစ်သည့် လီဗာပူးလ်နောက်ခံလူဟောင်း ဂျေမီကာရေဂါနှင့် မန်ယူနောက်ခံလူဟောင်း ဂယ်ရီနဗီးလ်တို့က ယခုရာသီ ပရီးမီးယားလိဂ်အကောင်းဆုံးအသင်းများကို ရွေးချယ်ရာတွင် ရှစ်နေရာအထိ ဆန္ဒတူညီခဲ့ကြောင်း သိရသည်။
ပရီးမီးယားလိဂ်ရာသီ ယှဉ်ပြိုင်မှုမှာ ရာသီဝက်ကျော်စသာရှိသေးသော်လည်း ကာရေဂါနှင့် ဂယ်ရီနဗီးလ်တို့က ယခုရာသီ၏အကောင်းဆုံးအသင်းကို ရွေးချယ်ခဲ့ခြင်းဖြစ်သည်။
ဂယ်ရီနဗီးလ်က ၄-၂-၄ ပုံစံဖြင့် ဂိုး- အယ်လစ်ဆန်၊ နောက်တန်း – အာနိုးလ်၊ ဆာလီဘာ၊ ဗန်ဒိုက်၊ အူဒိုဂီ၊ အလယ်တန်း – ဒက်ကလန်ရိုက်စ်၊ ရိုဒရီ၊ ရှေ့တန်း – ဆာလာ၊ ဘိုဝင်၊ ဟာလန်း၊ ဆွန်ဟောင်မင်တို့ကို ရွေးချယ်ခဲ့ပြီး ကာရေဂါမှ ၄-၃-၃ ကစားကွက်ဖြင့် ပုံဖော်ထားသည့်အသင်းတွင်မူ ဂိုး – ဗစ်ကာရီယို၊ နောက်တန်း – အာနိုးလ်၊ ဆာလီဘာ၊ ဗန်ဒိုက်၊ အူဒိုဂီ၊ အလယ်တန်း – ပါလ်မာ၊ ဒက်ကလန်ရိုက်စ်၊ ဘာနာဒိုဆေးလ်ဗား၊ ရှေ့တန်း – ဆာလာ၊ ဘိုဝင်၊ ဆွန်ဟောင်မင်တို့ ပါဝင်ခဲ့ကြသည်။
ထို့ကြောင့် ၎င်းတို့နှစ်ဦးကြားတွင် အယ်လစ်ဆန်၊ ရိုဒရီ၊ ဟာလန်းနှင့် ဗစ်ကာရီယို၊ ပါလ်မာ၊ ဘာနာဒိုဆေးလ်ဗားတို့သာ ကွာဟချက်ရှိခဲ့သည်။ ကာရေဂါက သူ၏အသင်း တိုက်စစ်တွင် လက်ရှိဒဏ်ရာပြဿနာကြောင့် နားနေရပြီး ပြီးခဲ့သည့်ရာသီ ဖလားသုံးလုံး ချန်ပီယံအသင်းတွင် အကောင်းဆုံးခြေစွမ်းပြခဲ့သည့် မန်စီးတီးတိုက်စစ်မှူး ဟာလန်းကို ရွေးချယ်ခြင်းမရှိမှုမှာလည်း အံ့အားသင့်စရာ ဖြစ်ခဲ့သည်။
ဂယ်ရီနဗီးလ်က သူ၏အသင်းတွင် မန်ယူ၊ ချယ်လ်ဆီကစားသမားတစ်ဦးမျှ ရွေးချယ်ခြင်းမရှိသည်ဟု သူတို့၏အခြေအနေဆိုးနေမှုကြောင့်ဖြစ်ကြောင်း ရှင်းလင်းခဲ့သည်။ ထို့ပြင် ဂယ်ရီနဗီးလ်က သူ၏အသင်းမှာ ကာရေဂါ၏အသင်းကို အနိုင်ယူနိုင်မည်ဟုလည်း သုံးသပ်ခဲ့သည်။
