မန်စီးတီးနည်းပြ ဂွါဒီယိုလာက လီဗာ ပူးလ်နည်းပြ ယာဂန်ကလော့ပ်သည် မိမိကို ပိုကောင်းသည့်နည်းပြ ဖြစ်လာစေခဲ့သည်ဟု ပြောကြားခဲ့သည်။
ဂွါဒီယိုလာသည် မန်စီးတီးအသင်းကို ယခုရာသီအပါအဝင် ပရီးမီးယားလိဂ်ချန်ပီယံဆု (၃)ကြိမ် ရယူပေးထားသူဖြစ်ပြီး (၄)ရာသီအတွင်း လီဗာပူးလ်အသင်း၏ ကျော်ဖြတ်ဗိုလ်စွဲခြင်းကိုသာ ခံခဲ့ရသည်။
ယာဂန်ကလော့ပ်သည် ဂွါဒီယိုလာ ဘိုင်ယန်မြူးနစ်အသင်းကို ကိုင်တွယ်စဉ်ကလည်း ဒေါ့မွန်အသင်း၏နည်းပြအဖြစ် ပြိုင် ဘက်ကောင်း ဖြစ်ခဲ့ဖူးခြင်းကြောင့် ဂွါဒီယိုလာက ယခုကဲ့သို့ ပြောကြားခဲ့ခြင်းလည်းဖြစ်သည်။
ဂွါဒီယိုလာက “ယာဂန်ကလော့ပ်နဲ့ အဲဗာတန်နည်းပြ အန်ဆယ်လော့တီတို့ရဲ့ စွမ်းဆောင်မှုကို ကျွန်တော် အများကြီးအသိအမှတ်ပြုပါတယ်။ သူတို့က ကျွန်တော့်အပေါ် လွှမ်းမိုးမှု ရှိခဲ့ကြပါတယ်။ ယာဂန်ကတော့ ဒေါ့မွန်မှာရော လီဗာပူးလ်အသင်းမှာပါ ပြိုင်ဘက်ဖြစ်ခဲ့ပြီး ကျွန်တော့်ကို ပိုကောင်းတဲ့နည်းပြဖြစ်အောင် လုပ်ဆောင်ပေးခဲ့သူပါ။ သူက ကျွန်တော့်ကို ပြိုင်ပွဲတွေနဲ့ တခြားအရာရာတိုင်းအပေါ် အများကြီးစဉ်းစားတွေးတောတတ်စေခဲ့သူလည်းဖြစ်ပါတယ်။ ဒါကြောင့် သူ့ကို အများကြီးအသိအမှတ်ပြုပါတယ်”ဟု ပြောကြားခဲ့သည်။
ယာဂန်ကလော့ပ်ကလည်း ယခုရာသီတွင် မန်စီးတီး ပရီးမီးယားလိဂ်ချန်ပီယံဖြစ်ခဲ့ခြင်းအတွက် ဂွါဒီယိုလာကို ဂုဏ်ပြုစကားဆိုခဲ့သည်။
