ကာဆီမီရိုနဲ့တွဲကစားချင်လို့ အိုးထရက်ဖို့ကို ပြောင်းရွှေ့ဖို့ ဒီဂျောင်စိတ်ကူးလာ

တန်းဟက်သည် ဖရန်ကီဒီဂျောင်ကိုလာမည့်နွေရာသီတွင် မန်ယူအပြောင်းအရွှေ့၏နံပါတ်တစ် ပစ်မှတ်အဖြစ် ထပ်မံသတ်မှတ်ထားကြောင်း ၎င်းကိုခေါ်ယူရေးကို မန်ယူက ထပ်မံကြိုးစားလာဖွယ်ရှိကြောင်း ဗြိတိန်မီဒီယာများက ဖော်ပြသည်။

မန်ယူသည် ဒီဂျောင်အတွက် ဘာဆာနှင့်ပြောင်းရွှေ့ကြေးသဘောတူခဲ့သော်လည်း ကစားသမားက အသင်းပြောင်းရန် ငြင်းပယ်ခဲ့ခြင်းကြောင့် ပြီးခဲ့သည့်နွေရာသီတွင် အပြောင်းအရွှေ့အကောင်အထည် မပေါ်ခဲ့ခြင်းဖြစ်သည်။

မန်ယူက ဘာစီလိုနာကို ယူရိုပါလိဂ်ရှုံးထွက်အဆင့်တွင် အနိုင်ကစားပြီးနောက် ဒီဂျောင်သည် အိုးထရက်ဖို့သို့ ပြောင်းရွှေ့ရေးကို စိတ်ဝင်စားလာကြောင်း သတင်းများက ဆက်လက်ဖော်ပြသည်။ ဒီဂျောင်သည် ကာဆီမီရိုနှင့်တွဲကစားခွင့်ရရေးကို စိတ်ဝင်စားနေခြင်းဖြစ်သည်။ မန်ယူသည် လာမည့်နှစ်တွင် ချန်ပီယံလိဂ်ဝင်ခွင့်ရနိုင်ခြင်းကလည်း ဒီဂျောင်ကို ဆွဲဆောင်နေသည့် အချက်တစ်ချက်ဖြစ်နေသည်။

ဒီဂျောင်သည် အိုးထရက်ဖို့ကွင်းတွင် လာရောက်ကစားပြီးနောက် အိုးထရက်ဖို့ကွင်း၏ feel good factor ကလည်း ၎င်းကို ဆွဲဆောင်နိုင်မည်ဟု တန်းဟက်က မျှော်လင့်နေသည်။ ပြီးခဲ့သည့်နွေရာသီ အပြောင်းအရွှေ့တွင် မန်ယူသည် အသက် ၂၅ နှစ်အရွယ် ဒီဂျောင်အတွက် ပြောင်းရွှေ့ကြေးပေါင် ၇၁ သန်းပေးရန်သဘောတူညီခဲ့သည်။ ဘာစီလိုနာသည် လစာငွေပမာဏ လျှော့ချရန်လာလီဂါ အဖွဲ့ချုပ်၏ ဖိအားပေးခြင်းကို ခံနေရသောကြောင့် ဒီဂျောင်အသင်းပြောင်းရွှေ့ရေးလှုပ်ရှားမှုသည် အသစ်တဖန်ပြန်ဖြစ်လာဖွယ်ရှိနေသည်။

မန်ယူ၏လက်ရှိခြေစွမ်းနှင့် ကာရာဘောင်ဖလားတွင်အနိုင်ရရှိခဲ့ခြင်း ပရီးမီးယားလိဂ်ချန်ပီယံပြေးလမ်းတွင် ပါဝင်လာခြင်းများကြောင့်လည်း ဒီဂျောင်သည် အိုးထရက်ဖို့သို့ ပြောင်းရွှေ့ရေးကိုစိတ်ဝင်စားလာနိုင်ကြောင်း သတင်းများက သုံးသပ်ဖော်ပြသည်။